Тамылжыған табиғаты, тарихы мыңжылдықтардың қойнауына дейін тамырлайтын Қазақстанның туристік әлеуеті жайында жиі сөз етеміз. Биыл сол әлеуетіміз іс жүзінде сыналмақ. Мәдениет және спорт министрлігі мен Kazakh Tourizm ұлттық компаниясының басшылығы биыл ішкі туризмге едәуір салмақ түсетінін айтып, осы маусым отандық туристік нысандарда 6 миллионға жуық адам демалатынын мәлімдеді.
Осы орайда туристік нысандарды қажетті инфрақұрылыммен қамтамасыз етуден басталып, турист ретінде шекарадан өткендердің пиғылын анықтауға дейін жалғасатын кешенді жұмысты жүйелі ұйымдастыра білген жөн.
Әйтсе де, суға түсу маусымы басталғалы Ақмоладағы Бурабай, Зеренді аумағындағы демалыс орындарына түсер жүктеме артқан. Облыстағы санаторийлер мен емдеу-сауықтыру орталықтарында күзге дейін бос орын жоқ.
Қазір мамандар Украина мен Ресей арасындағы соғыстың ықпалының салдарынан осыған дейін Грекия, Түркия, Италия сияқты елдерде демалған ресейлік туристердің Қазақстанға қарай ағылатынын болжайды. Тіпті, көрші елден Қазақстанға келетіндердің саны алдыңғы жылдармен салыстырғанда 7 есеге көбеймек.
Оның үстіне, осы күндері Ресейдің Омбы, Новосібір, Екатеринбург, Санкт-Петербор және Мәскеу қалаларында қазақстандық туризм саласы кеңінен таныстырылып жатыр. Демек, елге демалуға келетін ресейліктердің саны біз ойлағаннан әлқайда көп болуы мүмкін. Дегенмен «турист» атын жамылып, Қазақстанда тұрақтап қалуды мақсат еткендердің де қарасы қалыңдай түскен.
Мәдениет және спорт министрлігі ресейлік туристердің таңдауы Қазақстанның солтүстік-шығыс өңірлеріне түсетінін айтады. Олардың арасында Ресей азаматтығын қабылдаған бұрынғы Қазақстан азаматтары да болуы мүмкін. Сондай-ақ осы аймақтарда тұратын туыс-туғандарына, дос-жарандарына қонаққа келетіндер де баршылық.
Осы тұста еліміздегі туристік демалыс орындары мен жол бойында әжетханалардың жеткіліксіздігі, орман-тоғайлар мен өзен-көлдердің ластануы мәселелерін де жоққа шығара алмаймыз.
Сондықтан Индустрия және инфрақұрылымдық даму министрлігі мен облыс әкімдіктері бірлесіп, туристік орындар мен автомобиль жолдары бойындағы санитариялық-гигиеналық тораптардың жай-күйіне зерттеу жүргізді. Ведомство олқылықтың орнын толтыру үшін 793 нысан салу қажет екенін анықтаған. Бұл орайда министрлік жергілікті атқарушы органдармен бірлесіп санитарлық-гигиеналық 138 торапты салғанын жеткізді.
«Қауіпті» туристер қатаң бақылауда
Биыл қаңтар айында салалық министрлік туристік бағыттағы кәсіпкерлік субъектілеріне санитарлық тораптарды күтіп ұстау мақсатында ай сайын 83 мың 300 теңге мөлшерінде субсидия беретін болып шешті. Жалпы, туристік орындарда табиғаттың ластанбауына жергілікті әкімдіктер мен Ұлттық парктер жауапты.
Ал турист кейпінде шекарадан өтіп, ел ішіне іріткі салатындармен күрес мәселесі хақында Ақмола облысы Полиция департаментінен сұрап, білген едік. Тәртіп сақшылары шетелдік демалушыларды әуелі шекарадан өтер кезде Ұлттық қауіпсіздік комитеті, одан кейін көші-қон полициясы тексеретінін айтып, қауіпсіздікке барынша мән берілгеніне сендірді.
[caption id="attachment_200363" align="alignleft" width="1200"]
Ақмола облысы