Алматыда жалған нөмірлерді анықтайтын "Сергек" камералары қосылды
Алматыда жалған нөмірлерді анықтайтын "Сергек" камералары қосылды
Алматыда «Қорғау Сергек» бағдарламасымен жалған нөмірлі көліктермен жүргізушілер ұсталуда.
«Алматыда «Қорғау Сергек» жүйесі 2021 жылдың қараша айынан бастап пилоттық режимде қолданылып келеді. Оның көмегімен жыл басынан бері жалған мемлекеттік нөмірмен жүрген (ҚР ӘҚбК-нің 590-бабы 3,4 бөлігі) 171 жүргізуші ұсталып, әкімшілік жауапкершілікке тартылды. Көліктер айыппұл тұрағына қойылды. Сонымен қатар, өткен тәулікте арнайы жарық-дыбыс және дауысты сигналдарды заңсыз пайдаланған екі көлік жүргізушісі, 7 мас жүргізуші көлікті басқарудан шеттетілді», - деді Алматы қалалық полиция департаментінің жергілікті полиция қызметі басқармасының бастығы, полиция полковнигі Манап Саттаров.
Оның айтуынша, қазіргі уақытта Алматыда жалған мемлекеттік нөмірмен жүретін, көлікке арнайы белгі беру құрылғыларын орнатқан және көлікті мас күйде жүргізген адамдарды анықтап, жауапқа тарту жұмыстары жалғасуда. Өткен тәулікте қала жолдарындағы «Қорғау Сергек» жүйесі жалған нөмір пайдаланған 11 жүргізушіні анықтады. Олар жалпы сомасы 12 миллион 680 теңгені құрайтын 790 құқық бұзушылық жасаған. Бұл көліктер арнайы айыппұл тұрағына орналастырылған.