Жұрт жүрегіндегісін айтады

Парламент Мәжілісі депутат­тарының өңірлерге сапары қарапайым халықтың ыстық ықыласын тудырды. Олардың шалғайдағы елдімекендердің тыныс-тіршілігін білуге деген ықы­ласы, жұртшылықтың өтініші мен пікірін тыңдауға құлшыныстары, түйінді мәселелерді шешуге ниет білдіруін тұрғындар жақсылыққа балап отыр.

Мәжіліс депутаттары – «Нұр Отан» партиясы фракциясының мүшелері Сергей Звольский және Мұхтар Ерман Солтүстік Қазақстан облысындағы жұмыс сапары барысында Петропавлдағы Оқушылар сарайының құрылы­сымен танысты.
Жаңа ғимарат 1800 балаға есептелген, құрылыстың біту мерзімі қыркүйек айына жоспарланған. Оқушылар сарайының басты мақсаты – балалардың жобалау-зерттеу қызметін және ғылыми-тех­никалық шығармашылығын дамыту. Сондықтан бұл мекеменің келешек иелерін тәрбиелеудегі орны орасан зор болғалы тұр. Оқу­шылар сарайының базасында IT орталығы жұмыс істемек. Ұйымдастырушылардың айтуынша, ол балалар мен жастардың интел­лектуалды даму үшін және бос уақытын тиімді өткізетін игілікті орын болмақ.
Оқушылар сарайының дирек­торы Дина Әбілмәжінованың айтуынша, ІТ технологияларының жаңа, неғұрлым сұранысқа ие бағыттарын дамыту басты міндет болып саналады.
Белгіленген жоспарларды іске асыру үшін ІТ технологиялардың жаңа бағыттарының бірыңғай тұжы­рым­дамасы дайындалған. Бала­ларды тиімді оқыту үшін зертха­нал­ар жұмыс істейді. Олардың ара­сында өнеркәсіптік интернет-заттар зертханасы, робототехника және мехатроника кабинеті, дрон жинау кабинеті, электроника және электротехника кабинеті, SDR ра­дио зертханасы, 3D прототип каби­неті, виртуалды нақтылық, бағдар­ламалау кабинеттері жұмыс істейді.
– Оқушылар сарайы және жоғары технологиялық базасы бар IT орталығы – балалар мен жастарды интеллектуалды дамыту орталығы. Осында ғылыми және шығармашылық қызметті да­мыту үшін ең жақсы жағдайлар жасалған.
Мемлекет басшысы «Төртінші өнеркәсіптік революция жағ­дайындағы дамудың жаңа мүмкін­діктері» Жолдауында жастардың ғы­лым­мен айналысуына мүмкін­дік­тер беру туралы жан-жақты ай­тыл­ған. Қазіргі уақытта «Нұр Отан» пар­тия­сының жаңа жоба­лары бі­рін­ші ке­зекте жастарға бағыт­тал­ған. Бізде да­рынды жастар көп, мұн­дай орта­лықтар олардың барлық әлеуе­тін іске асыруға бағытталған, – деп атап өтті Мәжіліс депутаты Мұхтар Ерман.
Ал Маңғыстау облысында жүрген Мәжіліс депутаттары – «Нұр Отан» партиясының депутаттық фракция мүшелері Тарас Хитуов, Кәрібай Мұсырман, Асылбек Смағұлов және Сәкен Өтебаев Мұнайлы ауданы Басқұдық ауылындағы «Балалар мен жасөспірімдерге арналған спорт мектебіне» барды.
Депутаттар келгенде мектеп оқушылары таңғы жаттығуларын аяқтап, депутаттарды асыға күтіп тұрды. Халық қалаулыларын тұрғындар жылы қарсы алды. Депутаттар жиналған қауымға ал­ғыс айтып, халықтың сұрақтары, өтініш-ұсыныстарын қабылдауға дайын екендігін жеткізді.
Мектеп директоры Өтеген Сәбитов балалар мен жасөспірім­дерді спортқа баулитын мектеп 2015 жылы салынғанын және қазір оның аумағы таршылық ететінін айтты.
– Қазір 9-15 жас аралығын­дағы 750 бала 42 спорт тобында жаттығады. Оларға 26 жаттық­тырушы сабақ береді, оның 18-і – жоғары білімді. Спортшыларымыз республикалық және халықаралық ойындардан жүлделі орындар алып жүр. Мә­селен, Көкшетауда өткен Азия чемпионаты мен әлемдік қол күресі ойындарында топ жарған болатын.
Мәжіліс депутаты Тарас Хитуов спорт мектебіне қосымша ғимараттар салу мәселесін Парламент отыры­сында көтеретіндерін айтты. Бұдан өзге де мәселелерге халық қа­лау­­лылары тиянақты жауап бер­ді. Астаналықтардың бұл келісін ауыл­дықтар аса зор ықыласпен құптады.

Жамбыл ҚЫРҒЫЗБАЙ