استانانىڭ جاڭا تەمىرجول ۆوكزالى «نۇرلى جول» دەپ اتالادى

225
0
بولىسۋ:

استانادا ەكسپو-2017 حالىقارالىق كورمە قارساڭىندا تمد ەلدەرىندە بالاماسى جوق, سوڭعى جىلدارى الەمدە سوڭعى ۇلگىدەگى جاڭادان سالىنعان «نۇرلى جول» جاڭا ۆوكزالى پايدالانۋعا بەرىلەدى, دەپ حابارلايدى Baq.kz.

جوبا اياسىندا استانا تەمىرجول تەلىمىنىڭ ينفراقۇرىلىمىن دامىتۋ مەن ۆوكزال كەشەنى قۇرىلىسىن جۇرگىزۋ جۇمىستارى اتقارىلادى.
استانا ينفراقۇرىلىمىن دامىتۋ ارقىلى جۇك جانە جولاۋشىلار اعىنىن ۇلعايتۋ كوزدەلەدى.

«قازاقستان تەمىر جولى» ۇك» اق باسپاسوز قىزمەتى مالىم ەتكەندەي, قالانىڭ ىشكى تەمىرجول نىساندارىن دامىتۋ قۇرىلىسىنا الدىڭعى قاتارلى يننوۆاتسييالىق تەحنولوگييا پايدالانىلادى.

شۋدان قورعايتىن قۇرىلعىمەن قاپتالعان تەمىرجول ەستاكاداسى قالانىڭ كولىك اعىنىنا كەدەرگى كەلتىرمەي, جولاۋشىلاردى جاڭا تەمىرجول ۆوكزالىنا جەتكىزەدى.

جاڭا ۆوكزال تاۋلىگىنە 35 مىڭ جولاۋشىنى وتكىزە الادى. ال, قازىرگى ەلورداداداعى ەسكى ۆوكزال ارقىلى كۇنىنە 12 مىڭ جولاۋشى وتۋى تيىس بولسا, وندا ىس جۇزىندە 18 مىڭ جولاۋشىعا دەيىن كىرىپ-شىعادى.

جاڭا ۆوزكال جوباسىن ساراپتاۋ بارىسىندا تارتىلعان Buro Happold (ۇلىبريتانييا), Tabanlioglu Architects (تۇركييا), Jamas (گەرمانييا) حالىقارالىق ساراپشىلار كومانداسى ۆوكزالدى تەمىرجولدىڭ ۇستىنە كونكورس ارقىلى ورنالاستىرۋدى قولدادى.

بۇل وز الدىنا ۆوكزال عيماراتىن جاساۋداعى سوڭعى تاسىل وزىندىك نوۋ-حاۋ بولىپ تابىلادى. «ۆوكزال-كوپىر جاعالاۋدان بىرتىندەپ كوتەرىلىپ, كەڭىستىكتى تيىمدى پايدالانۋدى ماقسات ەتكەن.
ۆوكزالدىڭ قالانىڭ ىسكەرلىك ورتالىعىنا جاقىن ورنالاسۋى دا وتە قولايلى. ول ارقىلى قالاداعى اۆتوكولىكتىڭ كەپتەلىسى ازايادى.

ۆوكزال عيماراتىنىڭ اۋماعى120 مىڭ شارشى مەتر. وندا مۇمكىندىگى شەكتەۋلى جاندارعا ارنالعان تاكيلدىك جولدار, برايل الىپبيىمەن اقپاراتتى تابلو, ارنايى كاسسا قىزمەت كورسەتەدى.

نەگىزگى كۇتۋ زالىنان بولەك الەمدىك تالاپتارعا ساي قوناقۇيلىك بولمەلەر, قولايلى ساقتاۋ قويمالارى, انا مەن بالا بولمەسى, مەديتسينالىق كەڭسەلەر, فۋدكورتتار, مەيرامحانالار, 1500 ورىندىق ىشكى جانە سىرتقى پاركينگ قامتىلعان.

عيمارات قۋات ۇنەمدەگىش ليفتىلەرمەن, ەسكالاتورلارمەن قامتىلىپ, جىلۋ جۇيەلەرى قىستا اۋانى جىلىتسا, جازدا سالقىنداتادى.
جاڭبىر سۋىن جيناپ, ونى قاسبەتتى جۋۋعا پايدالانىپ, جاقىن اۋماقتى كوگالداندىرۋعا جۇمسالادى.

جولاۋشىلاردىڭ كەزەك كۇتىپ قالماۋىن بولدىرماۋ ۇشىن كەزەكتى باسقارۋدىڭ زامانۋي قوندىرعىسى, بيلەتتى ەلەكتروندى ساتۋ جۇيەسى, ينتەرنەتكە شىعۋ مۇمكىندىگى جاسالادى.

جولاۋشىلاردى توتەنشە جاعدايلاردان قورعاۋ ماقساتىندا لاڭكەستىك وقيعالاردىڭ الدىن الۋدىڭ كەشەندى مۇمكىندىگى جاسالادى. ونىڭ جولاۋشىلاردى تەكسەرىپ كىرگىزۋ قۇرىلعىسى, بەينەباقىلاۋ جۇيەسى ورناتىلادى. عيماراتتىڭ ىشى سىرتىندا قوزعالىس تارتىبى تاۋلىك بويى باقىلانادى.

سونداي-اق, جاڭا ۆوكزال اشىلعان كەزدە 1300 ادام جۇمىسپەن قامتىلادى.

15 مامىردا جالپى قۇرىلىس جۇمىستارى اياقتالىپ, 1-ماۋسىمدا ۆوكزال كەشەنى ينفراقۇرىلىمىنىڭ – ينجەنەرلىك كوممۋنيكاتسييالىق جانە پويىز قوزعالىسىن ينتەللەكتۋالدىق باسقارۋ جۇيەسى, جولاۋشىلارعا قىزمەت كورسەتۋى تەستىلىك سىناقتان وتكىزىلەدى.

ايتا كەتەيىك, «نۇرلى جول» ۆوكزالىنا العاشقى پويىزدار 1-ماۋسىمنان كىرىپ, شىعا باستايدى.

Baq.kz

بولىسۋ:

پىكىر جازۋ


*