باسىم باعىتتار ايقىندالدى 

716
0
بولىسۋ:

«نۇر وتان» پارتيياسى توراعاسىنىڭ بىرىنشى ورىنباسارى مۇحتار قۇل-مۇحاممەد پارتييانىڭ وبلىستىق فيليالدارى جانە دەپارتامەنت باسشىلارىمەن كەڭەيتىلگەن وتىرىس وتكىزدى. جيىن بارىسىندا 2016 جىل مەن 2017 جىلدىڭ بىرىنشى توقسانىندا اتقارىلعان جۇمىستاردىڭ قورىتىندىسى سوز بولدى. سونداي-اق الداعى ۋاقىتتاعى پارتييا جۇمىسىنىڭ باسىم باعىتتارى انىقتالدى.
الدىمەن مۇحتار قۇل-مۇحاممەد وتكەن جىلى پارتييانىڭ نەگىزگى كورسەتكىشتەرى ايتارلىقتاي جاقسارعانىن اتاپ وتتى. پارتييا وز قىزمەتىندە, نەگىزىنەن, كونستيتۋتسييالىق رەفورما, پرەزيدەنتتىڭ «قازاقستاننىڭ ۇشىنشى جاڭعىرۋى: جاھاندىق باسەكەگە قابىلەتتىلىك» اتتى حالىققا جولداۋى, «نۇرلى جول» ينفراقۇرىلىمدى دامىتۋ باعدارلاماسى, اگروونەركاسىپ كەشەنىن دامىتۋ مەملەكەتتىك باعدارلاماسى, ناتيجەلى جۇمىسپەن قامتۋدى جانە جاپپاي كاسىپكەرلىكتى دامىتۋ باعدارلاماسى, سونداي-اق «نۇرلى جەر» تۇرعىن ۇي قۇرىلىسى باعدارلاماسى سيياقتى كۇن تارتىبىندەگى ماڭىزدى ماسەلەلەرگە ەرەكشە كوڭىل بولىپ كەلەدى. ناتيجەسىندە, ورتالىق پەن ايماقتىق فيليالداردا جۇمىس جاندانا تۇسكەن.
مەملەكەت باسشىسىنىڭ ەلىمىزدىڭ الداعى باسىم باعىتتارىن ايقىنداپ بەرگەنىن ايتقان پارتييا توراعاسىنىڭ بىرىنشى ورىنباسارى: «بيىل ەلباسىمىز حالىققا ۇش بىردەي تاريحي باستاماسىن ۇسىندى. ونىڭ بىرىنشىسى – ەلىمىزدىڭ ساياسي جۇيەسىن جاڭعىرتۋعا ارنالعان كونستيتۋتسييالىق رەفورما. ەكىنشىسى – مەملەكەت باسشىسىنىڭ قازاقستان ەكونوميكاسىن جاڭا بيىكتەرگە باستايتىن بيىلعى جولداۋى. بۇل ەكى باستاماعا قاتىستى پارتييا تاراپىنان كوپتەگەن جۇمىستار اتقارىلدى. دەگەنمەن, اتالعان جۇمىستار تەك جىلدىڭ بىرىنشى توقسانىنا عانا تيەسىلى ەكەنىن ەستەن شىعارماۋىمىز كەرەك. ەلباسىنىڭ جولداۋى تۇتاس جىلدى قامتيتىندىقتان بىز بۇل باعىتتاعى جۇمىستاردى قالعان ۇش توقساندا دا جۇيەلىك كەستەگە سايكەس جالعاستىرۋعا تيىسپىز. ەلباسىنىڭ ۇشىنشى ۇلكەن باستاماسى – جاقىندا عانا جارييالانعان «بولاشاققا باعدار: رۋحاني جاڭعىرۋ» اتتى باعدارلامالىق ماقالاسى. رۋحانيياتىمىزدىڭ سەرپىندى دامۋىنا داڭعىل جول اشىپ بەرگەن ماقالا 2025 جىلعا دەيىنگى كەزەڭدى قامتيتىن ستراتەگييالىق ماڭىزى بار قۇجات. سوندىقتان حالىقتىڭ وزى ونداعى باستامالاردىڭ جۇزەگە اسۋىنا تىكەلەي مۇددەلى ەكەندىكتەرىن تانىتۋدا», – دەدى.
