گولوۆكيننىڭ قارقىنى باسەڭدەپ قالعانى راس پا?

609
0
بولىسۋ:

مەملەكەت باسشىسى نۇرسۇلتان نازارباەۆ گەنناديي گولوۆكينگە WBA (Super), WBC, IBO جانە IBF تۇجىرىمدارى بويىنشا كاسىپقويلار اراسىنداعى بوكستان الەم چەمپيونى اتاعىن قورعاپ قالۋىنا بايلانىستى قۇتتىقتاۋ حات جولدادى.

قازاقستان پرەزيدەنتى نۇرسۇلتان نازارباەۆ گولوۆكيننىڭ قارىمدى قارسىلاسپەن جانتالاسقان جەكپە-جەكتە اسقان شەبەرلىك, قاجىماس قايرات جانە ناعىز سپورتشىعا تان مىنەز كورسەتىپ, چەمپيوندىق اتاقتارىن تاعى دا لايىقتى قورعاپ قالعانىن اتاپ وتتى.

–سەنىڭ جەڭىسىڭ بارشا قازاقستاندىقتارعا زور قۋانىش سىيلاپ, ولاردىڭ جۇرەگىن ەلىمىزگە جانە وتاندىق بوكس مەكتەبىنە دەگەن ماقتانىش سەزىمىنە بولەدى, – دەلىنگەن قۇتتىقتاۋدا.

سوڭىندا نۇرسۇلتان نازارباەۆ گەننناديي گولوۆكينگە مىقتى دەنساۋلىق تىلەپ, سپورتتا جاڭا جەتىستىكتەرگە جەتۋىنە نيەتتەستىك بىلدىردى.

راسىندا وسى ۋاقىتقا دەيىن جويقىن سوققىسىمەن دۇنيەنىڭ قوشەمىنە بولەنگەن گەنناديي گولوۆكين كەشە ادۋىندى قارسىلاسىن جەڭىپ, وزىنىڭ مىقتى ەكەنىن قالىڭ جۇرتشىلىققا تاعى بىر دادەلدەپ بەردى.

بىراق جەرلەسىمىز جەڭىسكە جەتكەنىمەن, پىكىرلەر شوعىرى الۋان تۇرلى بولىپ تۇر. وعان ابدەن نوكاۋتقا ۇيرەنىپ قالعان بوكسسۇيەر قاۋىمنىڭ كوزقاراسى  سەبەپ بولسا كەرەك. ەكىنشىدەن, دەنيەل دجەيكوبستىڭ باسپاسوز كونفەرەنتسيياسىندا ايتقان پىكىرلەرى دە وتقا ماي قۇيعانداي اسەر ەتتى.

–ماعان گەنا كۇتپەگەن جاعداي جاساي العان جوق. مەن وزىمدى جەڭىمپازبىن دەپ سانايمىن. بۇل  – بوكس, مەنىڭ جۇمىسىم. كەيدە ۇتىلاسىڭ, كەيدە ۇتاسىڭ. سوندىقتان مەنىڭ جۇلدىزدى ساتتەرىم الى الدا. ال بۇگىنگى جەكپە-جەككە كەلەر بولساق, گولوۆكين دە, مەن دە 100 ەمەس, 110 پايىز دايىندىقتى كورسەتتىك. مەن وزىمە 100  پايىز cەنىمدى بولدىم. رينگتە بارىمدى كورسەتتىم. ونى گەنا دا بايقادى. مەن بۇل جەكپە-جەكتە  جەڭدىم دەپ ويلايمىن, بۇل پىكىرىممەن جانكۇيەرلەرىم دە كەلىسەدى جانە بۇل شەشىمگە قاتىستى مەنى قولدايدى دەپ ويلايمىن. مەن كەم دەگەندە ەكى راۋندتا جەڭدىم.  بار ايتا الاتىنىم – وسى جارىستا تورەشىلەردىڭ شىعارعان شەشىمىمەن   كەلىسۋ عانا. بىراق, بۇل جەكپە جەكتەن كەيىن حالىقتىڭ  ىقىلاسى كۇرت ارتتى, بىزدىڭ جانكۇيەرلەرىمىزدىڭ  قاتارى تاعى مىڭداعان ادامعا كوبەيدى.  – دەپ مالىمدەدى دجەيكوبس.

ال دەنيەو دجەيكوبستىڭ بۇل سوزىنە گولوۆكيننىڭ قايتارار ۋاجى قانداي?

