مەكتەپ اسحاناسىنا مان بەرىلەدى

136
0
بولىسۋ:

«نۇر وتان» پارتيياسى مەكتەپ اسحاناسى ماسەلەسىنە جاڭا كوزقاراس قالىپتاستىرۋدى قولعا الدى. «مەكتەپتەگى تۇسكى اس دامدى عانا ەمەس, قۇنارى مول, اعزاعا پايدالى بولۋى كەرەك» دەيدى پارتييالىقتار. ەندى اتا-انالار مەكتەپتەگى اس مازىرىنە وزگەرىستەر ەنگىزىپ, تاعامعا سۇت ونىمدەرى مەن كوكونىستەر قوسۋدى كوزدەپ وتىر.

ۆەدومستۆوارالىق كوميسسييا وكىلدەرى وقۋشىلاردىڭ قالاي تاماقتاناتىنىن تەكسەرىپ, پارتييانىڭ جاڭا جوباسىن تا­نىس­تىرۋ ۇشىن قاراعاندى قالاسىنداعى №52 مەكتەپكە ارنايى كەلدى. مەكتەپ اس­حا­­ناسىندا جابدىقتار بىرازدان بەرى جاڭار­ماعان. وقۋ ورنى 1972 جىلى سالى­نىپتى. اسحانانى جالعا الۋشىلار تەن­دەر ۇتىپ العان سوڭ, بەلگىلى بىر مەرزىمگە عا­نا جۇمىس اتقارادى. جالعا الۋشىلار تۇراق­تامايتىن بولعاندىقتان اسحانانى زامانعا ساي جابدىقتاۋعا كوڭىل بولىن­بە­گەن.
مەكتەپ اسحانالارىن جاڭعىرتۋعا با­عىت­تالعان پارتييالىق جاڭا جوبا بويىن­شا, 2019 جىلدان باستاپ كاسىپكەر­لەر ۇزاق ۋا­قىت قىزمەت كورسەتۋگە مۇمكىندىك الا­دى. «بۇل جاعدايدا بيزنەس­مەندەر اسحا­نا­نى تالاپقا ساي جابدىقتاپ, زامانعا ساي جابدىقتار الۋعا مۇددەلى بولادى» دەيدى ما­ماندار.
– مەكتەپتەردە كاسىپكەرلەر وقۋشى­لار­دى ساپالى تاماقپەن قامتاماسىز ەتىپ, سەس ەرەجەسى مەن ۇسىنىستارىنا ساي قىز­مەت كورسەتۋگە مىندەتتى. پارتييانىڭ جاڭا جوباسى مەملەكەتتىك-جەكەمەنشىك, ارىپ­تەستىك اياسىندا اسحانالارعا جوندەۋ جۇر­گىزىپ, وقۋشىلاردى تاماقتاندىرۋ سا­پاسىن ارتتىرۋدى كوزدەپ وتىر. كوميس­سييا كۇن سايىن وقۋشىلاردىڭ اس مازىرىن قا­راپ, ونىڭ ساپاسىن, الۋان تۇرلىلىگىن, ارا­سىندا تىيىم سالىنعان تاعامداردىڭ بار-جوعىن تۇگەلدەي تەكسەرەدى. «نۇر وتان» پارتيياسى وسى تالاپتاردىڭ ورىن­دالۋىن باقىلايمىز», – دەدى «نۇر وتان» پراتييا­سىنىڭ قاراعاندى وبلىسىن­داعى في­ليالى توراعاسىنىڭ ورىنباسارى قا­ديشا وسپانوۆا.
ار مەكتەپتە اسحانا قىزمەتىن با­قى­لاي­تىن كوميسسييا بار. ونىڭ قۇرا­مى­نا مەك­تەپ ديرەكتورلارى, مەديتسينا قىز­مەت­­­كەرلەرى مەن اتا-انالار كىرگەن. اتا-انا­لار بالالاردىڭ اس مازىرىنە جەمىس-جي­دەك قوسۋدى وتىندى.
