ІЛГЕРІ ҚАДАМ, ІЛКІМДІ ІСТЕР

«Нұр Отан» бастауыш пар­тия ұйымдарының жұмысын жандандыру мақсатында жаңа тұжырымдама жобасын әзірледі. Жаңашылдыққа сәйкес бастауыш ұйым мүшелері қоғамдық өмірге, партия жұмысына белсенді қа­тысып, өзінің тың идеяларын ұсыну арқылы партиялық кадр­лық резервіне еніп, «саяси лауа­зымдық» баспалдақ бойын­ша көтерілуіне мүмкіндік бар. Бұл туралы «Нұр Отан» партия­сы Төрағасының Бірінші орын­басары Мәулен Әшімбаев «Атырау мұнай өңдеу зауыты» БПҰ мүшелерімен кездесу барысында мәлімдеді.

Атырау облысына Прези­денттің бес әлеуметтік бас­та­масының және жаңа партиялық жобалардың жүзеге асырылу барысына бақылау жүргізу үшін арнайы сапармен келген Мәулен Әшімбаев алғашқы бо­лып өңірдегі бастауыш пар­тия ұйымының жұмысымен танысудан бастады.
Биыл маусым айында өт­кен партияның Саяси кеңес отырысында Президент бас­тауыш партия ұйымдарының жұмысын жандандыруды тап­сырған болатын. Бүгінгі күні «Нұр Отан» партиясы бас­тауыш партия ұйымдарының қыз­метін жандандыру тұжырым­дамасының жобасы әзірленіп, оны жан-жақты талқылау бас­талып кеткен. Шымкент, Қа­ра­ғанды, Павлодар қалаларында 800-ге жуық партия мүшесінің басын қосқан «Бастауыш партия ұйымдарының» форумдары өтті. Алқалы жиындарда жаңа даярланған тұжырымдама жоба­сына байланысты айтылған пікірлер, ұсыныстардың бар­лығы іріктеліп, жыл соңында Астанада өтетін бастауыш пар­тия ұйымдарының рес­пуб­­ликалық форумында жария­ланады.
Атырау мұнай өңдеу зауы­тында 1 800-ден астам жұ­мыс­шы болса, соның 1 200-ге жуық қызметкері – «Нұр Отан» партиясының мүшесі. Мұн­да жұмыс істейтін жас­тар пар­тияның кадрлық резер­ві­не кі­ріп, жұмыстан бө­лек, қо­ғам­дық жұмыстарға бел­сене араласып, БПҰ-ны жан­дан­дыру ая­сында берілген мүм­кіндікті пай­даланып, қызметтік бас­палдақ бойынша өсуді көздейді.
– Зауыттағы жұмысыммен қатар, партия мүшесі ретінде қоғамдық өмірге белсене ара­ласамын. Өңіріміздің өмірі жайлы үнемі хабардармын. Тұрғындарды толғандырған мәселелерді шешуге атсалысып, кейбір мәселелер бойынша өз ұсыныстарымды беріп, қалалық партия филиалы тарапынан талай рет қолдау таптым. Енді БПҰ-ның жұмысын жан­дан­дыру аясында партия бел­сен­ді мүшелерінің қызмет бойынша өсуіне мүмкіндік беруде, бұл жастар үшін үлкен ынталандыру, – дейді Атырау мұнай өңдеу зауытының опера­торы Ғалым Сағидолла.
Мәулен Әшімбаев мұнай­шылармен кездесу бары­сында 2018 жылғы 1 шілде­де­гі мәлімет бойынша республи­ка­мызда 1 миллионнан астам пар­тия мүшелерін біріктіретін 6 мыңға жуық бастауыш партия ұйымдары жұмыс істейтінін айтты.
