يميدجدىك شىعىنداردى قىسقارتۋدى ۇسىندى

125
0
بولىسۋ:

«يميدجدىك» دەپ اتالاتىن شارالاردى قارجىلاندىرۋدى قايتا قاراعان جون. سەنات توراعاسى قاسىم-جومارت توقاەۆ وسىنداي ۇسىنىس ايتتى. بۇل كۇنى جوعارى پالاتادا «تەڭگەرىمدى جانە اشىق بيۋدجەت – ەلدىڭ تابىستى جانە تۇراقتى الەۋمەتتىك-ەكونوميكالىق دامۋىنىڭ كەپىلى» اتتى پارلامەنتتىك تىڭداۋ وتتى.
ق.توقاەۆتىڭ بايلامىنشا, «بيۋدجەت شىعىستارى ابدەن ويلاستىرىلىپ, قاراجات شىن مانىندە مۇقتاج سالالارعا جىبەرىلۋگە تيىس». «شەكتەن تىس شىعىندارعا جول بەرىلمەۋى كەرەك. يميدجدىك سيپاتتاعى جوبالارعا جۇمسالاتىن ەداۋىر شىعىننىڭ كولەمىن ايتارلىقتاي قىسقارتىپ, مۇمكىن بولعان جاعدايدا, مۇلدەم توقتاتۋ قاجەت» دەدى ول.
ونىڭ ايتۋىنشا, مەملەكەتىمىزدىڭ سالىق ساياساتى دا قازىرگى زامانعى جاھاندىق سىن-قاتەرلەرگە جاۋاپ بەرۋگە تيىس. ەڭ الدىمەن, سالىق ساياساتى ىسكەرلىك بەلسەندىلىكتى ىنتالاندىرىپ, كىرىستەردىڭ ارتۋىنا ىقپال ەتىپ, شاعىن جانە ورتا بيزنەسكە قولداۋ كورسەتۋى قاجەت. سونداي-اق تيىمدىلىگى تومەن سالىقتىق جەڭىلدىكتەردى قايتا قاراۋ ماڭىزدى.
– كۆازيمەملەكەتتىك سەكتوردان بيۋد­جەت­تىڭ كىرىس بولىگىن ارتتىرۋ بويىنشا اي­تارلىقتاي قايتارىم كۇتۋىمىز زاڭدى. ۇلتتىق كومپانييالار تۇسىم اكەلۋدىڭ ورنىنا تۇتىنۋ جاعىن ارتتىرۋعا بەيىم. ۇكىمەت بولىنگەن قاراجاتتىڭ يگەرىلمەي قالۋ جاعدايلارىنا جول بەرمەۋ ماقساتىندا ەلەۋلى جۇمىس جۇرگىزۋگە تيىس. بيۋدجەتتىڭ تاپشىلىعى احۋالىندا قاراجاتتىڭ تۇراقتى تۇردە يگەرىلمەۋ جاعدايلارىنا مۇلدەم جول بەرىلمەۋى قاجەت, – دەدى قاسىم-جومارت كەمەلۇلى.
بىرقاتار ساراپشىلاردىڭ پىكىرىنە سىلتەمە جاساي وتىرىپ, سپيكەر «ۇلتتىق قوردىڭ قاراجاتىن پايدالانۋ اعىمداعى تۇيتكىلدەردى جەدەل شەشۋگە ارنالعان تۇراقتى قارجى كوزىنىڭ بولۋى ەسەبىنەن ۇزاق مەرزىمدىك بولاشاقتا ۇكىمەتتىڭ ەكونوميكالىق ساياساتىنىڭ تيىمدىلىگىن تومەندەتۋگە اكەلىپ سوعۋى مۇمكىن» ەكەندىگىن ايتتى.
– بىز ەل ەكونوميكاسىن وزگەشە جاعدايلارعا بەيىمدەپ دامىتۋدى, ەكونوميكالىق وسىمنىڭ جاڭا مودەلىن جاساۋدى جانە باسەكەلەستىك پەن نارىق جاعدايىندا «شامامىزعا قاراي» ومىر سۇرۋدى ۇيرەنۋگە تيىستىمىز. پرەزيدەنت ۇسىنعان ۇشىنشى جاڭعىرۋدىڭ ماقساتى دا وسى ستراتەگييالىق مىندەتتى كوزدەيدى, – دەدى سەنات توراعاسى.
قارجى مينيسترى ب.سۇلتانوۆتىڭ مالى­مەتىنشە, بيۋدجەت جونىندەگى حالىقارالىق ارىپ­تەستىك جۇرگىزەتىن بيۋدجەتتىڭ اشىقتىعىن زەرت­تەۋ ناتيجەسىندە, 2015 جىلى 102 ەلدىڭ ىشىن­دە قازاقستانعا 51 بالل بەرىلىپتى. بۇل رەت­تە ورتاشا الەمدىك كورسەتكىش – 45 بالل كورىنەدى.
مەملەكەتتىك اكىمشىلىك باقىلاۋدى ازايتۋ ماقساتىندا قارجى مينيسترلىگى «حالىقتىق باقىلاۋدى» بەلسەندى قولدانۋدا ەكەن. «حالىقتىق باقىلاۋ» تەتىگى «رەيدتىك» تەكسەرۋلەردى ساتىپ الۋشىلارعا تاپسىرۋعا مۇمكىندىك بەرەدى. ەندى كەز كەلگەن ساتىپ الۋشى ساتۋشىلار اراسىندا وزى «تابيعي ىرىكتەۋ» جۇرگىزەدى» دەدى ب.سۇلتانوۆ.
مينيستر الداعى جىلدارى بيۋدجەت تاپشىلىعىن جىو-نىڭ 1 پايىزى دەڭگەيىنە دەيىن تومەندەتۋ جوسپارلانىپ وتىرعانىن حابارلادى.
ەسەپ كوميتەتىنىڭ مۇشەسى ايگۇل مۇحامەتكارىم «رەۆيزورلاردىڭ» ەلوردادا «ەكسپو – 2017» جاھاندىق كورمەسىن ۇيىمداستىرۋشىلارعا تەكسەرۋمەن كەلە­تىندەرىن حابارلادى: «استانا ەكسپو – 2017» ۇلتتىق كومپانيياسىنا جانە باسقا دا كومپانييالارعا مەملەكەتتىك اۋديت جۇرگىزۋ جوسپارلانعان» دەدى ول.
پارلامەنتتىك تىڭداۋ بارىسىندا ۇلتتىق ەكونوميكا مينيسترى تيمۋر سۇلەيمەنوۆ, «اتامەكەن» ۇكپ باسقارما توراعاسىنىڭ ورىنباسارى نۇرجان التاەۆ, ماڭعىستاۋ وبلىسى اكىمىنىڭ ورىنباسارى شولپان يلمۇحانبەتوۆا جانە باسقالار بايانداما جاسادى.

 

ايحان شارىپ

 

بولىسۋ:

پىكىر جازۋ


*