Елордада «Жыл патриоттары» анықталды

Елордада «Жыл патриоттары» анықталды 1

Бүгін – Мемлекеттік рәміздеріміздің 30 жылдық мерейтойы.  Осыған орай  елорда төрінде Патриоттар форумы ұйымдастырылып, көк Туымыздың, еңселі Елтаңбамыздың, асқақ Әнұранымыздың биік белесі ерекше салтанатпен аталып өтті.

Іс-шарада Мәдениет және спорт министрі Дәурен Абаев  еліміздегі әр салада өзінің кәсіби жетістігімен ерекшеленген отандастарды  «Жыл патриоты» аталымымен марапаттады. Сонымен қатар салтанатты іс-шараға Елтаңбамыздың авторы  Жандарбек Мәлібеков ағамыз бастаған құрметті қонақтар, мәдениет өкілдері, қоғам және мемлекет қайраткерлері, ғалымдар  қатысты.

Елордада «Жыл патриоттары» анықталды Форумға жиналған жастардың ел мен жерге, қасиетті рәміздерімізге, қастерлі Отанымызға деген ыстық махаббаты кең ғимараттың ішін асқақ рухқа бөледі.

«Біз осындай іс-шаралар арқылы жастардың бойындағы патриоттық сезімге серпін береміз, жарқын болашаққа жалындаған жігермен жол аламыз. Дербестігіміздің дәлелі, Тәуелсіздігіміздің символы – Көк туымыз, Елтаңбамыз, Әнұранымыз мәңгі жасасын!» – деді  Дәурен Абаев.

Елордада «Жыл патриоттары» анықталды

«Жыл патриоты» номинациясының жеңімпаздары:

«Ғылым және білім»: Асхат Жұмабеков – білім беру зерттеулерінің Еуропалық Ассоциациясының еуропалық байқауының жеңімпазы;

Максим Здоровец – физик, Л. Н. Гумилев атындағы Еуразия ұлттық университеті тректік мембраналық технологияларды дамыту жөніндегі инженерлік бейіндегі зертхананың жетекшісі, физика-математика ғылымдарының кандидаты.

«Мәдениет және спорт»: 2022 жылғы Бейжіңдегі қысқы Паралимпиадасының қола жүлдегері – Александр Герлиц;

Гүлнұр Мамасарипова – телепродюсер, сценарист.

 «Медицина және волонтерлік»: QazCovid-in (QazVac) коронавирус инфекциясына қарсы қазақстандық вакцинаны әзірлеуші – Күнсұлу Закария;

Ерікті – Абылайхан Әбдіраш. Нұр-Сұлтан қаласында пандемия кезінде кәсіби медициналық көмек көрсеткен.  Сондай-ақ халыққа медициналық көмек көрсету үшін «Қазақстанның Медицина Жастары» РҚБ құрған.

 «Өнеркәсіп және ауыл шаруашылығы»: Өз қаражатына туған ауылында (Погадаев ауылы, БҚО) спорт кешенін салған кәсіпкер Бейбіт Асанов. Қазіргі уақытта онда ауыл тұрғындары жаттығып, мәдени іс-шаралар өткізуде;

Аманжол Арипов – «БАХА SОHNE» ЖШС директоры, Ақмола облысы Атбасар ауданы Покровка ауылында сұлы үлпегін өндіретін зауыт салған. Компанияның 1000 бас ірі қара малға арналған бордақылау алаңы бар.

«Технология және бизнес»: Өркен Мамырбаев – Phillips компаниясымен бірге қазақ тіліндегі сөздерді мәтінге айналдыратын бағдарламалық қамтамасыз етуді әзірлеген. Бұл технология қазақ тілін ақпараттық кеңістікке интеграциялау және дамыту үшін тұңғыш рет әзірленген;

Сабыржан Акбаров – кәсіпкер және меценат, 2021 жылы Сардоба су қоймасы бөгетінің бұзылуынан пайда болған апат кезінде Түркістан облысы Мақтаарал ауданының тұрғындарына көмек көрсеткен. Сондай-ақ өткен жылы қуаңшылыққа байланысты жем-шөп тапшылығы кезеңінде Маңғыстау облысының тұрғындары үшін шөп жинауға көмек көрсеткен.

«Ерекше ерлік көрсеткен азаматтар»: Ұлан Мырзабай – гвардияшы. Ақтөбе қаласындағы қаңтар оқиғасы кезінде Отан алдындағы борышын абыроймен орындап, ерлік көрсеткен;

Сәбит Шонтақбаев – сегізінші қабаттан үш жасар қызды өз өмірін қатерге тігіп құтқарған.

Aikyn.kz | Бүгінгі жаңалықтар. Әлем және Қазақстан жаңалықтары.