ەلiمiزدە ەلەكتروندىق ەڭبەك بيرجاسى قىركۇيەك ايىندا iسكە قوسىلادى

502
0
بولىسۋ:

قازاقستاندا ەلەكتروندىق ەڭبەك بيرجاسى قىركۇيەك ايىندا iسكە قوسىلاتىن بولدى. بۇل تۋرالى قر ەڭبەك جانە حالىقتى الەۋمەتتiك قورعاۋ ۆيتسە-مينيسترi بiرجان نۇرىمبەتوۆ وكق بريفينگi بارىسىندا ايتتى, دەپ حابارلايدى Baq.kz تiلشiسi.

«ەلەكتروندىق ەڭبەك بيرجاسىن 2017 جىلدىڭ قىركۇيەك ايىندا iسكە قوسۋدى جوسپارلاپ وتىرمىز. جالپى, ونى قۇرۋ ارقىلى, بiرiنشiدەن, بۇعان دەيiن جۇمىسسىزدار مەن بوس جۇمىس ورىندارىن عالامتوردان iزدەمەگەن جۇمىس بەرۋشiلەر مەن جۇمىسشىلاردى, سونداي-اق, جەكە جۇمىسپەن قامتۋ اگەنتتiكتەرiن ورتاق ارنادا توعىستىرۋعا جول اشىلادى. ەكiنشiدەن, جۇمىسپەن قامتۋ ورتالىعى, iس جۇزiندە HR – قىزمەت, ياعني ناسيحات مiندەتiن تەگiن اتقارماق. ۇشiنشiدەن, ەلەكتروندىق بيرجا, جۇمىس iزدەۋ مەن ونى ۇسىنۋدىڭ ەڭ جەڭiل ارi ۇيرەنشiكتi تاسiلiنە اينالماق», – دەدi نۇرىمبەتوۆ.

ۆيتسە-مينيستردiڭ ايتۋىنشا, ەلەكتروندىق ەڭبەك بيرجاسىن قۇرۋمەن قاتار, جۇمىسپەن قامتۋ ورتالىقتارىن جاڭعىرتۋدا بەلسەندi iس-قيمىلدار جاسالۋدا. ماسەلەن, قىزمەت كورسەتۋدiڭ جاڭا ستاندارتتارى تۇزiلiپ, جۇمىسپەن قامتۋ ورتالىقتارىن مەملەكەتتiك مەكەمە سيپاتىنان شارۋاشىلىق جۇرگiزۋ قۇقىعىنداعى مەملەكەتتiك كوممۋنالدىق كاسiپورىن ەتiپ وزگەرتۋ قاراستىرىلعان.

«بۇل ارقىلى, جەكەمەنشiك سالاداعىداي, ورتالىق قىزمەتكەرلەرiنiڭ ەڭبەگi تۇپكi ناتيجەسiنە قاراي تولەنەتiن بولادى. سونىمەن بiرگە, جۇمىسپەن قامتۋ ورتالىقتارى جاڭا كومپيۋتەرلەرمەن جابدىقتالىپ, مينيسترلiكتiڭ بارلىق اقپاراتتىق جۇيەسiنە جانە ەتالون بازالارىنا قولجەتiمدiلiكتi قامتاماسىز ەتەتiن باعدارلامالىق كەشەندەر ورناتىلادى. كورسەتiلەتiن قىزمەتتەر ساپاسىن جاقسارتۋ ماقساتىندا, بيىلعى جىلى استانا, الماتى جانە شىمكەنت قالالارىندا ەلەكتروندىق كەزەك ەنگiزۋدi كوزدەپ وتىرمىز. جىل سوڭىنا دەيiن ەلەكتروندىق كەزەك ەلiمiزدiڭ بارلىق وبلىس ورتالىقتارىندا ەنگiزiلەتiن بولادى», – دەيدi ۆيتسە-مينيستر.

ۆەدومستۆو وكiلiنiڭ ايتۋىنشا, ازاماتتاردىڭ جۇمىسپەن قامتۋ ورتالىقتارى قىزمەتiنە قولجەتiمدiلiگiن ارتتىرۋ ماقساتىندا 237 حالىققا قىزمەت كورسەتۋ ورتالىعىندا 272 جۇمىس ورنى اشىلدى. ۆيتسە-مينيستر, سونداي-اق, ازاماتتاردى جۇمىسقا ورنالاستىرۋدى قامتاماسىز ەتۋگە ارنالعان «ە-حالىق» جۇيەسi تۋرالى اڭگiمەلەپ بەردi.

قىمبات ەلتايقىزى
بولىسۋ:

پىكىر جازۋ


*