Қызылордада қарамағындағы қызметкерінен пара сұраған қалалық Полиция басқармасының бұрынғы бастығы 7 жылға бас бостандығынан айырылды.
Ол өз пайдасы үшін сыбайлас жемқорлыққа барған. Басқарманың жедел уәкіліне қудалайтынын айтып, оны ақша беруге мәжбүрлеген.
Сотталушы қылмысы әшкере болмауы үшін аға жедел уәкілге жедел уәкілден ақша әкеліп беруді сұраған. Аға жедел уәкіл басқарма бастығының қылмыстық пиғылынан бейхабар болған. Жедел уәкілдің өзге амалы қалмағандықтан, аға жедел уәкілдің карточкасына 50 мың теңге ақшаны аударған. Аға жедел уәкіл оны басқарма бастығына автокөлік ішінде қолма-қол берген.
«Қылмыстық іс толықтай дәлелденді. Сот үкімімен сотталушы ҚР Қылмыстық кодексінің 366-бабы 3-бөлігі 1-тармағымен кінәлі деп танылды. Мемлекеттік қызметте лауазымдарды атқаруға өмір бойына айырылды. Оған 7 жыл мерзімге бас бостандығынан айыру жазасы тағайындалды» делінген соттың хабарламасында.
