«جاقسى دارىگەر» فوتو كورمەسى

148
0
بولىسۋ:

مەديتسينا ماماندارىنىڭ قوعامداعى دەڭگەيىن كوتەرەتىن الەۋمەتتىك جوبالاردىڭ بىرى كەشە ۇلتتىق مۋزەيدە باستالدى. مەم­لەكەت باسشىسى بيىلعى جولداۋىندا «مەدي­تسينالىق قىزمەت ساپاسى حالىقتىڭ الەۋمەت­تىك كوڭىل-كۇيىنىڭ اسا ماڭىزدى كومپونەنتى بولىپ سانالادى» دەگەن بولاتىن. وسىعان وراي «نۇر وتان» پارتيياسى مەن Sultan magazine بورتتىق جۋرنالى جانە №2 استانا قالاسىنىڭ كوپبەيىندى قالالىق اۋرۋحاناسى بىرلەسە وتىرىپ «جاقسى دارى­گەر» اتتى فوتوكورمە ۇيىمداستىردى.

اق حالاتتى ابزال جانداردىڭ ماشا­قاتتى جۇمىسىن حالىققا تانىتىپ, ولار­دىڭ قوعامداعى مارتەبەسىن كوتەرۋ ماق­ساتىنا ۇيىمداستىرىلعان كورمەگە باس-اياعى 127 سۋرەت قويىلىپتى. سۋرەت اۆ­تورى – مارات امىروۆ. «سۋرەتتەردى تۇسىرۋگە ەكى اپتادان استام ۋاقىت كەتتى. مىڭنان اسا سۋرەت تۇسىرىپ, سولاردىڭ ىشىنەن 127 سۋرەتتى ىرىكتەپ الدىق. سۋرەتتەر №2 قالالىق اۋرۋحانالاردا, №1 قالالىق ەمحانا, №2 بالالار اۋرۋحاناسى جانە باسقا دا ەمحا­نالاردا تۇسىرىلدى. سۋرەتكە تۇسىرۋ بارى­سىندا ماعان ەرەكشە اسەر ەتكەن جاعداي – پەرزەنتحانادا ينكۋباتوردا جاتقان 24 اپتالىق, 7 ايلىق شالا تۋىلعان سابيلەر بولدى» دەيدى ول. راسىندا ونىڭ نازارىنا اق حالاتتىلاردىڭ جۇمىس ۇستىن­دەگى ەرەكشە ساتتەرى تۇسكەن. سۋرەتتەرگە قاراپ وتىرىپ, ۇنەمى ىزدەنىس پەن مەيىرىم­دىلىكتى, توزىم­دىلىكتى, بىلىكتىلىكتى تالاپ ەتەتىن وسىناۋ بىر قيىن دا قىزىقتى مامان­دىق يەلەرىنە قۇرمەتىڭ ودان سايىن ارتا تۇسەدى.
«ەلباسىنىڭ جاڭا جولداۋىندا قازىرگى زامانعا ساي مەديتسينا ساپاسىن كوتەرۋ كەرەكتىگى ايتىلدى. قانشاما مىڭداعان دارىگەرلەردىڭ اجالعا اراشاشى بولىپ, كۇندەلىكتى ەرلىك ىستەپ جاتقانىن كوپ بىلە بەرمەيمىز. بۇگىن فوتو كورمە ارقىلى وسى­عان كۋا بولدىق. بۇگىندە ەلىمىز بويىن­شا جەتى مەديتسينا ۋنيۆەرسيتەتى مەديتسينا سالا­سىنىڭ ماماندارىن دايىندايدى. جاقسى دارىگەرلەرىمىز وتە كوپ. سولاردى ناسي­­حاتتايتىن, حالىقپەن شىنايى قارىم-قاتىناس ورناتۋعا جول اشاتىن وسىن­داي جوبانىڭ جۇزەگە اسىپ وتىرعانىنا قۋا­نىپ تۇرمىن» دەدى كورمەگە ارنايى قاتىس­قان وڭتۇستىك قازاقستان مەديتسينا­لىق اكا­دەميياسىنىڭ رەكتورى مىرزابەك رىسبەكوۆ.
بۇل كۇنى حالىققا تىس دارىگەرى, جۇيكە اۋرۋلارى دارىگەرى, جۇرەك اۋرۋلارى دارىگەرى, پەدياتر, تەراپەۆت, كوسمەتولوگتار تەگىن مەديتسينالىق تەكسەرۋلەر جۇرگىزدى. استانا قالاسىنىڭ تۇرعىندارى وزدەرىن مازالاعان سۇراقتارىنا جاۋاپ الدى.
– Sultan magazine جۋرنالى 2016 جىلدان بەرى بىر توقساندا بىر رەت قازاق, اعىلشىن, ورىس, تۇرىك تىلدەرىندە شىعىپ كەلەدى. بۇل – Forbes ستيلىندەگى جۋرنال. ماقساتىمىز – اربىر ازامات وز ىسىنىڭ سۇلتانى ەكەنىن كورسەتۋ. ال بۇگىنگى شارا دارى­گەرلەردىڭ ەڭبەگىن كورسەتىپ, حالىقپەن بايلانىسىن ارتتىرۋ ماقساتىندا ۇيىم­داس­تىرىلىپ وتىر», – دەيدى كورمەنى ۇيىم­داستىرۋشىلاردىڭ بىرى, Sultan magazine جۋرنالىنىڭ باس رەداكتورى قاراگوز ايداش.

گۇلجان راحمان

بولىسۋ:

پىكىر جازۋ


*