ەلباسىنىڭ بارلىق تىڭ باستامالارىن تۇسىندىرۋدە جانە جۇزەگە اسىرۋدا نۇروتاندىقتاردى حالىقپەن ەتەنە جۇمىس ىستەۋگە شاقىرعان مۇحتار قۇل-مۇحاممەد ار پارتييا مۇشەسى مەملەكەتتىڭ دامۋىنا وز ۇلەسىن قوسۋى كەرەكتىگىن تىلگە تيەك ەتتى. وسىعان وراي وڭىرلەردە اتقارىلعان جۇمىستاردىڭ ەسەبى تىڭدالدى. اتاپ ايتقاندا, «نۇر وتان» پارتيياسى الماتى قالالىق فيليالى توراعاسىنىڭ بىرىنشى ورىنباسارى جۇلدىز وماربەكوۆا وڭتۇستىك استانامىزداعى قولعا الىنعان جۇمىستارعا توقتالىپ وتتى. ونىڭ سوزىنە قاراعاندا, وتكەن جىلى فيليالداعى پارتييا مۇشەلەرى 18 مىڭعا كوبەيگەن. بيىلعى بىرىنشى توقساننىڭ وزىندە تاعى 1938 ازامات پارتييالىق بيلەتتەرىن قولىنا العان. ودان بولەك, ج.وماربەكوۆا دەپۋتاتتىق فراكتسييانىڭ قىزمەتى, پارتييالىق جوبالار بويىنشا جۇرگىزىلگەن جۇمىستار, قوعامدىق قابىلداۋدىڭ ناتيجەلەرى جانە تاعى باسقا بىرقاتار يگى ىستەردىڭ ناتيجەسى تۋرالى باياندادى.
جيىن بارىسىندا ەلىمىزدىڭ بىرقاتار ايماقتارىندا حالىقتى ابىگەرگە سالعان سۋ تاسقىنى دا نازاردان تىس قالمادى. وسىعان وراي قوستاناي وبلىستىق فيليالى توراعاسىنىڭ بىرىنشى ورىنباسارى عازيز بەكمۇحامەدوۆ وڭىردەگى جاعداي تۋرالى بايانداپ بەردى. سونداي-اق ول فيليالدىڭ وتكەن جىلى اتقارعان جۇمىستارىنا دا توقتالىپ وتتى.
«نۇر وتان» پارتيياسى توراعاسىنىڭ بىرىنشى ورىنباسارى پارتييانىڭ بارلىق فيليالدارىنا سۋ تاسقىنىنان زارداپ شەككەن تۇرعىندارعا بارىنشا كومەك كورسەتۋدى تاپسىرىپ: «بىز قاشاندا بىرلىگى بەكەم, ىنتىماعى جاراسقان, كىمگە دە بولماسىن قامقورلىق قولىن سوزۋعا دايىن حالىقپىز. بۇل جولى دا سىزدەردى قيىندىققا تاپ بولعان وتانداستارىمىزدىڭ جاعدايىنا بەي-جاي قارامايدى دەپ سەنەمىن. «نۇر وتان» پارتيياسى بۇل قايىرىمدى, ساۋابى مول ىستە كوپكە ۇلگى بولۋى تيىس. سۋ تاسقىنىنان زارداپ شەككەندەرگە قول ۇشىن سوزۋ – بىزدىڭ ازاماتتىق ابزال بورىشىمىز. سوندىقتان جەرگىلىكتى جەرلەردە وسى باعىتتاعى جۇمىستى جەدەل ارى جۇيەلى ۇيىمداستىرۋىمىز كەرەك», – دەدى.
