قۇرىلىستى كوميسسييا تەكسەردى

209
0
بولىسۋ:

«نۇرلى جول» باعدارلاماسى بويىنشا سالىنىپ جاتقان قۇرىلىستىڭ ارقايسىسى «نۇر وتان» پارتيياسىنىڭ تاراپىنان قاتاڭ باقىلاۋعا الىنعان. وسىعان بايلانىستى الەۋمەتتىك ينفراقۇرىلىمدى دامىتۋ باعىتىنداعى كوميسسييا مۇشەلەرى اقتوبەدە بوي كوتەرىپ جاتقان مەكتەپ پەن بالاباقشاعا بارىپ, ونداعى قۇرىلىس ساپاسىمەن تانىستى.

اقتوبەدە «نۇرلى جول» باعدارلاماسى بويىنشا الەۋمەتتىك نىسانداردىڭ قۇرىلىسى قارقىندى جۇرىپ جاتىر. ماسەلەن, قالاداعى «باتىس – 2» اۋدانىندا ەكى مەكتەپتىڭ قۇرىلىسى وتكەن جىلى باستالدى. بىرى – 600, ەكىنشىسى 320 ورىندى. ەكەۋى دە زامان تالابىنا ساي بىلىم ورداسى بولادى دەگەن ۇمىت بار.
– الەۋمەتتىك ينفراقۇرىلىمدى دامىتۋ باعىتى بويىنشا, بىز مەكتەپ پەن بالاباقشا قۇرىلىسىن تەكسەردىك. كوميسسييا قۇرامىندا دەپۋتاتتار مەن ۇكىمەتتىك ەمەس ۇيىم وكىلدەرى بار. بيىل بىز تورت قۇرىلىستى قاداعالاۋعا الامىز. ەكى نىسان – «باتىس – 2» اۋدانىندا, وزگەسى باۋىرلاستار مەن كەڭەس نوكين اۋىلىندا ورنالاسقان. وتكەن جىلدىڭ قاراشا ايىندا باستالعان قۇرىلىس بيىل قىركۇيەكتە تولىق اياقتالادى. تەكسەرۋ كەزىندە قۇرىلىس كەستەگە ساي جۇرىپ جاتقانى انىقتالدى. قاجەتتى قارجى ۋاقىتىلى بەرىلدى», – دەدى الەۋمەتتىك ينفراقۇرىلىمدى دامىتۋ كوميسسيياسىنىڭ تورايىمى جەڭىسگۇل مۇحامبەتپايىزوۆا.
«باتىس – 2» اۋدانىنداعى 600 ورىندى مەكتەپتىڭ قۇرىلىسىنا 1,5 ميلليارد تەڭگەگە جۋىق قارجى بولىندى. 320 ورىندى بىلىم ورداسىنىڭ قۇرىلىسى 692 ملن 271 مىڭ تەڭگەنى قۇرايدى. وعان قوسا, سازدى اۋىلىن­دا – 600, كەڭەس نوكين اۋىلىندا 320 ورىندى مەكتەپتەر بوي كوتەرۋدە. بارلىق قۇرىلىس نىساندارى وتكەن جىلدىڭ قاراشاسىندا باستالعان. جاڭا وقۋ جىلىندا پايدالانۋعا بەرىلەدى.
– قۇرىلىس كەستەسىندە كىدىرىس جوق, تاپسىرمانىڭ بارى ۋاقىتىلى ورىندالىپ جاتىر. ماتەريالدار تۇگەل قازاقستاندا جاسالعان. قۇرىلىس جۇمىستارى ۋاقىتىلى اياقتالادى, – دەدى 600 ورىندى مەكتەپتىڭ قۇرىلىسىنا جاۋاپتى مامان الەكسەي مارتىنەنكو.
بۇل جەردە قازىر 120 ادام جۇمىس ىستەۋدە. ولاردىڭ بارلىعى دا عيماراتتىڭ ساپالى بولۋىنا كۇش سالۋدا. قۇرىلىس قارقىنى الداعى ۋاقىتتا «نۇر وتان» پارتيياسى تاراپىنان تۇراقتى قاداعالاناتىن بولادى.

التىناي ساعىندىقوۆا,
اقتوبە وبلىسى

بولىسۋ:

پىكىر جازۋ


*