– مەكتەپ اسحانالارىنا مونيتورينگ جۇر­گىزەتىن جاڭا باعدارلامانىڭ ەنگى­زى­لۋى­نە وراي, وقۋشىلاردى تاماقتاندىرۋ سا­پاسى ارتاتىندىعىنا قۋانىشتىمىز. بىز مۇنى وز باقىلاۋىمىزدا ۇستايمىز. مەك­تەپتەگى اس مازىرىندە ۇن تاعامدارى تىم كوپ. ەندى جاڭا باعدارلاما ەنگەن سوڭ, دەنساۋلىققا پايدالى استى كوبەي­تۋدى تالاپ ەتپەكپىز. كوكونىس سالاتتارى, جەمىس-جيدەكتەر كو­بەي­تىلسە, قازىر ىستىق تاماقتىڭ وزىن الىپ قاراساق, سول باياعى كوتلەتتەر مەن ماكارون­دار عانا بار. مۇ­نىڭ بارىن وزگەرتۋگە مۇمكىندىك تۋادى دەپ وي­لايمىن, – دەدى اتا-انالار اتىنان دي­نارا تۇسىپبەكوۆا.
«نۇر وتان» پارتيياسى مەكتەپ اسحا­نا­لارىن جاڭعىرتۋ بويىنشا جاڭا جوبانى قول­عا العان. قۇرامىنا بىلىم باسقار­ما­سى­نىڭ, دەنساۋلىق ساقتاۋ دەپارتا­مەن­تى­نىڭ, كاسىپكەرلەر پالاتا­سى­نىڭ وكىلدەرى مەن پارتييا توراعاسىنىڭ بىرىنشى ورىن­با­سار­لارى كىرەتىن ۆەدوم­ستۆو­ارالىق كو­ميس­سييا اي سايىن جوباعا قاتىسۋعا نيەت بىل­دىرگەن كاسىپكەر­لەردىڭ جۇمىسىن تەك­سە­رەدى.
– بارلىعى ۇلتىمىزدىڭ دەنى ساۋ بول­عا­نىن قالايدى. دەنى ساۋ ۇلت مەكتەپتەن شىعادى. ەندەشە, مەكتەپتى قولداۋ – بىزدىڭ دە پارىزىمىز. كاسىپكەرلەر دە قىسقا­مەر­­­زىمدى كەلىسىمشارتتاردىڭ ۇزاق مەر­زىمگە سوزىلعانىن بىراۋىزدان قول­دايدى, – دەدى قاراعاندى وبلىسى كاسىپ­كەر­لەر پالاتا­سىنىڭ بولىم باسشى­سى قارلىعاش وس­پا­نوۆا.
العاشقى رەيدتە نۇروتاندىقتار اسحا­ناداعى اس مازىرى مەن اۋىز سۋدىڭ ساپا­سى­نا زەر سالدى. مۇندا وقۋشىلار كۇنى بويى قاي­ناتىلعان تازا اۋىز سۋمەن قام­تىل­­عان. جاڭا جىلدان باستاپ مۇنداي تەك­سە­رىستەر كۇن سايىن جۇرگىزىلمەك.
پارتييالىق جوبا شەڭبەرىندە كاسىپ­كەر­لەرمەن 10 جىلعا دەيىنگى مەرزىمگە كە­لى­سىم-شارت جاساۋ مۇمكىندىگى بار. «جاڭا جىل­­دان باستاپ ىسكە كىرىسەتىن بۇل جوبا وقۋ­شى­لاردى تاماقتاندىرۋ ىسىن جاڭا سا­پا­عا كوتەرەدى» دەيدى كوميسسييا مۇشەلەرى.

لاززات قوجاحمەتوۆا, قاراعاندى وبلىسى

بولىسۋ:

پىكىر جازۋ


*