پارتييانىڭ سايلاۋالدى باعدارلاماسىن جۇزەگە اسىرۋ بارىسى تۋرالى سوز العان «نۇر وتان» پارتيياسىنىڭ ورتالىق اپپاراتى ستراتەگييا جانە مونيتورينگ دەپارتامەنتىنىڭ ديرەكتورى سەرىك ساتيەۆ: «اتالعان باعدارلاما اياسىنداعى ماقسات-مىندەتتەرگە قول جەتكىزۋ ۇشىن وتكەن جىلدىڭ سوڭىندا جاڭادان ۇش باعدارلاما قابىلداندى. ولار: ناتيجەلى جۇمىسپەن قامتۋدى جانە جاپپاي كاسىپكەرلىكتى دامىتۋ, «نۇرلى جەر», اگروونەركاسىپ كەشەنىن دامىتۋ باعدارلامالارى. وسىعان وراي ايماقتاردا تۇسىندىرۋ جۇمىستارى ۇيىمداستىرىلىپ, اتالعان باعدارلامالار بويىنشا انىقتامالىق ماتەريالدار دايىندالدى. وسىعان وراي بۇگىنگە دەيىن 1 ملن حالىقتى قامتىعان 17 مىڭنان استام ىس-شارا وتكىزىلدى», – دەدى.
سونداي-اق ول ناتيجەلى جۇمىسپەن قامتۋ جانە جاپپاي كاسىپكەرلىكتى دامىتۋ باعدارلاماسى اياسىندا جۇمىسپەن قامتۋعا قولداۋ بىلدىرۋ شارالارى ارقىلى 550 مىڭداي ادامدى قامتۋ جوسپارلانىپ وتىرعانىن جەتكىزدى.
«بۇل حالىقتىڭ 84 پايىزى اۋىلدىق جەرلەردە تۇرادى. قىسقا مەرزىمدى وقىتۋ ادىسى بويىنشا وسى جىلدىڭ 1 ساۋىرىنەن باستاپ اقتوبە مەن قوستاناي وبلىستارىندا جانە استانا قالاسىندا تيىستى جۇمىستار قولعا الىندى. قالعان 13 ايماقتا ەندى باستالادى. ودان بولەك, شاعىن نەسيەلەندىرۋدىڭ قازىرگى تاڭدا قالا تۇرعىندارى ۇشىن دە قولجەتىمدى ەكەنىن ەرەكشە اتاپ وتكەن جون. شاعىن نەسيەلەندىرۋ سوماسى 18 ملن تەڭگەگە كوبەيىپ, جاڭادان باستاعاندارعا 85 پايىز جانە جۇمىس ىستەپ جۇرگەن كاسىپكەرلەر ۇشىن 50 پايىزعا دەيىن نەسيەنى كەپىلدەندىرۋ مەحانيزمى ەنگىزىلدى. بۇگىندە قارجى, اۋىل شارۋاشىلىعى مينيسترلىكتەرى مەن وبلىس اكىمدىكتەرى اراسىندا ۇش جاقتى نەسيەلىك شارت جاساسۋ بويىنشا جۇمىستار جۇرگىزىلۋدە. اگروونەركاسىپ كەشەنىن دامىتۋ باعدارلاماسى بويىنشا العا قويىلعان ماقساتتاردىڭ بىرى – اۋىل شارۋاشىلىعى قاۋىمداستىعىن دامىتۋ. قازىردىڭ وزىندە 15 مىڭ جەكە قوسالقى شارۋاشىلىقتى قامتىعان 157 قاۋىمداستىق قۇرىلعان. الداعى ۋاقىتتا وسى ۇش جاڭا باستاما بويىنشا تۇسىندىرۋ جۇمىستارىن جالعاستىرىپ, سايلاۋالدى باعدارلامانىڭ باعىتتارىنا ساي پارتييالىق كۋراتورلارعا ونىڭ ايماقتاردا ىسكە اسىرىلۋىن قاتاڭ قاداعالاۋدى ۇسىنامىز», – دەدى س.ساتيەۆ.
