وزبەكستان ەلشىلىگىنىڭ وكىلدىگىن اشۋدى سۇرادى

104
0
بولىسۋ:

قازاقستانعا كەلەتىن شەتەلدىك ميگرانتتار لەگى ەلەۋلى تۇردە ارتىپتى. بۇل تۋرالى «نۇر وتان» پارتيياسىنىڭ فراكتسيياسى جا­نىنداعى ەكونوميكالىق ساياسات جونىندەگى كە­ڭەس پەن ماجىلىستىڭ الەۋمەتتىك-مادەني دامۋ كوميتەتى وتكىزگەن بىرلەسكەن وتىرىسىندا حابارلاندى.
جيىنعا «ىشكى جانە سىرتقى كوشى-قون ماسەلەلەرى» تاقىرىبى ارقاۋ بولدى. «نۇر وتان» فراكتسيياسى جانىنداعى اتالعان كەڭەس توراعاسى ب.مامراەۆ مەملەكەت باسشىسىنىڭ «قازاقستاننىڭ ۇشىنشى جاڭعىرۋى: جاھاندىق باسەكەگە قابىلەتتىلىك» اتتى جولداۋىندا قويىلعان «ەڭبەك نارىعىن جاڭعىرتۋ» بويىنشا كەشەندى مىندەتتى ىسكە اسىرۋ اياسىندا قاراستىرىلىپ وتىرعان ماسەلەنىڭ ماڭىزدىلىعىن اتاپ وتتى.
وتىرىستا جارييا ەتىلگەندەي, ميگراتسييا اۋقىمى ارتۋدا. ماسەلەن, 2015 جىلعا قا­را­­عاندا, وتكەن جىلى ىشكى كوشى-قون 25 پايىز­عا, سونداي-اق ەلىمىزدە تىركەلگەن شەتەل ازا­مات­تارىنىڭ سانى دا 25 پايىزعا ارتىپتى. بۇل رەتتە شەتەلدىك ميگرانتتار جاساعان قۇ­قىق­­بۇزۋشىلىق كولەمى 5,9 پايىزعا وسكەن كورىنەدى.
سونىمەن بىرگە, قاتىسۋشىلار «جوعارى بىلىكتى مامانداردىڭ شەت ەلدەرگە كەتۋ ۇردىسىنىڭ ورىن الىپ وتىرعانىنا» نازار اۋداردى.
زاڭسىز ميگراتسييانىڭ قانداي اۋقىم العانىن تۇسىنۋ ۇشىن بىرلەسكەن وتىرىستا بىر مىسال كەلتىرىلدى. وڭتۇستىك قازاقستان وبلىسىنىڭ اكىمدىگى ماجىلىسكە وتىنىشپەن جۇگىنگەن ەكەن. وندا وقو باسشىلىعى وزبەكستان رەسپۋبليكاسىنىڭ قازاقستانداعى ەلشىلىگىنىڭ وكىلدىگىن شىمكەنت قالاسىندا نەمەسە سارىاعاش قالاسىندا اشۋعا جاردەمدەسۋدى سۇرايدى. بۇل – قولدانىستاعى ۇلتتىق زاڭناماعا سايكەس, كەيىن ەلىمىزدەن شىعارىپ جىبەرۋ ۇشىن «ەشقانداي قۇجاتى جوق جانە جەكە كۋالىگىنىڭ مەرزىمى اياقتالعان وسى ەل ازاماتتارىن قۇجاتتاندىرۋ» ۇشىن قاجەت كورىنەدى.
دەپۋتاتتار جۇمىس كۇشى شەكتەن تىس كوپ وڭىرلەردەن تۇرعىنداردى ەڭبەك قولىنان تاپشىلىق كورىپ وتىرعان اۋداندارعا كوشىرۋ باعىتىنداعى مەملەكەتتىك ورگانداردىڭ جۇمىسىنىڭ جەتكىلىكسىزدىگىن نۇسقادى. اتاپ ايتقاندا, ەل ۇكىمەتى وتكەن جىلعا 463 وتباسىنى كوشىرۋ بويىنشا كۆوتا بەكىتىپتى. الايدا جىل بويى جۇمىس كۇشى تاپشى وڭىرلەرگە نەبارى 196 وتباسى كوشىرىلگەن. ياعني, جوسپار تەك
42 پايىزعا ورىندالىپتى.
وسىعان بايلانىستى جيىندا سولتۇستىك قازاقستان وبلىسى ۇشىن كۆوتانى ۇلعايتۋ تۋرالى ۇسىنىس ايتىلدى. سەبەبى, بۇل وڭىردە اتالعان جۇمىسقا لايىقتى كوڭىل بولىنۋدە.
پاۆلودار وبلىسىنىڭ تىرلىگى سىنعا ۇشىرادى, ويتكەنى بىلتىرعى جىلى بۇل وڭىر وزىنە بولىنگەن 199 وتباسىلىق كۆوتا اياسىندا بار-جوعى 6 وتباسىنى عانا قابىلدادى.
دەپۋتاتتار سونداي-اق ەتنيكالىق قازاقتاردى قابىلداۋ, ولارعا قازاقستان ازاماتتىعىن بەرۋ كەزiندە قۇقىقتىق راسىمدەردى وڭايلاتۋ جانە ورالمانداردى ەڭبەك كۇشى قاجەت ايماقتارعا قونىس اۋدارتۋ ماسەلەلەرى بويىنشا ويعا قونىمدى ۇسىنىستار بىلدىردى.
وتىرىس قورىتىندىسى بويىنشا تيىستى ۇسىنىستار قابىلداندى. ولار ناقتى شەشىمدەر قابىلداۋى ۇشىن ۇكىمەتكە باعىتتالادى.

ەلدوس سەنباي

بولىسۋ:

پىكىر جازۋ


*