–مەن ونىڭ كوزىن جويا المادىم, دەنيەل – وتە جاقسى بوكسشى. مەنىڭ رەكوردىمدى جەڭە العانى ۇشىن  ونى قاتتى سىيلايمىن. تەحنيكاسى بار, ەنەرگيياسى مىقتى. ول شارشى الاڭدا وتە جاقسى قيمىلدايدى. ول –جاقسى بوكسشى. مەن ونى تورتىنشى راۋندتا نوكداۋنعا جىبەردىم. بىراق ول وزىن جوعالتىپ العان جوق. ماعان 12 راۋندتىق جەكپە جەك كەرەك بولدى. بۇل جاقسى ايقاس جانە وتە مىقتى تاجىريبە بولدى. دەنيەلدى قۇرمەتتەيمىن. ول –مىقتى بوكسشى. بۇل مەن  ۇشىن ۇلكەن تاجىريبە. نوكداۋننان كەيىن مەن وتە ۇزاق كۇتىپ قالدىم. ماعان بىر عانا  «لاكي-پانچ»  كەرەك ەدى. بىراق, كەيدە بۇل قيىنعا سوعادى. دجەيكوبس – الەم چەمپيونى جانە تاماشا بوكسشى. بۇل تاماشا كەزدەسۋ بولدى. ەگەر دجەيكوبس مەنىمەن تاعى دا كەزدەسكىسى كەلەتىن بولسا, مەن ارقاشان دايىنمىن, – دەدى گولوۆكين.

جەكپە جەكتەن كەيىن بولعان باسپاسوز ماسليحاتىندا گەننادييدىڭ پروموۋتەرى توم لەففلەر «گولوۆكينمەن كەلىسىمشارت جاساسۋعا بارى قورقادى. سول سەبەپتى دە ونى وسى جولى  ادەيى وسال ەتىپ كورسەتتىك», – دەدى. بۇل قالجىڭ دا شىعار. ايتسە دە, گولوۆكيننىڭ ۇنەمى مەرزىمىنەن بۇرىن ورىن الاتىن جەڭىسىن كورىپ كەلە جاتقان جانە وعان بويى ۇيرەنىپ قالعان  كەيبىر سپورتشىلار مەن كورەرمەندەر بۇل جەڭىسكە كۇمانمەن قاراپ, وز كوزقاراستارىن بىلدىرىپ جاتىر.

وز كەزەگىندە  ارالاس جەكپە جەكتىڭ شەبەرى قۋات «نايمان» وزىنىڭ الەۋمەتتىك پاراقشاسىندا «GGG –عا بوكستان كەتۋ كەرەك. بۇل  – دجەيكوبستىڭ جەڭىسى.. قازىر دەنيەل لەۆيتتىڭ وليمپياداداعى كۇيىن كەشىپ جاتقان بولار» دەپ جازدى.

ال ايەلدەر اراسىندا كاسىپقوي بوكستاعى تۇڭعىش قازاقستاندىق بوكسشى فيرۋزا شاريپوۆا  tengrinews.kz پورتالىنا بەرگەن سۇحباتىندا «شىنىمدى ايتسام, كەزدەسۋ 12 راۋندقا دەيىن سوزىلادى دەپ ويلامادىم. التىنشى-جەتىنشى راۋندتاردا اياقتالادى دەپ بولجام جاساعان ەدىم. بىراق سوڭعى التى راۋند سۇمدىق جاعدايدا وتتى. گولوۆكين نەگىزىندە بىر ۇپاي ايىرماسىمەن جەڭدى, بىراق نوكداۋن بولماسا, تەڭ تۇسەر ەدى نەمەسە تىپتى جەڭىلىپ قالار ەدى. بۇل جەكپە-جەك گەنناديي گولوۆكيننىڭ مانساپ جولىنداعى ەڭ قيىن ارى جارقىن كەزدەسۋى بولدى. باپكەرلەر دجەيكوبسقا دجەبپەن جۇمىس تەۋدى جانە گولوۆكينگە باسىمدىق بەرىپ قويماۋدى بۇيىردى. بۇل گولوۆكيننىڭ چەمپيوندىعىنان سەسكەنبەي, دۇرىس جۇدىرىقتاسا بىلگەن ەڭ  اۋىر قارسىلاس بولدى. گولوۆكيننىڭ جەڭىسكە جەتىپ,  اتاعىن قورعاي العانىنا قۋانىشتىمىن» دەپ وز پىكىرىن بىلدىردى.
ال ۇش سالماق دارەجەسى بويىنشا بۇرىنعى الەم چەمپيونى شەين موزلي Vesti.kz پورتالىنا بەرگەن سۇحباتىندا «دەنيەل دجەيكوبس ۇلكەن جۇمىس اتقارعانىن رينگتە دالەلدەپ شىقتى. گولوۆكين سال عانا باسىمدىقپەن ۇتتى نەمەسە مۇنى تەڭ دارەجەدەگى ايقاس دەپ ايتۋعا بولادى. سوندىقتان بولاشاقتا رەۆانش كەرەك», – دەدى.

