Президентіміз Қасым-Жомарт Тоқаевтың төрағалығымен Конституцияға енгізілетін өзгерістер мен толықтырулар «Жаңа Қазақстанды» құрудағы аса маңызды белес болмақ. Бұл түзетулер еліміздің саяси жүйесін демократияландыру мен модернизациялауға үлкен серпін береді.
Бұл – Президенттің ең батыл қадамы. Жаңа Қазақстанды құрудағы алғашқы және нық та сенімді бастамасы. Өйткені Мемлекет басшысы біріншіден өзінің президенттік құқығын қысқартып, Парламенттің құзырын едәуір күшейтуге қадам жасап отыр. Осының арқасында азаматтардың билік ісіне араласуы артып, құқық қорғау саласы жаңа бағытта жұмыс жүргізуді бастайды.
Облыс әкімдерін тағайындау жүйесі өзгеріп, мәслихат депутаттарының көп дауысын алған үміткер әкім болып сайланады. Бұл жергілікті мәслихат депутаттары беделінің артатынының белгісі. Енді тіке сайлау арқылы түскен халық қалаулылары, өз сайлаушыларының алдында сенімді ақтай алмаса, онда сайлаушылар оны мандатынан айыруға құқылы.
Мәслихаттардың ықпалын арттыру арқылы сайлаушылардың көзқарасы мен пікірін барынша толық қамтуға мүмкіндік жасалады. Аудандық және қалалық мәслихаттардың депутаттарын сайлаудың мажоритарлық жүйесінің енгізілуі өңірлердің тыныс-тіршілігіне азаматтардың ықпал ету мүмкіндігін арттыруға жол ашады. Сондай-ақ құқық қорғау саласы бойынша маңызды өзгерістер енгізіледі. Атап айтсақ, Конституциялық сот құрылады. Адам құқықтары жөніндегі уәкілдің, яғни омбудсменнің мәртебесі Ата Заңмен айқындалады. Елімізде өлім жазасы мүлде жойылады. Мұның бәрі азаматтардың құқығы мен бостандығын қорғау үшін жасалып жатыр.
Референдум өткізу азаматтардың осындай жалпыұлттық сипаттағы маңызды мәселеге және ел тағдырын шешуге дауыс беруге тікелей қатысуға мүмкіндік береді.
Рабиға ҚУАТБЕКОВА,
Түркістан облыстық
мәслихатының депутаты
