بالالاردى رەسەيدە ەمەس, سەمەيدە قالدىرۋ كەرەك

648
0
بولىسۋ:

مەكتەپ بىتىرە سالىسىمەن رەسەيدىڭ جوعارعى وقۋ ورىندارىنا قۇجات تاپسىراتىن قازاقستاندىق تۇلەكتەر لەگىن توقتاتۋ كەرەك. مىنە, وسى جانە تاعى باسقا ماسەلەلەردى قاراستىرعان سەمەيدەگى ەكونوميكالىق ليتسەيدە قالالىق بىلىم بولىمىنىڭ باستىعى ناتالييا فەسەنكونىڭ توراعالىعىمەن اتا-انالار كوميتەتى جانە تاربيە, بىلىم ماسەلەلەرىنە وراي قوعامدىق تىڭداۋ وتتى. بۇل تورت جىلدا بىر رەت وتۋى تيىس جيىن ەكەن. كەڭەستە كوپتەگەن پروبلەمالار تالقىلاندى. وتباسى ورتالىعى, سالاۋاتتى ومىر سالتى ورتالىعى, مەكتەپ ينسپەكتورلارى كەلگەندەرگە پروبلەمالىق سۇراقتارىنا بايلانىستى جاۋاپتارىن بەردى.

– مەكتەپ اسحاناسىنداعى بالالارعا بەرىلەتىن استىڭ دۇرىس بولۋىن قاداعايلايتىن ارنايى مونيتورينگ توپ قۇردىق, – دەپ حابارلادى سەمەي قالالىق بىلىم بولىمىنىڭ باستىعى ناتالييا فەسەنكو. – اتا-انالاردى وسى مونيتورينگ قۇرامىنا كىرۋگە شاقىرامىز. بۇگىن سىزدەر, مىنا شاراعا قاتىسۋشى قالا مەكتەپتەرىنىڭ اسحانا قىزمەتكەرلەرىنە «تاماقتى نەگە دۇرىس دايىندامايسىڭ? ساپاسى نەگە تومەن?» دەپ بەتپە-بەت كەلىپ ايتۋىلارىڭىزعا بولادى.

– مەنىڭ بالالارىم مەكتەپتە وقيدى, بۇگىنگى شاراعا راحمەت.  دەگەنمەن بىر ايتا كەتەر ماسەلە, سەمەيدەگى مەكتەپ بىتىرگەن تۇلەكتەر جىل سايىن توپ-توبىمەن رەسەيگە كەتىپ جاتىر. سول جاقتىڭ وقۋ ورنىنا تۇسەدى. بىز جاستاردان ايرىلىپ قالۋىمىز مۇمكىن. جاستاردىڭ بىزدىڭ قازاقستانداعى جوعارعى وقۋ ورنىنا تۇسۋگە مۇمكىندىك جوق, سەبەبى ۇبت باللدارى تومەن. ولار جىل بويى مەكتەپ ىشىلىك ۇبت ەمتيحاندارىن 90-نان اسا جوعارى باللدارعا تاپسىرىپ شىعادى. ال جوعارعى وقۋ ورنىنا بارعان كەزدە نە سەبەپتەن ەكەنى بەلگىسىز باللدارى تومەندەپ قالادى. وسى شاكىرتتەرىمىزدىڭ وز ەلىمىزدە قالۋىنا بىر كومەك جاساساڭىزدار, – دەدى اتا-انا ليلييا ۆيكتوروۆنا

– يا, بۇنداي پروبلەما بار, – دەدى جيىنعا توراعالىق ەتۋشى ناتالييا فەسەنكو. – مەكتەپ بىتىرگەندەر رەسەيدىڭ كورشى بارناۋل قالاسىنا تۇسۋدى ادەتكە اينالدىرعان. وندا بىلىم بەرۋ دەڭگەيى مگۋ-مەن بىردەي ەمەس. قازاقستاندىق وقۋشىلاردىڭ قازاقستان جەرىندە بىلىم الۋى ۇشىن ولاردىڭ بىر جىل بويى مەكتەپتە تاپسىرعان ەمتيحاندارى دا ەسەپكە الىنۋى تيىس. بۇنى بىز قولدايمىز. بولاشاقتا بىر وڭتايلى شەشىمى جاسالادى.

سول سيياقتى اۋىلدىق جەر پريگورود ورتا مەكتەبىنەن كەلگەن مەيرامگۇل دەگەن اتا-انانىڭ ايتۋىنشا, بالالارعا ارنالعان تەگىن ۇيىرمە, سپورتتىق سەكتسييالار بار ەكەن. بىراق, ولاردا ساباق بەرەتىن تۇراقتى ادام جوق. تۇرمىسى تومەن وتباسىلارىنىڭ بالالارى ۇشىن اسا قاجەتتى تەگىن ۇيىرمە, سەكتسييالار ۇزبەي جۇمىس ىستەپ تۇرعانى كەرەك. بۇل بالالاردىڭ, جاسوسپىرىمدەردىڭ اراق-تەمەكىدەن, باسقا دا لاس ارەكەتتتەردەن, بوس جۇرىستەردەن اۋلاق بولىپ, ۋاقىتتارىن ماڭىزدى وتكىزۋى ۇشىن اسا قاجەت.

– بىز ۇش تىلدىلىك باعىتىنا كوشتىك. مەملەكەتتىك باعدارلاما, ونى تۇسىنەمىز, بىراق, كەڭەس ۇكىمەتى تۇسىندا اعىلشىن ەمەس, نەمىس تىلىن وقىعان اتا-انالارعا ۇيدە اسىرەسە, باستاۋىش سىنىپتاردا وقيتىن بالالارىنا ۇي تاپسىرماسىن وقىتىپ, ۇيرەتۋ قيىن. نەگە مەكتەپتە دە اتا-انالاردى اعىلشىنشا ۇيرەتۋ كۋرستارىن اشپاسقا? – دەدى جاننا ابيكەنوۆا.

– قازىر سەمەي قالاسى بويىنشا ەرەسەكتەردى تەگىن وقىتاتىن كۋرستار كوپتەپ اشىلىپ جاتىر. بىز اتا-انالاردى مەكتەپ قابىرعاسىندا «كەشكى مەكتەپ» سيياقتى ۇيىمداستىرىپ, وقىتا المايمىز. اعىلشىن تىلىن مەڭگەرۋ-مەڭگەرمەۋ ار اتا-انانىڭ جەكە باسىنىڭ شارۋاسى, – دەدى سەمەي قالالىق بىلىم بولىمىنىڭ باستىعى ناتالييا فەسەنكو. – سوندىقتان دا زامانا كوشىنەن قالماي بالالارىڭىز ۇشىن اعىلشىن ۇيرەنۋگە تىرىسىڭىزدار. بۇنىڭ كەرەگى بار. سەبەبى, بىزدىڭ ەلىمىز قازاقستان لاتىن گرافيكاسىنا كوشىپ جاتىر, وسىنى دا ۇمىتپاڭىزدار.

راۋشان نۇعمانبەكوۆا,

سەمەي

بولىسۋ:

پىكىر جازۋ


*

وقۋعا كەڭەس بەرەمىز