شىمكەنتتە «ەڭلىكگۇل» ورتالىعى سالىنادى

564
0
بولىسۋ:

بۇل تۋرالى وڭتۇستىك قازاقستان وبلىسىنىڭ اكىمى جانسەيىت تۇيمەباەۆتىڭ توراعالىعىمەن شىمكەنت قالاسىنىڭ ساۋلەتتىك كەلبەتى بويىنشا وتكەن ماجىلىستە ايتىلدى. جيىنعا سالاعا قاتىسى بار باسقارما باسشىلارى مەن شىمكەنت قالاسى اكىمدىگىنىڭ تيىستى سالا جەتەكشىلەرى قاتىستى. بۇل تۋرالى وڭتۇستىك قازاقستان وبلىستىق اكىمشىلىلىگىنىڭ باسپاسوز قىزمەتى حابارلادى.

ايماق باسشىسى, ەڭ الدىمەن, شىمكەنت قالاسىن ارالاۋ بارىسىندا بولعان بىرقاتار كەمشىلىكتەرگە توقتالىپ, ارعىنبەكوۆ كوشەسى, تەمىرلان تاس جولى جانە باسقا كوشەلەردەگى ورىن الىپ جاتقان تۇرعىن ۇيلەردىڭ قاسبەتتەرى مەن اۋلالارىنىڭ ساۋلەتتىك كەلبەتتەرى تالاپقا ساي ەمەستىگىن, بىركەلكى ساۋلەتتىك ستيلدىڭ جوقتىعىنا نازار اۋداردى. سونداي-اق, باس جوسپار بويىنشا جاسالىپ جاتقان قۇرىلىس جۇمىستارىنىڭ جۇيەلىلىگىنىڭ تيىستى ماماندار تاراپىنان قاداعالانباۋىنىڭ سالدارىنان قالا كەلبەتىنىڭ كەلەڭسىز جاعدايدا قالىپ وتىرعانىن اتاپ وتتى. ار باسقارما وز سالاسىنا قاتىستى تيىستى جۇمىستارىن ۋاقىتىلى جانە ساپالى اتقارۋى قاجەتتىگىن تالاپ ەتتى.

–شىمكەنت قالاسىنىڭ باس جوسپارىنداعى تۇجىرىمداماعا سايكەس, قالا اۋماعىندا جۇرگىزىلىپ جاتقان قۇرىلىس نىساندارىنىڭ باستى باعىتتارىن انىقتاپ, بىر جۇيەگە تۇسىرۋ امالدارىن قاراستىرۋ بۇگىنگى ماجىلىستىڭ كۇن تارتىبىنە قويىلعان. د.قوناەۆ گۇلزارىن تاشكەنت باعىتىنا شىعارۋ, قالا ورتالىعىنداعى قوشقار اتا وزەنىنىڭ بويىن اباتتاندىرۋ جانە «ەسكى قالاشىق» اۋماعىن رەتتەۋ جۇمىستارىنىڭ بارىسىندا انىقتالعان ماسەلەلەر وسىنداي ماجىلىستەردە تالقىلانىپ, وڭ شەشىمىن تابۋى تيىس. قازىرگى تاڭدا قالالىق قالا قۇرىلىسى كەڭەسىنىڭ جانە وبلىستىق قالا قۇرىلىسى كەڭەسىنىڭ اراسىندا بولىپ جاتقان الشاقتىقتىڭ سالدارىنان جوعارىدا ايتىلعان كەمشىلىكتەر ورىن الىپ وتىر. وسىعان بايلانىستى, وبلىستىق قالا قۇرىلىسى كەڭەسىنىڭ قۇرامىن قايتا قاراپ, جۇمىسىن جانداندىرۋ بىرىنشى كەزەكتەگى ماسەلە, – دەدى ج.تۇيمەباەۆ.

باسقوسۋدا ايماق باسشىسى جوعارىدا ايتىلعان ماسەلەلەردىڭ ماڭىزدىلىعىن ەسكەرە وتىرىپ, رەسپۋبليكامىزدىڭ باسقا قالالارىندا, اسىرەسە, استانا جانە الماتى قالالارىندا ىسكە اسىرىلىپ جاتقان زاماناۋي ساۋلەتتىك جوبالاردىڭ اۆتورلارىن وڭىرگە شاقىرىپ, تاجىريبە الماسۋ جۇمىستارىن جولعا قويۋ قاجەتتىگىن ەسكەرتتى.

وسى تۇرعىدا الماتىدان ارنايى شاقىرىلعان «ەففەكت» جشس-نىڭ ديرەكتورى جاندوس نۇربەكوۆتىڭ 3D فورماتىنداعى ەكى جوباسىنىڭ بەينەروليگى تانىستىرىلدى. ولاردى تالقىلاۋ بارىسىندا  «ەڭلىكگۇل» گۇلىنە ۇقساس ەتىپ جاسالعان ويىن-ساۋىق ورتالىعىنىڭ (اۋماعى 4-6 گەكتار جەردى قامتيدى) جوباسىن شىمكەنت قالاسىندا, اتاپ ايتقاندا, بۇگىنگى تاڭدا يگەرىلىپ جاتقان «تۇران» شاعىن اۋدانىنا سالۋ ۇسىنىلدى. ال تاريحي-ەتنوگرافييالىق تۋريستىك نىسان رەتىندە تازا قازاق اۋىلىن ەلەستەتەتۋدى ماقسات تۇتىپ, كورسەتىلگەن ەكىنشى جوبانى تۇركىستان قالاسىنا سالۋدىڭ  مۇمكىندىگىن قاراستىرۋ تاپسىرىلدى.

ايتا كەتەتىن جاعداي, ەڭلىكگۇل ۇلگىسىندەگى مۇنداي نىسان تمد ەلدەرىندە جوق. ال تۇركىستاندا سالىنۋى تيىس جوبانىڭ ەرەكشەلىگى – ونىڭ باعزى زاماننىڭ شىنايى كورىنىسىن قالىپتاستىرۋىندا. ياعني, رۋحاني استانادا اتالعان جوبا بوي كوتەرەتىن بولسا, اۆتوكولىك, ەلەكتر باعانالارى سيياقتى بۇگىنگى وركەنيەتتىڭ قاجەتتىلىكتەرى بولمايدى.

كەزدەسۋدە شىمكەنت قالاسىنىڭ اكىمى عابيدوللا ابدىراحىموۆ شاھاردىڭ ساۋلەتتىك كەلبەتى بويىنشا بايانداما جاساپ, شىمكەنت قالاسى باس جوسپارىنىڭ وزەكتەندىرۋ جۇمىستارىنىڭ 1- جانە 2- كەزەڭى ورىندالىپ قابىلدانعانىن, ەندى 3- كەزەڭنىڭ جۇمىستارىن جۇرگىزۋ 2017 جىلدىڭ ناۋرىز ايىنا جوسپارلانعانىن جەتكىزدى.

 

ەركىن قالدان

بولىسۋ:

پىكىر جازۋ


*