«ميراس» كەڭەسى ەلباسى ماقالاسىن تالقىلادى

484
0
بولىسۋ:

 

«نۇر وتان» پارتيياسىنىڭ ورتالىق اپپاراتىندا پارلامەنت ماجىلىسىنىڭ دەپۋتاتى ماۋلەن اشىمباەۆتىڭ توراعالىعىمەن «نۇر وتان» پارتيياسى جانىنداعى «ميراس» رەسپۋبليكالىق كەڭەسىنىڭ وتىرىسى وتتى.

وتىرىستا ەلباسىنىڭ «بولاشاققا باعدار: رۋحاني جاڭعىرۋ» اتتى ماقالاسى تالقىلاندى.

ماۋلەن اشىمباەۆ وتىرىستىڭ نەگىزگى ماقساتى ماقالانى ناسيحاتتاۋ, تۇسىندىرۋ مەن جۇزەگە اسىرۋدىڭ تەكتىكتەرىن قاراستىرۋ ەكەنىنە توقتالىپ وتتى.

– ەلباسى ماقالاسىندا تۇتاس قوعامنىڭ جانە اربىر قازاقستاندىقتىڭ ساناسىن جاڭعىرتۋدىڭ ناقتى باعىتتارىنا توقتالىپ, مازمۇندى ويلارىمەن بولىستى. بىزدىڭ ۇزاق مەرزىمدەگى ماقساتىمىز ايقىن. ول  – الەمدەگى دامىعان الدىڭعى قاتارلى ەلدەرگە قوسىلۋ. سوندىقتان قازاقستان ۇشىن جاڭعىرۋ  – ۇلتتى, ەگەمەندىكتى ساقتاپ قالۋدىڭ شارتى, – دەدى ول.

ماۋلەن اشىمباەۆ  ول ماقساتقا جەتۋ ۇشىن ساياسي جانە ەكونوميكالىق جاڭعىرۋدىڭ جەتكىلىكسىز ەكەنىن, رۋحاني جاڭعىرۋدىڭ رولى زور ەكەنىنە توقتالدى.

– ەلباسى اتاپ وتكەندەي, رۋحاني جاڭعىرۋ  –  ۇلتتىق كودتى ساقتاي وتىرىپ, الەمدەگى وزىق, پروگرەسسيۆتى ۇستانىمداعى قاعيداتتاردى بويعا سىڭىرۋ. بۇل –ۇلكەن جۇيەلى جۇمىس, – دەدى ول.

مەملەكەت جانە قوعام قايراتكەرى مىرزاتاي جولداسبەكوۆ مەملەكەت باسشىسىنىڭ ماقالاسىن رۋحانييات سالاسىنداعى ازاماتتاردى ۇلكەن قۋانىشقا بولەگەن ماقالا ەكەنىن اتاپ وتتى.

– ەلىمىز ەندى تاۋەلسىزدىك العانىندا پرەزيدەنت جانىنداعى بىزدەر رۋحاني يدەولوگييانى قولعا الۋدى ۇسىندىق. سوندا ەلباسى الى بارى بولاتىنىن ايتىپ, الدىمەن ەكونوميكانى كوتەرىپ, ونان كەيىن ساياساتقا كوشۋ كەرەگىن مالىمدەگەن ەدى. مىنە, تاۋەلسىزدىگىمىزدىڭ شيرەك عاسىرىن تويلاعاننان سوڭ رۋحاني جاڭعىرۋ ماقساتىنداعى كولەمدى ماقالاسىن جارييالاپ وتىر, – دەدى ول.

   سونىمەن قاتار ول ماقالادا كورسەتىلگەن يدەيالاردىڭ ورىندالۋىندا مينيسترلىكتەن باستاپ ار ازاماتتىڭ كوتەرەر جۇگى بارىن ايتىپ وتتى.

– مەملەكەت باسشىسىنىڭ ماقالاسىنا بايلانىستى وتاندىق ماسس-مەديادا مىڭداعان ماتەريال جارىق كوردى. ەلباسى گۋمانيتارلىق بىلىم باعىتىنداعى الەمدەگى 100 وقۋلىقتى قازاقشاعا اۋدارۋ كەرەكتىگىن ايتتى. مىسال رەتىندە, جۋرناليستيكا سالاسىنداعى شەتەلدىك اۆتورلاردىڭ كىتاپتارىن قازاقشاعا اۋدارۋدى قولعا العانبىز. سونىڭ نەگىزىندە, ەلىمىزدىڭ جۋرناليستيكا فاكۋلتەتى ستۋدەنتتەرىنە قىركۇيەك ايىنان باستاپ «مەدياەتيكا» كىتابى تەگىن تاراتىلماق, – دەپ مالىمدەدى اقپارات جانە كوممۋنيكاتسييالار مينيسترى داۋرەن اباەۆ.

كوركەم ومىرالى

فوتو: سوۆەتبەك ماعزۇموۆ

بولىسۋ:

پىكىر جازۋ


*