ەلدى «تۇركىمەندەرشە باسقارۋ»

718
0
بولىسۋ:

2006 جىلى تۇركىمەنباسشى اتانعان  ساپارمۇرات نييازوۆ كەنەتتەن  قايتىس  بولعان  سوڭ,  ونىڭ ورنىنا  تاققا  وتىرعان گۋربانگۋلى بەردىمۇحاممەدوۆتى جۇرت وزگەشە كوزقاراستاعى  پرەزيدەنت  بولادى دەپ ۇمىت ەتكەن-دى. تىپتى  ول اۋ  باستا  وسى  جۇرتتىڭ سەنىمىن اقتاعانداي  دا  بولعان. نييازوۆتان   قالعان  دۇنيەلەردى وزگەرتتى. سول العاشقى پرەزيدەنتتىڭ  تۋعاندارى اتىنداعى   اي اتتارىن باياعى قالپىنا  كەلتىردى. نييازوۆتىڭ  التىننان قۇيىلعان ەسكەرتكىشىن الدىردى. بىر سوزبەن ايتقاندا, تۇركىمەنستانعا  جاڭعىرۋ  كەزەڭىن  الىپ كەلگەندەي  بولعان. بىراق مۇنىڭ بارى  الدامشى  دۇنيە ەكەنىن   تۇركىمەندەر كەيىننەن بىلدى. جۇرە  كەلە  ول دا  العاشقى پرەزيدەنتتىڭ   سالىپ  كەتكەن  داڭعىل  جولىنا  تۇستى.  بىرنەشە  مارتە كونستيتۋتتسييادا  وزگەرتۋلەر  بولدى. ول  وزگەرتۋلەر  گۋربانگۋلى بەردىمۇحاممەدوۆتىڭ  ماڭگى   ەل  باسقارۋىنا جول اشتى. «ارقاداع»  (جارىلقاۋشى, قامقورشى)  دەگەن  ات يەلەندى. وسىلايشا بۇل ەلدە  تاعى دا نييازوۆتىڭ  جەكە  باسىنا  تابىنعانداي  بەردىمۇحاممەدوۆتىڭ جەكە بيۋاسىنا  تابىنۋ  باستالدى.

«تۇركىمەنستان پرەزيدەنتى گۋربانگۋلى بەردىمۇحاممەدوۆ رەجيمىندە جەكە باسقا تابىنۋ اسقىنا تۇستى. جاقىندا ونىڭ اناسىنا ارنالعان ان شىقتى. ان اۆتورلارى پرەزيدەنتتىڭ شەشەسىن «حالقىمىزعا ۇلى كوسەم جانە قورعاۋشى سىيلاعانىڭىزعا راحمەت» دەپ ماداقتايدى. بەردىمۇحاممەدوۆ بيلىككە كەلگەن سوڭ ەل استاناسىندا ونىڭ قۇرمەتىنە التى مەترلىك ەسكەرتكىش سوعىلدى. وندا پرەزيدەنت سۇيىكتى بايگە اتىنا مىنىپ تۇر. ەسكەرتكىش 20 مەتر بيىك الىپ اق مارمەر تۇعىرعا قويىلعان.پرەزيدەنت اتىندا مەشىت پەن ساياباق بار, ونىڭ پورترەتى ەلدىڭ بارلىق ايماعىنداعى بيلبوردتارعا ىلىنگەن. اكەسى دە سىي-قۇرمەتكە بولەنىپ ۇلگەردى – مالىكقۇلى بەردىمۇحاممەدوۆ اتىندا ىشكى ىستەر مينيسترلىگىنىڭ اسكەري بولىمى بار, ونىڭ عيماراتىنىڭ الدىندا مالىكقۇلى مىرزانىڭ ەسكەرتكىشى تۇر. پرەزيدەنتتىڭ اتاسى – بەردىمۇحاممەد انناەۆقا دا ەسكەرتكىش ورناتىلعان, ول وزى مۇعالىم بولىپ ىستەگەن اۋىل مەكتەبىنىڭ الدىندا تۇر»  دەپ جازادى «ازاتتىق راديوسى».  دەمەك

گۋربانگۋلىدا   ەلدى  جەكەدارا  بيلەۋدى  مانسۇق  ەتكەنى بەلگىلى  بولىپ  قالدى. ال  وزىنە  ەسكەرتكىش  تۇرعىزۋ, تۋعان-تۋىستارىن  دارىپتەۋ  سونىڭ بىر كورىنىسى  بولسا كەرەك-تى. كەزىندە  كەڭەس زامانىندا پرولەتاريات كوسەمى  لەنين  جونىندە «ۇيىمىزدە, تورىمىزدە  پورترەتتە  تۇرعان كىم, ول- لەنين دانامىز,  ول-لەنين بابامىز»  دەپ جىرلانىپ جاتۋشى  ەدى. ەندىگى   سونداي ان ايتىپ, جىر جىرلاۋ  كەزەگى تۇركىمەنستان  حالقىنا  دا جەتكەندەي.

اينۇر قازىكەنوۆا

بولىسۋ:

پىكىر جازۋ


*