– Партияның іргетасы, басты күші – ол бастауыш партия ұйымдары. Қазақстанды үшінші жаңғырту аясында Елбасының бастамасымен қолға алған бағдарламалық құжаттарды, партиялық жо­ба­ларды жүзеге асыру жолында бастауыш ұйым­дарының рөлі ерекше. Қазіргі күні партия қолға алған ІТ сыныптар мен ІТ орталықтарын ашу, кітап­ханаларды, мектеп асханалары мен спорт алаңдарын жаңғыр­ту бойынша жобаларды ха­лық арасында насихаттау, түсін­діру жұмысына белсенді қатысу­ларыңызды күтеміз, – деді Мәулен Әшімбаев.
Сондай-ақ «Нұр Отан» партиясы Төрағасының Бірінші орынбасары Мәулен Әшімбаев облыс орталығында Елбасының үшінші бастамасы «Жоғары білім алудың қолжетімділігі мен сапасын арттырып, студент жастардың жатақханадағы жағдайын жақсарту» бойынша Атырау қаласындағы «Дина Нұрпейісова атындағы халық­тық музыка академиясы» Атырау музыка колледжінің жатақханасына барды.
Президенттің тапсырмасына сәйкес «Нұр Отан» партиясы тарапынан «Президенттің бес әлеуметтік бастамасын» іске асыруға қоғамдық бақылауды ұйымдастыру мақсатында орталық және өңірлік деңгейде қоғамдық кеңестер құрылған болатын. Қоғамдық кеңестің құрамында жетекші саяси пар­тиялардың, Қазақстан халқы ассамблеясының, Қазақстан кәсіподақтар федерациясының, «Атамекен» ұлттық кәсіп­кер­лер және өңірлік палата­ларының, елдегі ірі ҮЕҰ басшылары мен өкілдері, танымал блогерлер, салалық сарапшылар мен ғалымдар бар.
Елбасының бес әлеуметтік бастамасы аясында салынған ғимарат биыл қолданысқа беріліп, жүзден астам студенттің игілігіне айналдыруда.
– Жатақханада студенттердің алаңсыз тұруына және оқуына үшін барлық жағдай жасалған. Студенттермен, жас ұстаздармен әңгімелестік, олар жаңадан бой көтерген студенттер үйіне қол­ жет­кізгеніне қуанышты.
Бұл – Президент бағдарлама­сы­ның жүйелі жүзеге асып жатқанының көрсеткіші. Бес әлеу­меттік бастама нақты xалық­тың әл-ауқатын көтеріп, өзгеде әлеуметтік мәселелердің шешім табуына септігін тигізуде. Бұл бағдарлама тұрғындар тара­пынан үлкен қолдауға ие, – деді партия Төрағасының Бірінші орынбасары.
Елбасының бес әлеуметтік бастамасының тағы бірі – шағын несие беруді көбейту. Бүгінде Президенттің төртін­ші әлеуметтік бастамасы шеңбе­рінде шағын несиелерді кеңейту жөнінде механизм бар. Бұрын осындай бағдарламаларға байла­нысты несиелердің ай­тар­­лықтай бөлігі әрекет етіп жатқан кәсіпкерлерге бағыт­та­латын. Қазіргі кезде несие беру жұмыссыздар мен өзін-өзі жұмыспен қамтамасыз етушілерге бағытталады. Нәтижесінде, олардың үлесі 85-90 пайызға өсіп, бірінші кезекте ауыл жастары үшін жаңа жұмыс орындарының ашылуы мен бизнесті жүргізу жағдайының жақсара түсуін қамтамасыз етеді. Мемлекет бас­шысы өз сөзінде ауыл және қала тұрғындарына, әсіре­се, жастарға, оның ішінде «Ата­мекен» ҰКП «Бастау Биз­нес» жобасы бойынша кәсіпкер­ліктің негізін оқуды тамам­дағандарға шағын несие ұсыну қажеттігіне ерекше назар ау­дарды.