ال اعىلشىن جۋرناليسى لي كورملي  MediaSkunkWorks بەرگەن سۇحباتىندا

–بۇل شىن مانىندە قىزىقتى كەزدەسۋ بولدى. باسىندا جەكپە جەك تەپە-تەڭ جاعدايدا وتەدى دەپ ويلادىم. بىراق گولوۆكين 6-7 راۋندتا باسىمدىق گولوۆكينگە اۋا باستادى. مەنىڭ ەسەبىم بويىنشا از عانا باسىمدىقپەن جەڭىس دجەيكوبسكا بەرىلۋى كەرەك ەدى. بىراق تورەشىلەردىڭ شەشىمى باسقا بولىپ شىقتى. سوندىقتان ولارعا تورەلىك ايتا المايمىن. بىراق گولوۆكيننىڭ بۇل جولعى قارسىلاسى وتە مىقتى بولدى. تىپتى جەكپە جەكتىڭ سوڭعى جاعىندا گولوۆكين وزىن جوعالتىپ الا جازدادى -دەدى.

راسىندا دا كەشەگى ايقاستان كەيىن گولوۆكيننىڭ وڭايلىقپەن كەلمەگەن جەڭىسىنە  بايلانىستى ارتۇرلى پىكىرلەردىڭ شوعىرى ارتتى. قازاقستاننىڭ بەلگىلى سپورت جۋرناليسى دۇرالى دۇيسەباي اعامىز وزىنىڭ الەۋمەتتىك پاراقشاسىندا جازعان پىكىرىندە «گولوۆكين جەڭدى. وعان تالاس جوق. بىراق قالاي جەڭدى? ماسەلە – وسىندا. قازىر وسى سالماقتاعى بوكسشىنىڭ بارى گولوۆكينگە قارسى دايىندالادى. بىلايشا ايتقاندا, گەننادييدىڭ اربىر «جۇرىسىن»  قارسىلاستارى «وقىپ» قويعان سەكىلدى. ەگەر جەرلەسىمىز الدا وز تاكتيكاسىن قايتا قاراپ, تۇزەتۋ ەنگىزبەسە, قيىن بولا تۇسەتىنى انىق» دەپ جازدى. ال تاعى بىر ازامات نۇرتاي ەرنازار «گەنا قارتايىپ كەلەدى, بىر كۇنى تاقتان تايارى انىق. جەر ورتاعا كەلگەندە, تاكتيكا اۋىسا ما? مەنىڭشە, ودان تۇك شىقپايدى. ەندى شاماسى جەتكەن جەرگە دەيىن تىرىسىپ باققاننان باسقا امال جوق» ,-دەپ وز پىكىرىن بىلدىردى.

بىراق الى دە ۇمىتىمىزدى ۇزبەگەنىمىز ابزال. ال كەشەگى كەزدەسۋگە تاعى بىر ورالار بولساق,  Compubox جەكپە جەكتەگى سوققىلاردىڭ قورىتىندىلارىن شىعاردى. گولوۆكين بۇل ايقاستا 615 سوققى جاساعان, ونىڭ 231-ى دال تيگەن. ال دجەيكوبستىڭ 541 سوققىسىنىڭ  175-ى گولوۆكينگە دوپ تيگەن.

دەمەك قالاي ايتقاندا دا, جەرلەسىمىز گەنناديي گولوۆكيننىڭ باسىمدىعى بايقالىپ تۇر. سوندىقتان الداعى ۋاقىتتا دا گەنا قازاقستاننىڭ اتىن شىعارىپ, جەڭىستى جولدى جالعاستىرادى دەپ سەنەمىز.

بەرىك بەيسەنۇلى

 

بولىسۋ:

پىكىر جازۋ


*