وز كەزەگىندە «نۇر وتان» پارتيياسىنىڭ ورتالىق اپپاراتى ساياسي جۇمىس دەپارتامەنتىنىڭ ديرەكتورى مارات ابساتتاروۆ رەسپۋبليكالىق جۇيەلىك كەستە بويىنشا اتقارىلعان جۇمىستارعا توقتالىپ وتتى. بۇل جونىندە ول: «وتكەن جىلدىڭ شىلدە ايىنان باستاپ جانە وسى جىلدىڭ بىرىنشى توقسانىندا پارتييانىڭ رەسپۋبليكالىق جۇيەلىك كەستەسىنە ساي 6 ملن 390 مىڭ ادامدى قامتىعان 71 082 ىس-شارا وتكىزىلدى. ونىڭ 7819-ى ورتالىق دەڭگەيدە بولسا, 63263-ى ايماقتاردا ۇيىمداس­تىرىلدى. ناتيجەسىندە, بۇقارالىق اقپارات قۇرالدارىندا بارلىعى 43632 ماتەريال جارييا­لاندى. سونداي-اق كونستيتۋتسييالىق رەفورمانى, ەلباسىنىڭ «قازاقستاننىڭ ۇشىنشى جاڭعىرۋى: جاھاندىق باسەكەگە قابىلەتتىلىك» اتتى جولداۋى مەن «بولاشاققا باعدار: رۋحاني جاڭعىرۋ» باعدارلامالىق ماقالاسىن تالقىلاپ, حالىققا تۇسىندىرۋ جۇمىستارىنا قاتىستى اتالعان جۇيەلىك كەستەگە وزگەرتۋلەر ەنگىزىلدى. سوعان سايكەس جۇمىستار جۇرگىزىلدى. وسى رەتتە حالىق اراسىندا كەڭىنەن تالقىلانعان مىندەتتى الەۋمەتتىك مەديتسينالىق ساقتاندىرۋ ماسەلەسىنە دە قاتىستى تيىستى جۇمىستار قولعا الىندى», – دەدى.
ىس-شارا سوڭىندا مۇحتار قۇل-مۇحاممەد ساننان گورى ساپاعا جۇمىس ىستەۋ كەرەكتىگىن ايتىپ, ورتالىق اپپارات پەن فيليال باسشىلارىنا كونستيتۋتسييالىق رەفورمانى, ەلباسى جولداۋى مەن باعدارلامالىق ماقالاسىن حالىققا تۇسىندىرۋ جۇمىستارىن جالعاستىرۋ, سۋ تاسقىنىنان زارداپ شەككەن ازاماتتارعا پارتييا تاراپىنان ناقتى كومەك كورسەتۋ, «نۇرلى جول» باعدارلاماسىنا قاتىستى باقىلاۋ جۇمىستارىن كۇشەيتۋ, «جاس وتان» جاستار قاناتىنىڭ جۇمىسىن ودان ارى جانداندىرۋ, ەكىنشى جارتى جىلدىققا ارنالعان رەسپۋبليكالىق جۇيەلىك كەستەنى جاساۋ, تەحنولوگييالىق جەتىستىكتەردى پارتييا جۇمىسىنا تيىمدى پايدالانۋ سيياقتى بىرقاتار ماڭىزدى تاپسىرمالار بەردى.

