ەلشى الفا ۋنيۆەرسيتەتىندە دارىس وقىدى

463
0
بولىسۋ:

بەلگراد قالاسىندا قازاقستان رەسپۋبليكاسىنىڭ ەلشىسى نۇرباح رۇستەموۆ سەربيياداعى ەڭ ۇزدىك جوعارى وقۋ ورىندارىنىڭ بىرى – الفا بك ۋنيۆەرسيتەتىندە مەملەكەتىمىزدىڭ قازىرگى دامۋىنا جانە قازاقستان مەن سەربييا اراسىنداعى ىنتىماقتاستىقتىڭ كەلەشەك باعىتتارىنا ارنالعان دارىس وقىدى.

اتالعان, ىس-شاراعا سەربييا پارلامەنتىنىڭ دەپۋتاتتارى, مينيسترلىكتەر جانە مەكەمەلەر, ىسكەر جانە قوعامدىق – ساياسي توپتار, جەرگىلىكتى بۇقارالىق اقپارات قۇرالدارى, سوڭداي-اق ديپلوماتييالىق كورپۋستىڭ وكىلدەرى قاتىستى.

دارىس بارىسىندا ەلشى سەرب اۋديتوريياسىن قازاقستانداعى الەۋمەتتىك-ەكونوميكالىق احۋال, «قازاقستاننىڭ ۇشىنشى جاڭعىرۋى: جاھاندىق باسەكەگە قابىلەتتىلىك» اتتى  ەلباسىنىڭ قازاقستان حالقىنا جولداۋىنىڭ نەگىزگى باعىتتارى مەن ەلدەگى كونستيتۋتسييالىق رەفورمالار, سونداي-اق قازاقستاننىڭ بۇۇ قاۋىپسىزدىك كەڭەسىندەگى اتقارىپ جاتقان قىزمەتى تۋرالى جانە ەكسپو-2017 حالىقارالىق كورمەسىنە دايىندىقتىڭ بارىسى تۋرالى بايانداپ بەردى.

ەكى جاقتى قاتىناستاردىڭ جالپى سيپاتىنا جوعارى باعا بەرە وتىرىپ, نۇرباح رۇستەموۆ ەكى ەل پرەزيدەنتتەرىنىڭ وزارا رەسمي ساپارلارى قازاقستان مەن سەربييا اراسىنداعى قالىپتاسقان ديالوگتى تەرەڭدەتۋدىڭ ايقىن ايعاعى بولىپ تابىلاتىنىن اتاپ وتتى.

وز كەزەگىندە ۋنيۆەرسيتەت رەكتورى سلاۆكا ۆۋكشا قازاقستاننىڭ بەيبىت جانە يادرولىق قاۋىپسىزدىكتى نىعايتۋ جونىندەگى كۇش-جىگەرىنە, سونداي-اق ەلدەگى ارتۇرلى دىن جانە ۇلت وكىلدەرىنىڭ بەيبىت قاتار ومىر سۇرۋىنە باعىتتالعان مەملەكەت باسشىسىنىڭ ساياساتىنا جوعارى باعا بەردى. بۇدان بۇرىن الفا بك ۋنيۆەرسيتەتىندە 40 قازاق ستۋدەنتتەرى وقىعانىنا وراي, بىلىم سالاسىنداعى ەكى جاقتى ىنتىماقتاستىقتى جانداندىرۋ تۋرالى ۋاعدالاستىققا قول جەتكىزىلگەن.

ەركىن قالدان

بولىسۋ:

پىكىر جازۋ


*