اسكەري كافەدرادا قىزدار دا وقىپ جۇر

1637
0
بولىسۋ:

وتكەن جىلدان باستاپ, الفارابي اتىنداعى قازاق ۇلتتىق ۋنيۆەرسيتەتتىڭ اسكەري كافەدراسى قىزداردان قۇرالعان ستۋدەنتتەردى قابىلداپ, ولارعا اسكەري بىلىم بەرۋدى باستاپ كەتتى. العاشقى تولقىن بيىل تۇلەپ ۇشقالى وتىر. قورعانىس مينيسترلىگىنىڭ باستاماسى بويىنشا بارلىق ازاماتتىق جوعارى وقۋ ورىندارىنداعى اسكەري كافەدرالاردا ستۋدەنت قىزدارعا ارنالعان ماماندىق اشىلدى. 

سوڭعى 2 جىلدا اسكەري كافەدارعا ستۋدەنت قىزداردى ىرىكتەپ, اسكەري بىلىم الۋعا قابىلداپ جاتىرمىز. ونداعى باستى ماقسات – سوڭعى جىلدارى اسكەري ەسەپتىك جاڭا ماماندىقتاردىڭ اشىلۋى. بىزدىڭ قىزدار اسكەري جۋرناليستيكا, ارنايى ۇگىت جۇمىسى, اسكەري پسيحولوگ ماماندىقتارى بويىنشا مامان اتانادى. سەبەبى مۇندا قىز بالاسىنا جاقىن اسكەري ماماندىقتار قاراستىرىلعان. بىزگە 2015 جىلى – 45 ستۋدەنت قىز, ال 2016 جىلى – 60 ستۋدەنت قىز قابىلداندى. بيىل تاعى دا ىرىكتەۋ جۇمىستارى جۇرگىزىلىپ جاتىر. شامامەن, وسى كولەمدە تاعى بىر ۆزۆود قۇرالىپ قالادى. قىزدار مەن ۇلداردىڭ اسكەري كافەدرادا وقۋ باعدارلامالارى بىردەي, تەك بىر عانا ايىرماشىلىعى, وقۋ اياقتالعان كەزدە اسكەري جيىندار كەزىندە قىزدارىمىز پوليگوندارعا جىبەرىلمەيدى,  دەيدى اسكەري كافەدرانىڭ زاپاستاعى پولكوۆنيگى, اعا وقىتۋشى بەكبولات يحانباەۆ.

اسكەري كافەدرانىڭ 1-كۋرس ستۋدەنتى ەركەجان كازىموۆا: «اسكەري ادام-بولاشاققا نىق قارايدى. ال ۋنيۆەرسيتەتتە بىلىم الىپ جۇرىپ, اسكەري وقۋدى دا قاتار ۇستاۋ ۇلكەن باقىت, ۇلكەن مارتەبە. وزىمدى وسى كافەدرادا بىلىم الۋ باقىتىنىڭ بۇيىرعانى ۇشىن ەرەكشە ماقتان تۇتامىن», دەپ ىستىق ىقىلاسىن جەتكىزدى.

ال وسى كافدەرانىڭ العاشقى تۇلەگى بولعالى وتىرعان اقبوپە بولاتحانوۆا: «مەنىڭ بىرىنشى ماماندىعىم قۇقىقتانۋ بولعاندىقتان, بولاشاقتا ۇلتتىق قاۋىپسىزدىك كوميتەتى, يا بولماسا, پروكراتۋرادا جۇمىس جاساعىم كەلگەندىكتەن, بۇل مۇمكىندىكتى جىبەرىپ العىم كەلمەدى. تىپتى, العاشقىلاردىڭ بىرى بولۋ  مەن ۇشىن ۇلكەن قۇرمەت, ەرەكشە سەزىم. العاشىندا اتا-انامنىڭ تاراپىنان قارسىلىق بولعانىمەن, ۋاقىت وتە كەلە تۇسىنىستىك تانىتتى. اسكەردە ەر-ايەل دەپ بولىنبەيدى, سوندىقتان بۇل جەردە بارلىعىنا بىر تالاپ. سوعان توزۋ, ۇيرەنۋ, بەيىمدەلۋ عانا قاجەت. بۇل بەيىمدەلۋ كەزەڭىنەن وتكەن ستۋدەنت قىز- وسى ماماندىقتى يگەرىپ كەتە الادى», – دەيدى.

سونداي-اق, اسكەري كافەدرانىڭ بەلسەندىسى اياۋلىم سەرىكبولوۆا: «بىز بيىل 14-30 قاڭتار ارالىعىندا ۇندىستاننىڭ نيۋ-دەلي قالاسىندا اسكەري ىسساپارمەن بارىپ قايتتىق. ول جەرگە 9 مەملەكەتتىڭ وكىلى كەلدى. قازاقستان وكىلدىگىنىڭ قۇرامىندا – 12 ستۋدەنت, ونىڭ ىشىندە بىر ۇل جانە وزىم بولدىم. شارا بارىسىندا پرەزيدەنتتىڭ, پرەمەر-مينيستردىڭ, كادەت كورپۋسىنىڭ باستىعىنىڭ قابىلداۋىندا بولدىق. ولارداعى اسكەري وقۋ فورماسىنان ۇلكەن تاجىريبە جيناپ قايتتىق»,-دەيدى.

العاشقى تولقىننىڭ دا وز وزاتتارى بار. ۇستازداردىڭ ايتۋىنشا, قازىر اسكەري وقۋدا تىڭنان تۇرەن سالىپ, بيىكتەن كورىنىپ جۇرگەن ەركەجان كازىموۆا, گاۋحار قۇلتايقىزى, دينارا ورالبەكوۆا, نازگۇل جۇماباەۆا, ايالا جۇماتحانوۆا, ەلەنا مورۋگوۆا سەكىلدى ستۋدەنتەر بار. باستىسى, ولار وتان ۇشىن, ۇل-قىز دەپ بولىنبەي, بىردەي وقۋ فورماسىندا جاتتىعىپ, شىڭدالىپ كەلەدى. ولار كەشەگى الييا مەن مانشۇك, حيۋاز سەكىلدى باتىر اپالارىنداي, باتىل, مىقتى جۇرەك يەسى بولارى سوزسىز. بەيبىت كۇننىڭ -تىنىشتىعىن ۇستاپ تۇرۋ, ار ازامتتىڭ جۇرەگىندە ۇران بولىپ ۇيالاسا عانا, مىقتى رۋح قالىپتاسادى.

دوسجان بالابەكۇلى,

سۋرەتتەردى تۇسىرگەن اۆتور

بولىسۋ:

پىكىر جازۋ


*