جەدەل جاردەم قىزمەتى كۇشەيتىلەدى

173
0
بولىسۋ:

نۇرلان نىعماتۋليننىڭ توراعالىعىمەن وتكەن ماجىلىستىڭ جالپى وتىرىسىندا دەپۋتاتتار مەديتسينالىق ساقتاندىرۋ جوباسىنا قاتىستى قارىز الۋ كەلىسىمىن ماقۇلدادى. تيىستى زاڭ جوباسىن تالقىلاۋ بارىسىندا ماجىلىس توراعاسى دەنساۋلىق ساقتاۋ مينيسترىنە سىرقاتى نە جاراقاتى جانىنا باتىپ, قينالعان قازاقستاندىقتارعا جەدەل جاردەم كولىكتەرىنىڭ دەر ۋاقىتىندا كومەككە كەلىپ, اۋرۋحاناعا دا كەشىكپەي جەتكىزۋگە تيىستىگىن قاداپ ايتتى.
جيىندا دەپۋتاتتار «قازاقستان رەسپۋبليكاسى مەن حالىقارالىق قايتا قۇرۋ جانە دامۋ بانكى اراسىنداعى قارىز تۋرالى كەلىسىمدى (الەۋمەتتىك مەديتسينا­لىق ساقتاندىرۋ جوباسى) راتيفيكاتسييالاۋ تۋرالى» زاڭ جوباسىن ماقۇلداپ, سەناتقا جولدادى. وسى كەلىسىمگە №1 قوسىمشادا «جەدەل مەديتسينالىق جاردەمدى كۇشەيتۋ» جوسپارلانعان.
– بىز بىرىنشى كەزەكتە جەدەل جاردەم دەڭگەيىندە ولىم-جىتىم كورسەتكىشتەرىن تومەندەتۋدى كوزدەپ وتىرمىز, – دەدى مي­نيستر ە.بىرتانوۆ. – ول ۇشىن جەدەل مەدي­تسينالىق كومەك كورسەتۋ بويىنشا حالىقارالىق ستاندارتتار ەلىمىزدە ەنگىزىلەدى. بۇل رەتتە جەدەل جاردەمنىڭ, بارلىق قۇت­قارۋ قىزمەتتىڭ, ەمحانالار مەن اۋرۋحانالاردىڭ شۇعىل قىزمەتتەرىنىڭ قىزمەتكەرلەرى جاپپاي سوعان وقىتىلادى. بۇعان قوسا, سانيتارلىق اۆياتسييانىڭ رەسپۋبليكالىق ورتالىعى بازاسىندا شۇعىل مەديتسينالىق كومەكتىڭ ۇلتتىق ۇيلەستىرۋ ورتالىعىنىڭ ماتەريالدىق-تەحنيكالىق جاراقتاندىرىلۋى كۇشەي­تىلەدى.
ونىڭ ايتۋىنشا, بۇگىندە قازاقستاندا جەدەل جاردەمدى سان الۋان قىزمەت كور­سەتەدى: ولاردىڭ قاتارىندا جەدەل مەدي­تسينالىق جاردەمنىڭ وڭىرلىك قىز­مەتتەرى, ىشكى ىستەر مينيسترلىگىنىڭ مەديتسينالىق-قۇتقارۋ قىزمەتتەرى, تراسسالىق مەديتسي­نالىق-قۇتقارۋ پۋنكتتەرى بار. «ولاردىڭ بىر-بىرىمەن ىقپالداستىعى ناشار. وسى­عان وراي تۇراقتى ارى تاۋلىك بويى جۇمىس جاسايتىن «ۇلتتىق ۇيلەستىرۋ ورتالىعىن» قۇرۋ جانە ونى قاجەتتى قۇرال-جابدىق­تارمەن جاراقتاندىرۋ قاراستىرىلۋدا. ول ونلاين رەجيمدە شۇعىل جاعدايلارداعى بارلىق مەدي­تسينالىق كومەكتى قاداعالاپ وتىرادى» دەدى ەلجان بىرتانوۆ.
– ارينە, مۇنداي بىرىڭعاي ورتالىق­تىڭ قۇرىلعانى دۇرىس-اق, – دەدى نۇرلان زايروللاۇلى. – ايتكەنمەن, جەدەل جاردەم قىزمەتىن حالىقارالىق ستاندارت­تارعا ساي رەفورمالاۋ تۋرالى سوز قوزعا­عان­دا, بىرىنشى كەزەكتە جەدەل جاردەم كو­لىكتەرىنىڭ سىرقاتقا جىلدام كەلۋى, قا­جەتتى كومەكتى شۇعىل كورسەتۋى جانە ستا­تسيونارعا دەر ۋاقىتىندا جەتكىزۋى نازاردا بولۋى قاجەت. جەدەل جاردەم ستانساسى دا, ديسپەتچەرلىك قىزمەت تە تيىستى تەحنيكالىق جاراقتاندىرىلۋى جانە جاڭعىرتىلۋى كەرەك. GPS جۇيەسى ەندىرىلگەنى جون.
