Бір отбасын қуантты

Санкт-Петербор қаласында өткен кәсіпқой бокстағы кезекті жеңісіне қол жеткізіп, WIBA атағын жеңіп алған жерлесіміз Фируза Шарипова тараздық Жолдыбаевтар отбасына автокөлік кілтін табыс етті. Елбасы Нұрсұлтан Назарбаевтың «Болашаққа бағдар: рухани жаңғыру» мақаласының «Туған жер» жобасы аясында туған қаласының бір отбасына қайырымдылық жасауды өзінің азаматтық борышы деп санайды спортшы. Қала әкімдігінде өткен шарада Фируза Шарипова қала әкімі Ғалымжан Әбдірайымов және қала зиялыларымен жүздесіп, екі мүгедек баланы бағып отырған Риза Есенқызына көлік кілтін салтанатты түрде табыстады

– «Туған жер» жобасы жетіс­тікке жеткен азаматтардың туған жеріне қайырымдылық жасауына мүмкіндік береді. Бүгінде жергі­лікті меценаттардың арқасында қала­да түрлі әлеуметтік нысандар са­лынып, ескі ғимараттарға жөн­деу жұмыстары жүргізілуде. Мә­селен, «Қазфосфат» ЖШС Бас дирек­торы, Қазақстанның Еңбек Ері Мұқаш Ескендіров, ТИГУ рек­­торы Ерболат Саурықов және «Арай­строймаркет» ЖШС дирек­торы, кәсіпкер Арман Еділбаев секілді қаланың белсенді азамат­тары жалпы құны 543 миллион теңгеге бірнеше жобаларды жү­зеге асыруда. Спорт шебері, мақ­танышымыз Фируза жобаға өз үлесін қосуға ниет білдірді. Қар­шадай қыздың жас та болса, үлкен іске бас болғаны басқа азаматтарға үлгі болса екен, – деді Ғалымжан Райылұлы.
– Қыздар үшін жұдырық түйіс­­тіру оңай емес. Шаршы алаң­­да атымды емес, елімнің намысын қорғаймын. Елбасының «Болашаққа бағдар: рухани жаң­ғыру» мақаласы еліңді, атаме­ке­ніңді сүюге шақырады. Сондық­тан, байрақты бәсекедегі кезекті жеңісімді туған жеріме арнап, жүлдем арқылы бір отбасына қуа­ныш сыйлағым келді. Жолды­баевтар отбасында қазіргі таңда екі мүгедек бала тәрбиеленіп отыр. Оларды ауруханаға тасы­малдап, керек-жарағымен қамту үшін көлік қажет. Қалалық жұ­мыс­пен қамту және әлеуметтік бағдарламалар бөлімі арқылы осы жанұяның жағдайын біліп, көлік беруді ұйғардым. Қайырымдылық жасап марапат алуды көз­демей­мін. Бұл – әрбір исі мұсылманға парыз деп білемін, – деді Фируза.
Қала тұрғындары Нұрасыл және Ерасыл Қабыловтар туға­нынан сал дертіне шалдыққан. 11 жыл бойы балапандарының дер­тімен күресіп келе жатқан 4 ба­ланың анасы Риза жолдасы Марат екеуі жалдамалы пәтерде тұрады екен.
– Жаны жомарт жандардың барына қуанамын. Бұл өмірімде алған ең үлкен сыйлық. Алланың берген сынағын жеңілдетуге атса­лысқандарыңыз үшін алғысым шексіз. Фирузаға тек жеңісті жол тілеймін! – деді Риза риза­шы­лығын білдіріп.
Сондай-ақ «100 жаңа есім» жо­басының жамбылдық жеңім­паздары, облыстық қоғамдық кеңес­тің хатшысы, Жамбыл облы­сының Құрметті азаматы Сембек Сейдәзімов пен Рио-де-Жанейро қаласында өткен ХV жазғы Паралимпиадалық ойын­дарының жеңімпазы Зульфия Габи­дуллина да өз тілектерін жет­кізді.

Ерман ӘБДИЕВ,

Жамбыл облысы