Мемлекеттік рәміздер ұлықталды

Мемлекеттік рәміздер ұлықталды 1

3 маусымда Мәдениет және спорт министрлігінің ұйымдастыруымен Л.Н.Гумилев атындағы Еуразия Ұлттық университетінде Мемлекеттік рәміздер күніне орай «Мемлекеттік рәміздер және жаңа Қазақстанның елшілдік әлеуеті» атты ғылыми-практикалық конференция өтті.

Конференцияға ведомствоға қарасты Архив істері және құжаттаманы басқару комитетінің төрағасы Қ.Бораш, Түркітану және алтайтану ғылыми зерттеу орталығының директоры, түрколог ғалым Қ.Сартқожаұлы, Елтаңба авторы Жандарбек Мәлібекұлы, профессор С.Негимов, геральдист А.Рысбекұлы мен белгілі әлихантанушы Сұлтан Хан Аққұлұлы қатысып, мемлекет айбынын танытанын рәміздер бойынша баяндама оқыды.

Мемлекеттік рәміздер ұлықталды

Сондай-ақ басқосу аясында Геральдикалық зерттеулер орталығы «Қазақ геральдикасы: Көне дәуір және бүгін» атты көрме ұйымдастырды. Онда ертеден қазақ халқының рәмізі саналған құнды дүниелер көрсетілді. Өз кезегінде «Қазақ геральдикасы» кітап альбомының тұсаукесер рәсімі де өтті.

Осы жиында Мәдениет министрлігіне қарасты Архив істері және құжаттаманы басқару комитетінің төрағасы Қуат Бораш алдағы уақытта Мемлекеттік рәміздер күніне орай өтетін бірқатар жиындарды атап өтті.

– 4 маусымда Мемлекет басшысымен Мемлекеттік туды көтеру рәсімі болады. Бұл тұста барлық мекемелерде Әнұран орындалатынын айта кеткен жөн. Атаулы күн аясында Мәдениет министрлігі «Жыл патриоты» атты патриоттық форумын өткізеді, – деді ол.

Салтанат Асанәліқызы,
Қарақат Әнуарқызы,
ЕҰУ-дың 2-курс студенттері

Aikyn.kz | Бүгінгі жаңалықтар. Әлем және Қазақстан жаңалықтары.