سەمەيدىڭ بەينەسى زامانعا ساي

120
0
بولىسۋ:

شىعىسقا ساپارى اياسىندا ۇكىمەت باسشىسى باقىتجان ساعىنتاەۆ سەمەي قالاسىنا باردى. ەڭ الدىمەن, پرەمەر-مينيستر جەرگىلىكتى باسشىلىقپەن جانە جاۋاپتى مەمورگاندار جەتەكشىلەرىمەن بىرگە, قايتا قۇرىلىپ جاتقان سەمەيدىڭ حالىقارالىق اۋەجايىنىڭ قۇرىلىس جۇمىستارىن تەكسەردى. جەرگىلىكتى اۋە قاقپاسىنا قاتىستى بۇل جوبا «نۇرلى جول» مەملەكەتتىك باعدارلاماسى ارقاسىندا جۇزەگە اسىرىلۋدا. 

وبلىس اكىمىنىڭ ورىنباسارى س.اقتانوۆ ۇكىمەت جەتەكشىسىنە اۋەجاي­دىڭ قايتا جوندەلۋ جۇمىسى تۋرالى باياندادى. ونىڭ مالىمەتىنشە, ۇشىپ-قونۋ جولاعى 2,7 شاقىرىمنان 3,3 شا­قىرىمعا دەيىن ۇزارتىلادى, جاڭا «اپات­تان قۇتقارۋ ستانساسى» تۇرعىزىلادى جانە كوممۋنيكاتسييانىڭ بارلىق تۇرى الماستىرىلادى. بۇدان وزگە ب.ساعىنتاەۆقا اۋەجايدىڭ قاۋىپسىزدىك جۇيەسىنىڭ جۇمىستارى تۋرالى ەسەپ بەرىلدى.
وسىدان كەيىن استانالىق جوعارى لاۋازىم­دى تۇلعالار دەلەگاتسيياسى قالانىڭ سول جاعا­لاۋداعى بارلىق تۇرعىن ۇي مەن اكىمشىلىك عيماراتتىڭ 70%-ىن جىلۋ جانە جارىقپەن قامتاماسىز ەتىپ وتىرعان ستراتەگييالىق نىسانعا بەت الدى. سەمەيدىڭ «جەو-1»-ى دە قايتا قۇرىلۋدا ەكەن. سونداي-اق پرەمەر-مينيستر وڭىردىڭ باسىمدىقتى جوبالارىنىڭ بىرى – جەو-3-تىڭ قۇرىلىس جۇمىستارى تۋرالى ەسەپتى دە تىڭدادى. قازىرگى ۋاقىتتا جوبا بويىنشا تەحنيكالىق-ەكونوميكالىق نە­گىز­دەمە ازىرلەنگەن جانە مەملەكەتتىك ساراپ­تامادان قورىتىندى الىنعان. جوبانى ىسكە اسىرۋ جەرگىلىكتى وندىرىستەردىڭ ارى قاراي دامۋىنا, سونىڭ ىشىندە «قاراجىرا» كەن ورنىنان كومىر وندىرۋدىڭ ارتۋىنا ىقپال ەتەدى.
ساپار اياسىندا باقىتجان ساعىنتاەۆ سەمەي قالاسىنداعى نازارباەۆ زيياتكەرلىك مەكتەبىندە بولدى. دارىندى بالالارعا ارنالعان بىلىم ورداسىنىڭ جاڭا عيماراتى 2016 جىلدىڭ سوڭىندا پايدالانۋعا بەرىلىپتى. پرەمەر-مينيستر وزىن-وزى تانۋ, نانوتەحنولوگييا, بيوتەحنولوگييا كابي­نەت­تەرىن, قىش قۇمىرا شەبەرحاناسىن, اسحانا مەن كىتاپحانانى ارالادى. مەكتەپ ديرەكتورى ب.قايىرجانوۆ وقۋ ورىننىڭ جەتىستىكتەرى تۋرالى ايتتى.
نىساننىڭ ەرەكشەلىگى, 720 وقۋشىعا ارنالعان نەگىزگى وقۋ كورپۋسىنا 120 ورىنعا ارنالعان جاتاقحانا كورپۋسى جاپسارلاس ورنالاسقان. بۇل شالعايداعى اۋىلداردان كەلگەن دارىندى بالالارعا ينتەرناتتا تۇرىپ, وقۋعا مۇمكىندىك بەرەدى. مەكتەپ اشىلعالى جەتى جىلدىڭ ىشىندە ونى 466 تۇلەك بىتىرگەن. ولاردىڭ 34-ى – «التىن بەلگى» يەگەرى, 22-سى – ۇزدىك اتتەستات يەگەرى.
وسى كۇنى ۇكىمەت باسشىسى سەمەي قا­لا­سىنىڭ جۇرتشىلىعىمەن كەزدەستى. كەزدە­سۋدە وڭىردىڭ الەۋمەتتىك-ەكونوميكالىق دامۋىنىڭ وزەكتى ماسەلەلەرى تالقىلاندى. ب.ساعىنتاەۆ جينالعان قاۋىمعا قولعا الىنعان كونستيتۋتسييالىق رەفورمالاردىڭ مانىن تۇسىندىردى. قا­لا جۇرتشىلىعى ەلباسى جارييالاعان كونستيتۋتسييالىق رەفورما مەن جولداۋداعى مىندەتتەرگە قولداۋ كورسەتەتىندەرىن بىلدىردى.
جۇرتشىلىقپەن كەزدەسۋ اياسىندا سەمەي قالاسىنىڭ اكىمى ەرماك سالىموۆ, قالالىق ارداگەرلەر كەڭەسىنىڭ توراعاسى امانتاي دوعالاقوۆ, «سات ترانس» جشس ديرەكتورى نۇرلان بايبەكوۆ, ەلەكتروتەحنيكالىق كوللەدجدىڭ ديرەكتورى ازات سارپەكوۆ, سەمەيدىڭ №7 مەكتەپ-ليتسەيىنىڭ اعىلشىن تىلى مۇعالىمى مارينا ۋستيۋجانينوۆا, «قازاق تىلى» حالىقارالىق قوعامنىڭ ۆيتسە-پرەزيدەنتى ورال شارىپباەۆ, قالالىق ارداگەرلەر كەڭەسىنىڭ مۇشەلەرى ناسەن سەمباەۆ پەن دۇيسەن سۇلتانوۆ سوز سويلەدى.
كەزدەسۋ قورىتىندىسى بويىنشا باقىتجان ساعىنتاەۆ وبلىس پەن قالا باسشىلىعىنا وڭىردى ودان ارى الەۋمەتتىك-ەكونوميكالىق دامىتۋ ماسەلەلەرى جونىندە بىرقاتار ناقتى تاپسىرمالار بەردى.

ەرىك ەردەنوۆ

بولىسۋ:

پىكىر جازۋ


*