Сапар мақсаты: Абай қаласының тынысы

Абай тігін фабрикасы

Қарағанды облысының өңірлік коммуникациялар қызметі Абай атындағы моноқалаға баспасөз турын өткізді. Журналистер моноқаланың тамырына қан жүгірткен кәсіпорындарға бас сұғып, шаһардың әлеуметтік-экономикалық тыныс-тіршілігімен танысты.

Қалаішілік жол жөнделіп жатыр

Жақында ғана сайланған қала әкімі Медеу Ахметовтың айтуынша, биыл 4,5 шақырымды құрайтын көшелерге орташа жөндеу жұмыстары жүргізіледі.

– Биыл Абай қаласы бойынша бірқатар жұмыс жоспары жасалды. Қаладағы 3-шағынауданда асфальт төсеніштерін төсеу жұмысы басталып кетті. Жаяу жүргіншілер жолы, яғни тротуар 3 көшеге салынып, тұрғындар игілігіне берілді. Абай ауданында 40 шақырым қалаішілік жолы бар, биыл 4,5 шақырым көшелердің жолы орташа жөндеуден өтеді. 7-8 шақырым қалаішілік жолдарға жөндеу жұмыстары жүргізіледі. Кәріз жүйесі 64 шақырымдай жерге қайтадан алмастырылып, қалпына келтіріледі, – деді Медеу Ахметов.

Шаһар басшысының айтуынша, қалада ауданы 16 мың шаршы метр болатын ірі ойын-сауық орталығының құрылысы басталған. «Бұл бірінші кезекте жаңа жұмыс орындарының ашылуына мүмкіндік береді. Сондай-ақ қаланы көгалдандыру бойынша жұмыстар жүргізіліп жатыр. 200-ге жуық көшет пен 2,5 мың бұта отырғызылған. Бұл жұмыс күзде де жалғасын табады», – дейді қала әкімі.

Ал Абай ауданының тұрғын үй-коммуналдық шаруашылығы, жолаушылар көлігі, автокөлік жолдары және тұрғын үй инспекциясы бөлімінің басшысы Ақниет Абжатов қалада абаттандыру, көшені жарықтандыру, асфальт салу бойынша жұмыстардың жасалып жатқанын айтты. Сондай-ақ тек қаланың өзінде емес, аудан құрамындағы кейбір елді мекендерде жол жөнделіп жатқанын тілге тиек етті.

Тігін фабрикасының екінші тынысы

Жеке инвестордың қаражатына қалпына келтірілген Абай тігін фабрикасы бүгінде өндіріске қажетті арнайы киім, күртеше, төсек-орын жабдықтарын тігеді. Цехтан шыққан өнімдерді өңірдің және елдің ірі өнеркәсіп орындары тапсырыспен алдырады. 80 қызметкер, 60 тігінші жұмыс істейтін кәсіпорынға әлі де мамандар керек.

Тігін фабрикасының директоры Нұрхан Жұмабеков «Тігіншілер аз болғандықтан, көп тапсырыстан бас тартуға тура келеді», – дейді.

– Біздің фабрикадан шыққан өнімдерді түрлі кәсіпорын, логистикадағы кәсіпкерлер, құрылыс компаниялары, автобус зауыттары алады. Мұнда мүмкіндігі шектеулі жандар да жұмыс істейді. Бізге тапсырыс көп түссе де, біз оның барлығын ала алмаймыз. Себебі тігіншілер жетіспейді.

Қазірдің өзінде білікті тігіншілер 250 мың теңге жалақы алады. Абай қаласында тігіншілерді даярлайтын колледж ашқымыз келеді. Сонда ғана өндірісті одан әрі дамыта аламыз, – дейді фабрика директоры.

Заманға сай аурухана

Одан кейінгі сапар Абай қаласының орталық ауруханасында жалғасты. 2 жыл бұрын күрделі жөндеуден өткен аурухана бүгінде тұрғындар үшін сапалы қызмет атқарып жатыр. Аурухананың қабылдау бөлімшесінде шұғыл медициналық көмек көрсетуді көздейтін 3Н жүйесі енгізілген. Жаңа қондырғылар мен жабдықтар әкелінген.

– Науқастарға ыңғайлы болуы үшін қабылдау бөлмесі 3Н жүйесіне сай жабдықталды. Бүгінде бізде 500 персонал бар. Стационар 87 орынға лайықталған, жалпы аурухана күніне 325 адам қабылдауға ыңғайланған. Абай қаласының, Горный, Қарабас кентінің, Дубовка ауылының тұрғындары осында келіп емделеді. Ауруханаға тіркелген адам саны – 37 мың. Емхана 2 жыл бұрын күрделі жөндеуден өтті. Заманауи жаңа қондырғылар әкелінді. Оның ішінде маммограф, 5 тыныс алу аппараты, рентген, ЭКГ аппараты бар, – деп таныстырды аурухана директоры Маратбек Жұмақаев.

Кәсіпкерге қолдау бар

Абай қаласында өз кәсібін табыспен дөңгелетіп отырған жас кәсіпкерлер жетерлік. Солардың бірі Дана Аманбаева Kids time деп аталатын балаларды дамыту орталығын ашқан. Ол 2019 жылы «Бастау Бизнес» жобасына қатысып, сертификатқа ие болған. Кейін 2020 жылы осы орталықты ашу үшін 555 мың 200 теңге көлемінде грант ұтып алып, жұмысын бастап кеткен. Бүгінде қажетті жабдықтар мен жиһаз сатып алынып, 2 жұмыс орны құрылған. Орталықта 2 жастан 6 жасқа дейінгі балалар тәрбиелене­ді. Дамыту орталығының ерекшелігі – мұнда кешенді оқытумен қатар әр баланың жеке ерекшелігіне сай оқытуға баса назар аудара­ды. Балалар мұнда ойнап жүріп оқиды. Олар сурет салады, ән айтады, ойнайды, бояйды, сонымен қоса, шет тілдерін үйренеді.

– Бұл – Абай қаласындағы бүлдіршін­дерге арналған алғашқы дамыту орталығы. Біздің орталықта оқыту әдістемелерінің кешені жұмыс істейді, бірақ негізі – Монтес­сори әдістемесіне сүйенеміз. Орталықта 40-қа жуық бала, 8 топ бар. Балаларды 4 оқытушы оқытады. Алдағы уақытта орталықты кеңейтуді жоспарлап отырмыз. Бірақ Қарағанды сияқты үлкен қалаларда орынды жалға алу қиын. Болашақта актерлік шеберлік сабағын оқытуға Қарағандыдан педагогтерді тарту ойда бар, – дейді Дана Аманбаева.

Биыл Абай ауданында кәсібін дөңгелеткен кәсіпкерлік субъектілерінің саны өседі деп күтіліп отыр. 100-ден аса жұмыс орнын құрып, 30 жаңа нысан ашу жоспарланған. Ісін жаңадан бастаған кәсіпкерлерді қолдау үшін ауданнан 50 грант бөлінеді.

Байқау айқын
Байқау айқын
Aikyn.kz | Бүгінгі жаңалықтар. Әлем және Қазақстан жаңалықтары.