عاجايىپ جەڭىس: «استانا» سوڭعى مينۋتتاردا «يابلونەتستەن» جەڭىستى تارتىپ الدى (ۆيدەو)

517
0
بولىسۋ:

ەۋروپا ليگاسى توپتىق تۋرنيرى اياسىندا «استانا» وز الاڭىندا چەحييالىق «يابلونەتستى» قابىلداپ, 2:1 ەسەبىمەن جەڭىسكە جەتتى.

ماتچ باستالعان ساتتەن استانالىق ويىنشىلاردىڭ قارقىنى وتە جوعارى بولدى. ويىننىڭ 18 مينۋتىندا پەدرو ەنريكە ەسەپ اشىپ, ەلوردالىق كوماندانى العا شىعاردى. بۇدان كەيىن دە بابايان شاكىرتتەرى بىرنەشە رەت تۇششىمدى شابۋىلدار ۇيىمداستىرعان. بىراق شەشۋشى سوققى باعىتتالعان جوق.

قارسىلاس كوماندا بىرىنشى تايم سوڭىنا دەيىن قالايدا ەسەپتى تەڭەستىرۋگە بارلارىن سالعان. اقىرى ول دەگەندەرىنە جەتتى. 40 مينۋتتا دەۆيد ليشكا مەرگەندىك تانىتىپ, ەريچ قاقپاسىنان ساڭىلاۋ تاپقان.

كەزدەسۋ اياقتالۋعا ەكى مينۋت قالعانعا دەيىن وسى ەسەپ وزگەرگەن جوق. تەك 88 مينۋتتا كۇللى قازاقستاندىق جانكۇيەرلەردى قۋانىشقا بولەگەن سات ورىن الدى. مارين توماسوۆتان پاس العان قورعاۋشى ەۆگەنيي پوستنيكوۆ ايىپ الاڭىنىڭ ىشىندە ساتتى قيمىل جاساپ, گول سوعىپ كەتتى. ەلوردالىقتار وسى ەسەپتى ويىن سوڭىنا دەيىن ساقتاي الدى.

سويتىپ, «استانا» سەنىمدى جەڭىسكە جەتىپ, ك توبىنداعى كوش تىزگىنىن سۋسىتقان جوق.

دال وسى ۋاقىتتاردا كيەۆتە جەرگىلىكتى «دينامو» مەن فرانتسييالىق «رەنن» اراسىنداعى كەزدەسۋ باستالىپ جاتىر. ونلاين تۋرنير كەستەسى بويىنشا «استانا» 8 ۇپايمەن كوش باستاۋدا. ودان كەيىن 5 ۇپايمەن «دينامو» كەلە جاتىر. «رەنندە» 3, «يابلونەتستە» 2 ۇپاي بار.

«استانا» كەلەسى ويىندا 29 قاراشا كۇنى وز الاڭىندا «دينامومەن» كەزدەسەدى. سودان سوڭ 13 جەلتوقساندا «رەننگە» قوناققا بارادى.

اباي ايماعامبەت

بولىسۋ:

پىكىر جازۋ


*