اۋىل ايەلدەرى استاناعا جينالدى

141
0
بولىسۋ:

استانادا «قازاقستاننىڭ اۋىلدىق اۋماقتارىن تۇراقتى دامىتۋداعى ايەلدەردىڭ ۇلەسى» اتتى اۋىل ايەلدەرىنىڭ بىرىنشى فورۋمى باستالدى. شارانى  پرەزيدەنت جانىنداعى ايەلدەر ىستەرى جانە وتباسىلىق-دەموگرافييالىق ساياسات جونىندەگى ۇلتتىق كوميسسييانىڭ قولداۋىمەن  «EXPO&Women» حالىقارالىق ۇيىمى» زاڭدى تۇلعالار بىرلەستىگى مەن ەۋروپالىق قايتا قۇرۋ جانە دامۋ بانكى ۇيىمداستىردى. 

مەملەكەت باسشىسىنىڭ «قازاقستان­دىق­تاردىڭ ال-اۋقاتىنىڭ وسۋى: تابىس پەن تۇرمىس ساپاسىن ارتتىرۋ» اتتى جول­داۋىندا اگروونەركاسىپ سەكتورى­نىڭ تورتىنشى ونەركاسىپتىك رەۆوليۋتسييا جاعدايىنداعى رولىن كۇشەيتۋگە ەرەكشە نازار اۋدارىلعان. فورۋم اۋىلشارۋا­شى­لىعىن دامىتۋدىڭ مەملەكەتتىك باعدارلاماسىن جۇزەگە اسىرۋداعى اۋىل ايەلدەرىنىڭ رولىن بەلگىلەۋ, وڭىرلەردەن جينالعان سپيكەرلەردىڭ جەتىستىك وقيعالارى ارقىلى كاسىپكەرلىككە ىنتا­لان­دىرۋ, جاسىل تەحنولوگييا قول­دانىسىن ارتتىرۋ ماقساتىن كوزدەيدى.
پلەنارلىق سەسسييانى اشقان مەم­لە­كەتتىك حاتشى, پرەزيدەنتتىڭ جانىن­داعى ايەلدەر ىستەرى جانە وتباسىلىق-دەموگرافييالىق ساياسات جونىندەگى ۇلتتىق كوميسسييانىڭ توراعاسى گۇلشارا ابدىقالىقوۆا ەلباسىنىڭ «اۋىل – التىن بەسىك» دەپ ەلدىمەكەندەر مەن اۋىلدىق وڭىرلەردى دامىتۋعا ۇنەمى باسىمدىق بەرەتىنىن ەسكە سالدى. بۇگىندە ەل حالقىنىڭ 42 پايىزى اۋىل تۇرعىن­دارى بولسا, ونىڭ 4 ميلليونى ايەلدەر ەكەنى جونىندە دەرەك كەلتىرگەن گۇلشارا ناۋشاقىزى ايەلدەردىڭ كاسىپكەرلىكپەن اينالىسىپ, ەكونوميكاعا ۇلەس قوسۋى­نىڭ ماڭىزدىلىعىن اتادى.
«نۇر وتان» پارتيياسى اتىنان سويلەگەن پارتييا حاتشىسى قانىبەك بەكبولاتۇلى ايەلدەردىڭ شەشىم قابىلداۋ پروتسەسىنە ارالاسۋ ۇلەسى مەن قوعامدىق ومىردەگى بەلسەندىلىگى ارتىپ كەلە جاتقانىن العا تارتىپ, پارتييا قۇ­را­مىندا باسشىلىق قىزمەت اتقا­را­تىن ايەلدەردىڭ كورسەتكىشىمەن بولىستى.
فورۋمعا مودەراتور بولعان ماجىلىس دەپۋتاتى مايرا ايسينا اۋىلشارۋاشى­لى­عىندا بالاما ەنەرگييا كوزدەرى مەن جاسىل تەحنولوگييالاردى قولدانۋ ارقى­­لى شىعىنداردى قىسقارتۋ, قورشا­عان ورتانى قورعاۋ ماسەلەسىنىڭ قازاقستان راتيفيكاتسييالاعان پاريج كەلىسىمىنىڭ نەگىزگى شارتى ەكەنىن ايتىپ, وڭىرلەردەگى جارقىن مىسالدار­مەن تانىستىردى.
ەلورداعا قازاقستاننىڭ باسقا ايماقتارىنان جينالعان, بيزنەس, الەۋ­مەتتىك سالا مەن مەملەكەتتىك سالادا جۇر­­گەن ايەلدەر وز جەتىستىكتەرىنىڭ تاري­حى­مەن بولىسىپ, «Coca-Cola بەلەس­تەرى» رەسپۋبليكالىق الەۋمەتتىك بيزنەس-جوبالار كونكۋرسىنىڭ 10 جەڭىمپازى 4000 اقش دوللارى كولەمىندەگى گرانتتارمەن ماراپاتتالدى.
فورۋم قورىتىندىسى بويىنشا پرەزيدەنتتىڭ «قازاقستاننىڭ ۇشىنشى جاڭعىرۋى: جاھاندىق باسەكەگە قابى­لەت­تىلىك» جانە «قازاقستاندىق­تار­دىڭ ال-اۋقاتىنىڭ وسۋى: تابىس پەن تۇرمىس ساپاسىن ارتتىرۋ» جولداۋلارىن قولداۋ رەتىندە ۇندەۋ قابىلدانادى. قۇجاتتا اۋىل ايەلدەرىنىڭ باستامالارىن قولداۋ­عا ەرەكشە كوڭىل بولىنىپ, اۋىلدىق وڭىرلەردەگى ومىر سۇرۋ ساپاسىن ارتتىرۋ, ازىق-تۇلىك قاۋىپسىزدىگىن قامتاماسىز ەتۋ جانە ەكوجۇيەلەردى ساقتاۋ ۇشىن جاسىل تەح­نولوگييالاردى ەنگىزۋ بويىنشا ۇسى­نىس­تار اتالادى.

كاۋسار احمەت

بولىسۋ:

پىكىر جازۋ


*