الەۋمەتتىك كاسىپكەرلەردىڭ جۇگى اۋىر

192
0
بولىسۋ:

ەلىمىزدىڭ باس شاھارىندا الەۋمەتتىك كاسىپكەرلەر فورۋمى وتتى. ىس-شاراعا قازاقستان ەڭبەك جانە حالىقتى الەۋمەتتىك قورعاۋ مينيسترلىگىنىڭ ەڭبەك, الەۋمەتتىك قورعاۋ جانە كوشى-قون كوميتەتى توراعاسىنىڭ ورىنباسارى دامەجان سادۋاقاسوۆا, ەڭبەك جانە حالىقتى الەۋمەتتىك قورعاۋ ۆيتسە-مينيسترى سۆەتلانا جاقىپوۆا, سونىمەن قاتار بيزنەس قۇرىلىمدارى, مەم­لەكەتتىك ورگاندار, ۇكىمەتتىك ەمەس ۇيىمدار وكىلدەرى مەن قوعام قايراتكەرلەرى قاتىستى.

فورۋم «نۇر وتان» پارتيياسى استانا قالالىق فيليالى مەن Green Tal الەۋمەتتىك شەبەرحاناسىنىڭ بىرلەسىپ ۇيىمداس­تىرۋىمەن وتكىزىلدى. وعان 20-عا جۋىق الەۋ­مەتتىك سالادا قىزمەت اتقارىپ جۇرگەن ۇيىمدار قاتىستى. فورۋمنىڭ نەگىزگى بو­لىمىنە كوشەر الدىندا قوناقتارعا كىشى­گىرىم جارمەڭكە ۇيىمداستىرىلدى. جيىر­ماعا تارتا الەۋمەتتىك ۇيىم وزدەرىنىڭ شىعارعان بۇيىمدارى مەن زاتتارىن ەلدىڭ نازارىنا ۇسىندى.
حالىقتىڭ الەۋمەتتىك ماسەلەلەرىن شەشۋ – مەملەكەتتىڭ ەڭ ماڭىزدى باسىم­دىعى. سول سەبەپتى ەلباسى نۇرسۇلتان نازارباەۆ 2018 جىلدىڭ 5 قازانىندا «قازاقستاندىقتاردىڭ ال-اۋقاتىنىڭ وسۋى: تابىس پەن تۇرمىس ساپاسىن ارتتىرۋ» اتتى جولداۋىن جارييا ەتكەن بولاتىن. قازىرگى تاڭدا مەملەكەتتىك ورگاندار تاراپىنان پرەزيدەنت بەرگەن تاپسىرمالاردى جۇزەگە اسىرۋ اياسىندا بىرقاتار اۋقىمدى جۇمىستار اتقارىلۋدا.
«بىزدىڭ ەلدە الەۋمەتتىك كاسىپكەرلەر سانى كوپ دەپ ايتسام, قاتەلەسپەيمىن. ويت­كەنى وعان تالاي رەت كۋا بولدىم. قىركۇيەك ايىندا بىز «قازاقستاننىڭ ۇزدىك الەۋمەتتىك جوبالارى» اتتى بايقاۋ وتكىزگەن ەدىك. وعان قاتىسۋعا 300-گە جۋىق ۇيىم وتىنىش بەردى. بۇلار – از قامتىلعان وتباسىلار مەن مۇگەدەك جاندارعا قولداۋ كورسەتىپ, كۇن­دەلىكتى ومىرىنە جەڭىلدىك ورناتۋ ماقسا­تىندا قىزمەت اتقارىپ جۇرگەن ازاماتتار. سوندىقتان پارتييا مۇنداي باستامالارعا اردايىم قولداۋ كورسەتۋگە دايىن» دەدى دامەجان سادۋاقاسوۆا.
«قازاقستاننىڭ ۇزدىك الەۋمەتتىك جوبالارى» بايقاۋى قورىتىندىسىندا 5 جوبا ارنايى سىيلىققا يە بولدى. بۇل ساناتتاعى جۇلدەنى Green Tal الەۋمەتتىك شەبەرحاناسىنىڭ نەگىزىن سالۋشى ەمين اسكەروۆ العانىن دا ايتا كەتكەن جون.
«فورۋمدى استانا قالاسىندا العاش رەت وتكىزىپ وتىرمىز. بۇل باستاما اياسىندا بىز مەملەكەتتىك ورگاندارمەن يىق تىرەسە جۇمىس ىستەۋ مۇمكىندىگىنە يە بولىپ قانا قويماي, بىرلەسە قوعام اراسىندا پايدا بولعان بارلىق ماسەلەنى وڭاي شەشەمىز دەگەن ۇمىتتەمىن. سونداي-اق, الەۋمەتتىك كاسىپكەرلىكتىڭ ارى قاراي دامۋىنا از دا بولسا ۇلەس قوسقىمىز كەلەدى. بىز فورۋم اياسىندا الەۋمەتتىك جوبالار جونىندە ايتىپ, وز ويلارىمىزبەن بولىسەمىز» دەيدى ە.اسكەروۆ.
ال GULSAR قوعامدىق بىرلەستىگىنىڭ باسشىسى نۇربولات قاراباسوۆ كاسىپ­كەرلىكتىڭ قىر-سىرىن ايتىپ, كەشكە قا­تىسۋ­شىلاردى تاباندىلىعىمەن تانتى ەتتى.
«قازىرگى كەزدە مۇمكىندىگى شەكتەۋلى جاندارعا وز كاسىبىن اشۋعا مۇمكىندىك كوپ. ەلىمىزدە جىل سايىن ۇيىمداستىرىلاتىن ارتۇرلى ۇزدىك جوبالار, بايقاۋلار بار. بۇل بايقاۋلارعا قاتىسۋ ارقىلى وز جوباڭدى رەسپۋبليكا دەڭگەيىندە كوتەرۋگە بولادى. سىزدەر ۇيدە وتىرىپ مەملەكەتتى جامانداي بەرگەننەن ەشنارسە وزگەرمەيدى. سەبەبى, مەن سول جايتتى باسىمنان وتكەردىم. «نەگە ماعان ەشكىم كومەكتەسپەيدى?» دەپ نا­لىدىم. التى جىل ۇيدە جاتتىم. سوسىن جانىمداعى دوستارىمنىڭ جەتكەن جەتىس­تىگىن كورىپ مەن دە ىسكە كوشۋگە كىرىستىم. 25 جاسىمدا اكە-شەشەمە ماسىل بولمايىن دەپ وز كاسىبىمدى اشۋعا تالپىندىم. بۇل جولدا «سابي» قورى, JAS PROJECT سەكىلدى باعدارلامالار كومەككە كەلدى. قۇدايعا شۇكىر, بۇگىندە كىشىگىرىم كاسىبىم بار. بىزگە تەك قانا الدىمىزعا ماقسات قويىپ, ار­ماندارعا سەنىمدى قادام جاساي بىلۋ جەت­كىلىكتى» دەيدى جەكە كاسىپكەر.
جارمەڭكەدەن سوڭ فورۋم اياسىندا پلەنارلىق وتىرىس, شەبەرلىك سىنىبى وتكىزىلدى. وندا كوپتەگەن كاسىپ يەلەرى الەۋ­مەتتىك كاسىپكەرلىكتى قۇرۋداعى وزدەرىنىڭ تاجىريبەلەرىمەن بولىستى.

ابىلايحان جۇماش

بولىسۋ:

پىكىر جازۋ


*