شقو: كوللەدج باسشىلارى ەل مەن بيلىكتى الداپ جۇر

392
0
بولىسۋ:

شىعىس قازاقستان وبلىسى پروكۋراتۋراسى وڭىردەگى كوللەدجدەردىڭ قىزمەتىنە تەكسەرۋ جۇرگىزىپ, كوپتەگەن زاڭ بۇزۋشىلىقتاردى, سونداي-اق, بيۋدجەتتىك قاراجاتتى ماقساتسىز جۇمساۋ فاكتىلەرىن انىقتادى.

اتاپ ايتقاندا, مەملەكەتتىك تاپسىرىستى ورنالاستىرۋ كەزىندە كونكۋرستىق راسىمدەردى ساقتاماۋ, ستۋدەنتتەردى جالعان وقىتۋ, گرانتتاردى زاڭسىز تاعايىنداۋ, وقىتۋشىلاردىڭ بىلىكتىلىك تالاپتارىنا ساي كەلمەۋى, ستۋدەنتتەردى جاتاقحانالارمەن قامتاماسىز ەتپەۋ, سونداي-اق, مەملەكەتتىك مۇلىكتى زاڭسىز جالعا بەرۋدەن تابىس الۋ فاكتىلەرى انىقتالعان.

جۇمىس ورنىمەن قامتىلعان تۇلەكتەردىڭ سانى تۋرالى مالىمەتتەردى جاساندى تۇردە ارتتىرۋ ارقىلى جالعانداۋ, وقۋ ورىندارىنىڭ اكىمشىلىگىمەن تۇلەكتەردى جۇمىسپەن قامتىلۋىنا كومەك كورسەتپەۋى جيى ورىن العان.

مەملەكەتتىك بىلىم بەرۋ تاپسىرىسىن ورنالاستىرۋ ەرەجەلەرى بۇزىلىپ,  ناقتى ايتقاندا, باسقا جەرلەردەن كەلگەن ستۋدەنتتەر جاتاقحانالارمەن قامتاماسىز ەتىلمەگەنىنە قاراماستان, وبلىستىڭ بىلىم بەرۋ باسقارماسى جىل سايىن سەمەي قالاسىنىڭ بيزنەس جانە سەرۆيس كوللەدجىنە, اياگوز قالاسىنداعى پوليتەحنيكالىق كوللەدجىنە جانە وسكەمەن قالاسىنداعى ەكى كوللەدجگە گرانتتار بەرگەن.

كوللەدج اكىمشىلىكتەرى ستۋدەنتتەردىڭ جاتاقحانادا تۇرۋ باعاسىنا مەملەكەتتىك تاپسىرىس بويىنشا كەلىسىمشارتتىڭ جالپى سوماسىنا ەنگەن كوممۋنالدىق قىزمەتتەر ۇشىن شىعىنداردى ەنگىزگەن, جاتاقحانالارداعى بولمەلەردى ۇشىنشى تۇلعالارعا جالعا بەرەتىن.

كۇرشىم كوللەدجىندە 12 ستۋدەنتتى جالعان وقىتقان. وقىتۋشىلار مەن وندىرىستىك وقىتۋ شەبەرلەرى وقۋ ساباقتارىن وتكىزۋ كەزىندە تەورييالىق جانە پراكتيكالىق وقۋ جۋرنالدارىندا وسى ستۋدەنتتەرگە باعا قويعان, ولاردى ارالىق اتتەستاتتاۋعا جىبەرگەن, كۋرستان كۋرستارعا كوشىرگەن. بۇدان دا باسقا, وسى ستۋدەنتتەرگە ستيپەندييا تولەنىپ, مەملەكەتكە كەلتىرىلگەن زالالدىڭ جالپى سوماسى 8 ملن تەڭگە قۇراعان. وسى فاكت بويىنشا سوتقا دەيىنگى تەرگەۋ جۇرگىزىلۋدە.

كوللەدجەردىڭ اۋماعىندا مۇلىكتى جەكە ماقساتتارىندا زاڭسىز پايدالانۋ فاكتىلەرى دە انىقتالعان. مىسالى, حالىق ارتىستەرى اعايىندى ابدۋلليندەردىڭ اتىنداعى شىعىس قازاقستان وبلىستىق ونەر ۋچيليششەسىنىڭ اۋماعىندا ۇزاق ۋاقىت اقىلى اۆتوتۇراق ورنالاسقان. پروكۋروردىڭ ۇسىنىمى ەنگىزىلگەن سوڭ, اۆتوتۇراق جابىلىپ, ونىڭ ورنىندا سپورت الاڭشاسىن سالۋ جوسپارلانۋدا.

تەكسەرۋ ناتيجەلەرى بويىنشا پروكۋرورلار 43 ملن تەڭگەدان اساتىن زالالدى انىقتادى. قاداعالاۋ اكتىلەرى بويىنشا بۇگىنگى كۇنگە دەيىن 36 ملن تەڭگە وندىرىلدى. تارتىپتىك جاۋاپكەرشىلىككە 60 تۇلعا,  اكىمشىلىك جاۋاپكەرشىلىككە 4 تۇلعا تارتىلدى.

اسقار التايۇلى

بولىسۋ:

پىكىر جازۋ


*