Осы бастаманың облыста қалай жүзеге асырылып жат­қанын қадағалау үшін Мәулен Әшімбаев Caspiy Lana Atyrau ЖШС-і алаңында «Бастау Бизнес» бағдарламасы аясында арнайы оқыту курстарынан өтіп, өз ісін өркендету үшін шағын несие алып, жұмыс істеп отырған кәсіпкерлермен кездесті. Кездесу барысында «Нұр Отан» партиясы Төраға­сының Бірінші орынбасары Президент бастамасының маңыз­­ды­лы­ғына назар ауда­рып, шағын және орта бизнесті қолдауға бағытталған партия­лық жобалар туралы айтып, партия кәсіпкерлерді қолдау, қорғау бойынша жұмыстарды жалғастыратынын жеткізді.
– Өздеріңізге белгілі, кәсіпкерлер жиі көтеретін мәсе­лелердің бірі –коммерциялық мақсаттағы жер телімдері туралы ақпараттың ашық болмауы. Бұл әсіресе, жергілікті жерлерде анық байқалып отыр. Осы олқылықты ескере отырып, біз Геоақпараттық онлайн қызмет көрсететін ұлттық бірыңғай портал құру ісін бастап кеттік. Ол кәсіпкерлерге бос жер телімдері, аукциондар және оларға қатысу талаптары туралы ақпараттарды бір жерден және ашық алуға мүмкіндік береді. Партия бұл жұмысты қоғамдық бақылауға алып, Үкіметпен бірге бірлескен онлайн жүйе құру ісін жүзеге асыруда, – деді Мәулен Әшімбаев.
Сонымен қатар Мәулен Әшімбаев партия бастамасымен жүзеге асып жатқан «Үздік әлеуметтік жоба» байқауының аймақтық жеңімпазы, облыс­тық оңалту орталығында орналасқан «Мүгедек әлемі» қоғамдық бірлестігінің жұ­мы­сымен танысты. Айта кетсек, қоғамдық бірлестік 2011 жы­лы «Инватакси» қызметін қосқан. 2018 жылдың 8 айында инватакси 5 мыңнан астам қызмет көрсеткен.
Қоғамдық бірлестік белсен­ділерімен кездесу барысында партия Төрағасының Бірінші орынбасары партия қызметін жаңғырту аясында мүмкіндігі шектеулі жандардың өмір сүру сапасын жақсартуға бағыт­талған «Кедергісіз келешек» партиялық жобасын одан әрі жандандырып, тиімділігін арт­тыруды қолға алғанын атап өтті.
– Бұл жобаны жүзеге асыру барысында біз нақты төрт басымдықты анықтадық. Бірін­шіден, мүмкіндігі шек­теулі жандарға арналған кедергісіз орта қалыптастыру. Екіншіден, олардың инклюзив­ті білім алуларына ықпал ету. Үшіншіден, жұмысқа орналасу­ларына қолдау көрсету. Төр­тіншіден, осы салаға қатысты заңнамаларды одан әрі жетіл­діру. Осылайша, партия құр статистика үшін емес, мүмкіндігі шектеулі жандарға нақты көмек көрсетуді көздеп отыр, – деді ол.
Атырау өңіріне сапар бары­сында «Нұр Отан» партиясы Төрағасының Бірінші орын­басары Атырау білім-инновация лицей-интернаты базасында партиялық жобасын жүзеге асыру мақсатында бой көтерген IT сыныпты аралады. Айта кету керек, биыл өңірде бұдан басқа әлемдік талаптарға сай 8 жастан 16 жасқа дейінгі бала­­ларды бағдарламау және робото­техника негіздеріне оқытатын 10 ІТ сынып ашыл­ған. Бұл мектептерде 2018
жылы – 700, 2019 жылы – 1500, 2020 жылы – 2000 баланы оқыту жоспарланып отыр.
Сонымен қатар Мәулен Әшімбаев Халел Досмұхамедов атындағы Атырау мемлекеттік университетінде ашылған Іspace коворкинг орталығында болды және аймақтағы партия активімен кездесті. Кездесуде Президенттің бес әлеуметтік бастамасының және жаңа партиялық жобалардың жүзеге асырылу барысына бақылау жүргізіп, атқарылған жұмыс барысын талқылады.

Берік ХАСЕНОВ