Мәжілісмен Маңғыстау өңірін аралады

Маңғыстау

ҚР Парламенті Мәжілісінің депутаты Еділ Жаңбыршин, партияның облыстық филиалы жанындағы штаб мүшелері Нәжмедин Губашев, Садуақас Битан, Гүлнар Тасболатова, Аида Ертілеуова Манғыстау теміржолшыларымен кездес­ті. Аталған шарада бүкіл­ха­лық­тық референдумның маңызы туралы айтылды.

Мәжіліс депутаты Еділ Терек­байұлы Конституция белгілі бір топтың мүддесі үшін ғана қызмет ететін қағаз емес, мемлекеттік маңы­зы бар құнды құжат екенін ескерте келе, оған енгізілетін оңтай­лы өзгерістер Отанымыздың да­муына даңғыл жол саларына сенім білдірді.

«Референдум тәуелсіз Қазақ­станның өсіп-өркендеуіне оңды жол ашатын серпілістер мен сіл­кіністер әкелетін үлкен саяси ре­форма болайын деп тұр. Мемлекет басшысының бұл жаңашылдықты Конституцияға өзгерістер мен толықтырулар енгізуден бастауы – құптарлық іс. Енді осыған жүрегі елім, жерім, туған Отаным, халқым деп соғатын әрбір азамат белсенді түрде қатысып, өзінің ой-пікірімен бөлісуі керек. Қазақстанның бола­шағы зор. Себебі Жаратқан еліміздің астын да, үстін де байлыққа толты­рып қойған. Осы ұлан-ғайыр да­ла­ны аталарымыз аттың жалында жүріп қорғап, бізге аманаттап кетті. Енді сол байлық пен мол мұраны жал­пы халықтың игілігіне жаратуы­мыз керек. Ол ат төбеліндей бай-манаптарға тиесілі болмауы қажет. Сол үшін күресуге тиіспіз. Конс­ти­туцияға енгізілетін өзгерістер мен толықтырулар сол күрестің басы деуге болады. Отыз үш бапқа өз­герістер енгізіледі. Әрқайсын қарап шықтым. Соның барлығы жүйелі түрде жүзеге асатын болса, еліміз әлем елдерінің ішінен орнын ойып тұрып алады. Конституция – мем­лекет үшін ең маңызды құжат. Одан ауытқымау керек. Мен болашақ ұрпағымыздың әділетті мемлекетте өмір сүргенін қалаймын», – деді мәжілісмен.

Осы күні Парламент Мәжілі­сінің депутаты облыстағы этномә­дени бірлестіктерінің көшбасшы­лары­мен де кездесті. Ол Ата Заңы­мызды бүкілхалықтық дауыс беру арқылы өзгерту елдің пікірін еркін, ашық білдіруінің айқын көрінісі екенін атап өтті. Бұл өзгертулер Мем­лекет басшысының саяси тың рефор­маларды жүзеге асыруының, билік институттары арасындағы конс­титуциялық құрылымды жетіл­діруінің тиімді тәсілі деп түсіндірді.

Сондай-ақ Еділ Жаңбыршин және Ақтау қалалық штаб төрағасы, қалалық мәслихат депутаты Анар Шамшадинова «Х.Өзбекғалиев» атындағы Маңғыстау политехни­ка­лық колледжінің ұжымымен кез­десті. Кездесу соңында азаматтар­дың сұрақтарына жауап беріп, ұсы­ныстарын тыңдады. Колледж ұжымы референдумның тарихи және саяси маңызына назар ауда­рып, оны қолдайтынын жеткізді.

Aikyn.kz | Бүгінгі жаңалықтар. Әлем және Қазақстан жаңалықтары.