Мұның да жай құрғақ уәде болып шыққанын уақыт көрсетіп отыр. Оған аршылмай қалған арықтар мен бекемделмеген өзендердің жағасы куә. Ең қызығы, қарастырылып қойды деген 1 миллиард 300 миллион теңге қайда кетті?
Досаевтың командасы қандай қарекет жасап жатыр?
Біздегі бар мәліметке сүйенсек, қала аумағында жаңбыр және еріген қар суларын бұруға арналған 16 коллектор бар. Бүгінде олардың көпшілігі иесіз және маусымдық дайындау кезінде тазарту қызметтері көрсетілмегеніне бірнеше жыл болған. Нәтижесінде, қоқыстан бітелген және істен шыққан. Аталған коллекторлардың 12-сі қала ішіндегі арық желілеріне қосылмаған. Тек қана Алатау ауданында 2018 жылы салынған 4 коллектор ғана арық желілеріне қосылған және біршама тұрақты жұмыс істеп тұр.
Қала басшылығы проблеманың шын мәнінде бар екенін халыққа ашық жеткізгісі келген болуы керек, арнайы БАҚ өкілдеріне баспасөз турын өткізді. Тур барысында біраз мәліметтерге қаныққандай болдық. Білгеніміздей, жақында Ерболат Досаевтың тапсырмасымен су басу қаупін шешу мақсатында су шаруашылығы нысандарының техникалық жай-күйіне талдау жүргізілген. Талдау нәтижесінде, бұл күнде қала аумағында үнемі су басатын 56 аймақ анықталған.
«Атап айтқанда, арық желілерін Ұлықбек және Саин көшелерінің қиылысында орналасқан коллекторға шұғыл қосылу бойынша жұмыстар жүргізілуде, бұл өз кезегінде арық желісін су өткізу қабілеттілігін ұлғайтып, төменгі аумақтарға кететін су ағынын азайтуға мүмкіндік береді.Арық жүйесін жаңғырту жұмыстары үнемі су басатын Төле би, Ясауи, Момышұлы көшелері мен Райымбек батыр даңғылында да жүргізіліп жатыр», – дейді әкімдік қызметкерлері.
Сонымен қатар биыл жалпы ұзындығы 376 шақырым болатын қаланың ішіндегі арық желісін салу және модернизациялау бойынша жоба әзірленген көрінеді. Жоба бойынша қаланың батыс бөлігіндегі Алатау, Наурызбай, Әуезов аудандары, орталық бөлігінде Жетісу, Бостандық, Алмалы аудандары, шығысындағы Медеу, Түрксіб аудандарындағы арықтардың мәселесі түбегейлі шешіледі деп жоспарланған екен.
Айтпақшы, қала әкімі Ерболат Досаев жақында ғана Мемлекет басшысы Қасым-Жомарт Тоқаевтың қабылдауында болған кезінде де осы мәселеге қатысты өз жоспарын таныстырған еді. Ол қаладағы құрылыстың тығыз болуына жол бермеу және әлеуметтік инфрақұрылымды дамыту жөнінде Президенттің өзіне берген тапсырмасының орындалу барысы туралы айта келіп, Алматыдағы нөсер жауынға арналған кәріз жүйесін жаңғыртудың 2025 жылға дейінгі бағдарламасының негізгі ережелерін таныстырған болатын.
Бұл жобаның қандай нәтиже беретінін алдағы уақыт көрсете жатар.
Алматы