Құрылымдық реформалар жалғасады

Сенат төрағасы Қасым-Жомарт Тоқаев 600-ден астам мейман, оның ішінде 30 елдің мемлекет және үкімет басшылары, парламент төрағалары, беделді саясаткерлер, дипломаттар, әскерилер мен сарапшылар жиналған Мюнхен қауіпсіздік конференциясына қатысып, сөз сөйледі.

Беделді форумның биылғы күн тәр­­тібі трансатлантикалық қаты­нас­тар­дың келешегі мен НАТО, сондай-ақ қауіпсіздік пен қорғаныс сала­сын­дағы халықаралық ынтымақтастық төңі­регінде болды. Шара аясында Ба­тыс пен Ресейдің өзара қарым-қа­ты­настары, Сириядағы соғыс, Азия-Тынық мұхиты аймағындағы ахуал және басқа да тақырыптар бойынша пі­кірсайыс өрбіді. Германия канцлері Ан­гела Меркель, БҰҰ Бас хатшысы Ан­тонио Гутерриш, АҚШ-тың вице-пре­зиденті Майк Пенс, НАТО Бас хат­­шысы Йенс Столтенбергтің баян­дамалары ерекше ықылас туғызды. Қа­­зақстан Сенатының төрағасы «Еу­ра­зиядағы сыну сызықтары» тақыры­бы бойынша панельдік пікірсайысқа қа­тысты. Қ.Тоқаев өз сөзінде ай­мақ­та­ғы мемлекеттер арасында бол­жал­ды және достық қатынастар қа­лып­тас­тырудың маңыздылығын атап өт­ті.

Қазақстанның шектесетін елдер­мен аумақтық мәселелерi жоқ екенін, өйткені әлемдегі құрлықтағы ең ұзақ шекара – Қазақстан мен Ресей ара­сындағыны қоса есептегенде барлық елдермен мемлекеттік шекара де­лимита­цияланғанын жеткізді. Қытай­дың «Бір белдеу, бір жол» тұжырымы аймақтық экономикалық ынтымақ­тастыққа, оның ішінде транзиттік әлеуеттің арта түсуіне және Еуразия елдерінде жаңа өнеркәсіп қуаттарын қалыптастыру үшін ауқымды мүмкіндіктер ашатынына тоқталды. Төраға бұл тізбекте Ресей маңызды рөл атқарады деп санайды. Президент Н.Назарбаевтың басшылығымен жүзеге асып жатқан реформалар да егжей-тегжейлі талқыланды.
– Қазақстан – реформашыл мемлекет. Біз экономика немесе саясат саласы болсын, біздің қо­ғамның трансформациялануын тоқтатуға болмайтынына кәміл сенеміз. Қазақстан әлемдегі ең дамыған 30 елдің қатарына ілгерілеу үшін, қандай жағдай болса да құрылымдық реформалар жалғаса беруі тиіс, – деді Қ.Тоқаев.
Төраға Біріккен Ұлттар Ұйымы Қауіпсіздік кеңесінің мүшесі лауазымында Қазақстанның басым­дықтары туралы да хабардар етті. Ол ядролық қару мен ядролық ма­териалдардың жайылу мәселелерін, әсіресе, олардың террористік ұйым­дар қолына түсу қаупін ерекше бөліп айтты.
Сессияға Әзірбайжан президенті Ильхам Алиев, Эстония президенті Керсти Кальюлайд, Грузия премьер-министрі Георгий Квирикашвили және Украинаның бұрынғы премьер-министрі Арсений Яценюк қатысты. Пікірсайысты Eurasia Group компаниясының негізін салушы Ян Бреммер жүргізді.