مەديتسينالىق ساقتاندىرۋدىڭ پايداسى زور

236
0
بولىسۋ:

 «نۇر وتان» پارتيياسىنىڭ ورتالىق اپپاراتىندا پارتييانىڭ وبلىستىق فيليالدارى جەتەكشىلەرىنىڭ قاتىسۋىمەن دوڭگەلەك ۇستەل وتتى. كەزدەسۋدىڭ ماقساتى – مىندەتتى الەۋمەتتىك مەديتسينالىق ساقتاندىرۋ جۇيەسىن حالىققا قالاي تۇسىندىرۋ كەرەكتىگىن تالقىلاۋ.

پارتييا حاتشىسى ناتاليا گودۋنوۆا حالىققا مىندەتتى مەديتسينالىق ساق­تاندىرۋدى تۇسىندىرۋ جۇمىستارىنىڭ ماڭىزدىلىعىن ايتتى.
– اتالمىش زاڭ اربىر قازاقستان­دىققا قاتىستى. سوندىقتان اقپاراتتى قاراپايىم, تۇسىنىكتى تىلمەن تۇسىندىرۋ كەرەك, – دەدى پارتييا حاتشىسى.
پارتييا حاتشىسى ەلدە ازاماتتاردىڭ دەنساۋلىعىن جاقسارتۋ جانە مە­دي­تسينالىق قىزمەت ساپاسىن كوتەرۋ ۇشىن كوپ جۇمىستار اتقارىلعانىن اتاپ وتتى.
– بۇگىندە ايماقتاردا ساپالى مەدي­تسينالىق كومەك الۋعا مۇمكىندىك بار. ول ۇشىن استاناعا نە الماتىعا بارۋدىڭ قاجەتى جوق. مەديتسينا قىزمەتكەرلەرىنە كەلەر بولساق, جۇمىس جۇرگىزىلىپ كەلەدى جانە جالعاسىن تابادى, – دەدى ول.
دەنساۋلىق ساقتاۋ ۆيتسە-مينيسترى لاززات اقتاەۆا مەديتسينالىق ساقتان­دىرۋدى ەنگىزۋ – تۋۋدىڭ وسۋىنە, جاڭا تەحنولوگييانىڭ ەنگىزىلۋىنە جانە كوپ شىعىندى قاجەت ەتەتىن اۋرۋلاردىڭ جيى كەزدەسىپ جاتقانىنا بايلانىستى ەكەنىن اتاپ وتتى.
– ازاماتتار مەديتسينالىق كومەكتى تەگىن العانىمەن, ونىڭ وتەمى مەملەكەت بيۋدجەتىنەن تولەنەدى. جىل سايىن مە­ديتسينا سالاسىندا شىعىن كولەمى وسىپ كەلەدى. تىعىرىقتان شىعاتىن بىردەن-بىر جول – مىندەتتى مەديتسينالىق ساق­تان­دىرۋدى ەنگىزۋ. ونىڭ ەكى تۇرى بار. بىرىنشىسى – رەسپۋبليكالىق بيۋدجەتتەن قارجىلاندىرىلاتىن مەديتسينالىق كومەكتىڭ مەملەكەت كەپىلدەندىرگەن كولەمىن ۇسىناتىن بازالىق پاكەت. ول قازاقستاننىڭ بارشا ازاماتتارى ۇشىن قولجەتىمدى بولماق. ونىڭ قۇرامىنا جەدەل جاردەم قىزمەتى, سانيتارلىق اۆياتسييا, الەۋمەتتىك ماڭىزدى اۋرۋلارعا, سونداي-اق توتەنشە جاعدايلاردا, پروفيلاكتيكالىق ەكپە كەزىندە كور­سەتىلەتىن مەديتسينالىق كومەك كىرەدى. ەكىنشىسى – جاڭادان قۇرىلاتىن مەدي­تسينالىق ساقتاندىرۋ قورى ۇسىناتىن ساقتاندىرۋ پاكەتى. بۇل اقىلى بولماق. وعان امبۋلاتورلىق-ەمحانالىق جانە ستاتسيونارلىق كومەك, مەديتسينالىق رەابيليتاتسييا, مەيىربيكەلىك قاراۋ مەن جوعارى تەحنولوگييالىق كومەك كىرەدى, – دەدى لاززات اقتاەۆا.
سونىمەن قاتار ۆيتسە-مينيستر «ال­تىن القا», «كۇمىس القا» يەگەرلەرى, با­لالار, ۇوس ارداگەرلەرى مەن مۇگەدەكتەرى, كۇندىزگى بولىم ستۋدەنتتەرى, سوتتالعان ازاماتتار سيياقتى 12 سانات جارنا تو­لەۋدەن بوساتىلادى. ولارعا مەملەكەت تولەيدى. اي سايىن جەكە كاسىپكەر 2 مىڭ 400 تگ, ەكونوميكاعا ۇلەس قوسپايتىن بەل­سەندى ەمەس حالىق كەلەسى جىلدان باستاپ ەڭ از كولەمدەگى جالاقىدان 5 % تولەيتىن بولماق. اربىر ادام وزىنىڭ قاي ساناتقا كىرەتىنىن ناقتى بىلىپ الۋى قاجەت. سوندا جارنانى مەملەكەت الدە جۇمىس بەرۋشى نەمەسە وزى تولەيتىنى انىق بولادى.
كەزدەسۋ پارتييانىڭ ساياسي مەنەدج­مەنت مەكتەبى ۇيىمداستىرعان «قازاق­ستان قوعامىن جاڭعىرتۋداعى «نۇر وتان» پارتيياسىنىڭ ورنى مەن رولى» سە­مينار-ترەنينگى اياسىندا وتتى.

كوركەم ومىرالى

بولىسۋ:

پىكىر جازۋ


*