ۋورد پەن كوۆالەۆ: كىم جەڭەدى?

126
0
بولىسۋ:

17 ماۋسىمدا اقش-تىڭ لاس-ۆەگاس قالاسىندا جەرگىلىكتى كاسىپقوي بوكسشى اندرە ۋورد پەن رەسەيلىك اندرەي كوۆالەۆ اراسىندا قارىمتا كەزدەسۋدىڭ ۇيىمداستىرىلاتىنى بەلگىلى. سول بوكس كەشىندە قازاقستاننىڭ قوس ورەنى – مادييار اشكەەۆ پەن مەيىرىم نۇرسۇلتانوۆ شارشى الاڭعا شىعۋى مۇمكىن. 

بىرىنشى اۋىر سالماقتا جۇدىرىقتاسىپ جۇرگەن ۋورد پەن كوۆالەۆ اراسىنداعى كەزدەسۋ ميلليونداعان جانكۇيەرلەردى قاتتى قىزىقتىرىپ وتىرعانى جاسىرىن ەمەس. بۇل بوكسشىلاردىڭ ەكەۋى دە ناعىز «سەن تۇر, مەن اتايىندار» ەكەنىنە ەشكىمنىڭ كۇمانى جوق. 33 جاستاعى اقش-تىڭ ساڭلاعى الى بىردە-بىر رەت جەڭىلىستىڭ كەرمەك دامىن تاتقان ەمەس. 31 كەزدەسۋدىڭ تەڭ جارتىسىنا جۋىعىن ول نوكاۋتپەن اياقتادى. قازىرگى كەزدە اندرە ۇش بەلدى نۇسقا بويىنشا التىن بەلبەۋدى يەلەنۋدە. 34 جاستاعى رەسەيدىڭ مىقتىسى 32 رەت رينگكە كوتەرىلىپ, 30 رەت جەڭىس تويىن تويلادى. 26 قارسىلاسىن ەسىنەن تاندىردى. بىر مارتە ۇتىلىپ, تاعى بىر جەكپە-جەكتى تەڭ اياقتادى. ونىڭ ۇستىنە, وسىدان بەس اي بۇرىن قوس بوكسشى وزارا كۇش سىناسىپ, بۇل تارتىس ۇپاي سانىمەن ۋوردتىڭ پايداسىنان شەشىلگەن ەدى. سول سەبەپتى دە جازدا وتەتىن قارىمتا كەزدەسۋ كوپشىلىكتىڭ قىزىعۋشىلىعىن تۋدىرۋدا.

ەگەر سول كەشتە قوس قانداسىمىز شارشى الاڭعا شىعاتىن بولسا, دۇيىم جۇرتتىڭ الدىندا ولاردىڭ دا بەدەلى بىراز وسەتىنى انىق. وسى ورايدا ماديياردىڭ دا, مەيىرىمنىڭ دە اسا دارىندى بوكسشىلار ەكەنىن ايتا كەتۋگە تيىسپىز. وسى كۇنگە دەيىن اشكەەۆ 8 كەزدەسۋ وتكىزىپ, بارلىعىندا باسىمدىق تانىتسا, نۇرسۇلتانوۆ وتكەن اپتادا ۇيىمداستىرىلعان وزىنىڭ تۇساۋكەسەر كەزدەسۋىندە قارسىلاسىن ۇرىپ جىقتى.

 

عالىم سۇلەيمەن

 

بولىسۋ:

پىكىر جازۋ


*