دەنساۋلىق ساقتاۋ مينيسترى دال سولاي جاساۋعا ۋادە ەتتى. «ونلاين مونيتورينگ جۇرگىزۋ جانە جەدەل جاردەم كولىكتەرىن GPS مونيتورلارمەن جاراقتاندىرۋ كوز­دەلۋدە. جالپى, كولىكتەردىڭ كەشىگىپ كەلۋ پروبلەماسى ولاردىڭ شۇعىل كومەك تالاپ ەتىلمەيتىن شاقىرۋلارعا تارتىلاتىنىمەن بايلانىستى. سوندىقتان جوبا اياسىندا Call-ورتالىق قۇرىلادى, وڭىرلىك سall-ورتالىقتارمەن ىقپالداسا وتىرىپ, ولار­دىڭ قىزمەتىن ۇيلەستىرەدى. ناتيجەسىندە, الگىندەي شاقىرۋلار وڭىرلەردەگى ەمحا­نالار مەن اۋرۋحانالارعا باعىتتالادى. بۇل جەدەل جاردەمنىڭ جۇكتەمەسىن ازايتۋعا جانە بريگادالاردىڭ بوساۋىنا مۇمكىندىك بەرەدى» دەدى مينيستر.
– مىندەتتى مەديتسينالىق ساقتاندىرۋ جۇيەسىن تيىمدى ىسكە اسىرۋ ۇشىن اقپا­راتتىق جۇمىستى جوعارى دەڭگەيدە وتكى­زۋىمىز كەرەك. جوبا بويىنشا بۇل جۇمىس بىرنەشە باعىتتا جۇرەدى. بىرىنشىدەن, مامس تۋرالى ارنايى بەينە جانە اۋديو­روليكتاردى ازىرلەپ, ونى تەلەار­نالار جانە كينوتەاترلار, سونداي-اق مەديتسينالىق ۇيىمدارداعى تەلەمو­نيتورلار ارقىلى تاراتامىز. ەكىنشىدەن, بۋكلەتتەر, كوشەدەگى باننەرلەر سەكىلدى تۇرلى-تۇرلى جارناما ماتەريالدارىن جاسايمىز. ۇشىنشى باعىت اياسىندا ينتەر­نەتتە, الەۋمەتتىك جەلىلەردە, ەلەكتروندى جانە داستۇرلى اقپارات قۇرالدارىندا ماتەريالدار جارييالانادى, – دەدى دەنساۋلىق ساقتاۋ مينيسترى.
قۇجاتتا زاەمدىق قاراجاتتار «حالىق ۇشىن دەنساۋلىققا تونەر سالماقتى پروب­لەمالاردان تۋىندايتىن قارجىلىق تاۋەكەلدەردى ازايتۋعا دا جۇمسالا الا­تىنى» جازىلعان. بۇل قانداي تاۋەكەلدەر? ە.بىرتانوۆتىڭ تۇسىندىرۋىنشە, قارجىلىق تاۋەكەلدەرگە «ازاماتتاردىڭ مەديتسي­نالىق جەكە شىعىندارىنىڭ باقىلاۋسىز وسۋى جاتادى». رەسمي مالىمەت بويىنشا, ەلىمىزدە «دەنساۋلىق ساقتاۋ سالاسى شى­عىس­تارداعى ازاماتتاردىڭ جەكە شىعىن­دارىنىڭ ۇلەسى 39 پايىزعا دەيىن جەتكەن». دۇنيەجۇزىلىك دەنساۋلىق ساقتاۋ ۇيىمى­نىڭ ۇسىنىمى بويىنشا, بۇل شىعىندار ۇلەسى 25 پايىزدان اسپاۋى كەرەك.
– بۇل تاۋەكەلدەردى ازايتۋ ماقساتىندا ەكى تەتىك قاراستىرىلۋدا. بىرىنشىسى, مىن­دەتتى الەۋمەتتىك مەديتسينالىق ساقتان­دىرۋ (مامس) اياسىندا ەمحانالاردا تەگىن دارىلەرمەن قامتاماسىز ەتۋدى كەڭەي­تۋ ارقىلى ازاماتتاردىڭ دارى-دارمەك الۋعا كەتەتىن شىعىندارىن ازايتۋدى كوز­دەيدى. ەكىنشىسى, مەديتسينالىق دياگنوس­تيكالىق قىزمەتتەردى قامتيدى, ايتپەسە, حالىق مەملەكەتتىك ەمحانالارداعى كەزەك­كە ىلىگە الماي, وز دەرتىن انىقتاۋ ۇشىن وسى قىزمەتتەردى وزدەرى ساتىپ الۋعا ماجبۇر. بىز ولاردى دا مەديتسينالىق ساقتاندىرۋ پاكەتىنە قوسپاقشىمىز. بۇل ازاماتتارعا جەكە كلينيكالاردىڭ دا دياگنوستيكالىق قىزمەتىن مامس اياسىندا پايدالانۋعا مۇمكىندىك بەرەدى, – دەدى مينيستر.

 

ايحان شارىپ

 

بولىسۋ:

پىكىر جازۋ


*