ق.توقاەۆ: ەلiمiزدiڭ بيۋدجەتi مۇنايدان تۇسەتiن تۇسiمدەرگە تاۋەلدi

392
0
بولىسۋ:

ەلiمiزدiڭ بيۋدجەتi مۇنايدان تۇسەتiن تۇسiمدەرگە ايتارلىقتاي تاۋەلدi. سول سەبەپتەن بيۋدجەتتiڭ مۇناي باعاسىنا تاۋەلدiلiگiن تومەندەتۋ كەرەك. بۇل تۋرالى قر پارلامەنتi سەناتىنىڭ توراعاسى قاسىم-جومارت توقاەۆ «تەڭگەرiمدi جانە اشىق بيۋدجەت – ەلدiڭ ساتتi جانە تۇراقتى الەۋمەتتiك-ەكونوميكالىق دامۋىنىڭ كەپiلi» تاقىرىبىنداعى پارلامەنتتiك تىڭداۋ بارىسىندا ايتتى.

ق.توقاەۆ وز سوزiندە بيۋدجەت شىعىستارىنىڭ تيiمدiلiگiن ارتتىرۋعا باسىمدىق بەرۋ كەرەك دەدi. ونىڭ ايتۋىنشا, قارجىنى ماڭىزدى سالالارعا عانا بولۋ قاجەت, ياعني شىعىستاردى بiرشاما ازايتۋ كەرەك. يميدجدiك سيپاتتاعى شىعىنى كوپ جوبالارعا قارجى بولۋدi توقتاتۋدى دا قاراستىران جون. سەبەبi, كەيiنگi جىلدارى بيۋدجەتتiڭ تۇسiمiنەن گورi شىعىسى جوعارى قارقىنمەن ارتىپ كەلەدi.

«بiز كۆازيمەملەكەتتiك سەكتور تاراپىنان بيۋدجەت تابىسىن ۇلعايتۋ بويىنشا ۇلكەن جۇمىستى كۇتۋگە قۇقىلىمىز. ۇلتتىق كومپانييالار تۇسiم اكەلۋدiڭ ورنىنا تۇتىنۋ جاعىن ارتتىرۋعا بەيiم. مەملەكەت باسشىسى اتاپ كورسەتكەندەي, بيۋدجەتتiك ۇدەرiس قاراجاتتى بارىنشا ۇنەمدەۋ كوزقاراسىمەن جۇرگiزiلiپ, بارلىق شەشiمدەر ۇزاق مەرزiمگە ارنالعان مۇددەلەردiڭ تۇرعىسىنان ەكونوميكالىق پراگماتيزمگە نەگiزدەلە وتىرىپ قابىلدانۋى تيiس. ۇكiمەت بولiنگەن قاراجاتتىڭ يگەرiلمەي قالۋىنا جول بەرمەۋ ماقساتىندا ەلەۋلi جۇمىس جۇرگiزۋi كەرەك. بيۋدجەتتiڭ تاپشىلىعى احۋالىندا قاراجاتتىڭ تۇراقتى تۇردە يگەرiلمەۋi جاعدايلارىنا مۇلدەم جول بەرiلمەۋi قاجەت. بiزدiڭ الدىمىزدا بيۋدجەتتi جوسپارلاۋ ۇدەرiسiن ارتتىرۋ جونiندەگi ناقتى شارالاردى توقتاتپاي, جالعاستىرۋ مiندەتi تۇر», – دەدi توقاەۆ.

سەنات توراعاسىنىڭ ايتۋىنشا, قازiرگi ۋاقىتتا رەسپۋبليكالىق بيۋدجەت كiرiسiنiڭ ەداۋiر بولiگiن, بۇل – 46 پايىز, ۇلتتىق قوردان بولiنەتiن ترانسفەرت قۇراپ وتىر. بۇل بيۋدجەتتiڭ مۇنايدان تۇسەتiن تۇسiمدەرگە ايتارلىقتاي تاۋەلدi ەكەندiگiن كورسەتەدi. بۇگiندە الەمدە شيكiزاتقا دەگەن جوعارى باعانىڭ كەزەڭi اياقتالدى. جانە تاياۋ جىلدارى وعان قايتىپ ورالۋدىڭ مۇمكiندiگi بايقالمايدى.

«بيۋدجەتتiڭ مۇناي باعاسىنا تاۋەلدiلiگiن تومەندەتۋ, سالىقتىق اكiمشiلەندiرۋدi جاقسارتۋ, بيۋدجەت شىعىستارىن وڭتايلاندىرۋدىڭ قۇرىلىمىنا كوشۋ جونiندەگi جۇمىستار جالعاسىن تابۋى قاجەت», – دەدi ق.توقاەۆ.

قىمبات ەلتايقىزى
Baq.kz

 

 

بولىسۋ:

پىكىر جازۋ


*