جۇلدىز وماربەكوۆا, «نۇر وتان» پارتيياسى الماتى قالالىق فيليالى توراعاسىنىڭ بىرىنشى ورىنباسارى:
– وتكەن جىلى فيليالداعى پارتييا مۇشەلەرى 2015 جىلمەن سالىستىرعاندا 2,9 پايىزعا وستى. بىز ۇشىن سانمەن بىرگە ساپانىڭ دا جاقسارعانى باستى نازاردا. بۇل ورايدا, پارتييا قۇرامىنداعى مەملەكەتتىك جانە بيۋدجەتتىك قىزمەتكەرلەر سانى ازايىپ, بيزنەس وكىلدەرى 15 مىڭعا وسسە, عىلىمي-شىعارماشىلىق وكىلدەرى 30 مىڭعا جەتتى. سوڭعى ەكى جىلدا جاڭادان قۇرىلعان 100 باستاۋىش پارتييا ۇيىمدارى وز قىزمەتىن باستادى.
دەپۋتاتتىق فراكتسييا قىزمەتى دە جوعارى دەڭگەيدە ۇيىمداستىرىلۋدا. ودان بولەك, پارتييالىق جوبالار بويىنشا جان-جاقتى جۇمىستار جۇرگىزىلۋدە. «نۇرلى جول» باعدارلاماسى, جاستار ماسەلەسى, سىبايلاس جەمقورلىققا قارسى كۇرەس, قوعامدىق قابىلداۋ, باسپاسوز قۇرالدارىمەن بايلانىس جۇمىستارى دا جۇيەلى جولعا قويىلعان. بۇعان فيليالدىڭ اقپاراتتىق موبيلدىك قوسىمشاسى دا وڭ اسەرىن تيگىزۋدە. سونداي-اق مەملەكەت باسشىسىنىڭ «بولاشاققا باعدار: رۋحاني جاڭعىرۋ» اتتى تاريحي ماڭىزى زور ماقالاسىنداعى تاپسىرمالاردى تۇسىندىرۋ مەن جۇزەگە اسىرۋ بويىنشا 300 ادامنان قۇرالعان اقپاراتتىق-ناسيحاتتىق توپ بەلسەندى جۇمىس ىستەۋدە.

عازيز بەكمۇحامەدوۆ, «نۇر وتان» پارتيياسى قوستاناي وبلىستىق فيليالى توراعاسىنىڭ بىرىنشى ورىنباسارى:
– بارشا قازاقستاندىقتار ۇشىن 2017 جىل تاريحي باستامالارمەن باستالدى. سوعان وراي كونستيتۋتسييالىق رەفورما مەن پرەزيدەنت جولداۋىن حالىققا تۇسىندىرۋ ۇشىن 22 ۇگىت-ناسيحات توبى قۇرىلدى. بۇقارالىق اقپارات قۇرالدارىندا 500-دەن استام ماتەريال جارييالانىپ, وعان جەرگىلىكتى پۋلدان 315 سپيكەر جۇمىلدىرىلدى.
قازىرگى تاڭدا ەلباسىنىڭ «بولاشاققا باعدار: رۋحاني جاڭعىرۋ» اتتى باعدارلامالىق ماقالاسىنداعى باسىمدىقتاردى تۇسىندىرۋ جۇمىستارى دا قارقىندى جۇرگىزىلۋدە. بۇل رەتتە الەۋمەتتىك جەلىلەردىڭ تيىمدىلىگىن اتاپ وتكەن جون.
سونىمەن قاتار وڭىردەگى سۋ تاسقىنىنان تۋعان قاۋىپتىڭ الدىن الۋعا قاتىستى جۇمىستار دا پارتييا فيليالىنىڭ قاتاڭ باقىلاۋىندا. وسى رەتتە بىز جەرگىلىكتى اتقارۋ ورگاندارىمەن بىرلەسىپ, بارلىق تيىستى جۇمىستاردى جۇرگىزەتىن بولامىز.

ەلامان قوڭىر,
سۋرەتتى تۇسىرگەن رۋستام امانتاي

بولىسۋ:

پىكىر جازۋ


*