شىمكەنتتە قازاقستان-وزبەكستان بىرىنشى ايماقارالىق فورۋمى وتتى

2925
0
بولىسۋ:

شىمكەنت قالاسىندا قازاقستان رەسپۋبليكاسىنىڭ پرەمەر-مينيسترىنىڭ بىرىنشى ورىنباسارى اسقار مامين مەن وزبەكستان رەسپۋبليكاسىنىڭ پرەمەر-مينيسترىنىڭ بىرىنشى ورىنباسارى اچيلباي راماتوۆتىڭ توراعالىعىمەن قازاقستان-وزبەكستان بىرىنشى ايماقارالىق فورۋمى وتتى.

 

ەكى ەلدىڭ مەملەكەت باسشىلارى نۇرسۇلتان نازارباەۆ پەن شاۆكات ميرزيёەۆتىڭ باستاماسىمەن وتكىزىلگەن فورۋم جۇمىسىنا قازاقستان مەن وزبەكستان وڭىرلەرىنىڭ باسشىلارى قاتىستى.
فورۋمنىڭ پلەنارلىق وتىرىسىندا سوز سويلەگەن قر بىرىنشى ۆيتسە-پرەمەرى 2018 جىلى ەكى حالىقتىڭ مادەني جانە ساۋدا-ەكونوميكالىق باعىتتاردا ىس جۇزىندە جاقىنداي تۇسكەنىن اتاپ وتتى. اسقار مامين قازاقستانداعى وزبەكستان جىلىن ساتتى وتكىزۋ تۇرعىسىنان فورۋمنىڭ ارنايى وتكىزىلگەنىن ايتىپ, بيىل ەكىجاقتى ىنتىماقتاستىقتى ودان ارى دامىتۋعا سەپتىگىن تيگىزەتىن كوپتەگەن ىس-شارالار ۇيىمداستىرىلعانىن تىلگە تيەك ەتتى.
قر مەن ور اراسىنداعى وزارا ساۋدا-ساتتىق وڭ قارقىنعا يە. 2018 جىلدىڭ 9 ايىندا ساۋدا اينالىمى $2 ملرد استام سومانى قۇرادى, بۇل وتكەن جىلدىڭ سايكەس كەزەڭىمەن سالىستىرعاندا 40 پايىزعا جوعارى.
– بولجامدارعا سايكەس, 2018 جىلدىڭ قورىتىندىسى بويىنشا وزارا ساۋدا-ساتتىق كولەمى $3 ملرد قۇرايدى. ەلباسى ساۋدا-ساتتىق كولەمىن ودان ارى ۇلعايتۋدىڭ ۇلكەن الەۋەتىن ەسكەرە وتىرىپ, 2020 جىلعا قاراي ساۋدا اينالىمىنىڭ كولەمىن $5 ملرد جەتكىزۋ تۋرالى مىندەت قويدى, – دەدى قر بىرىنشى ۆيتسە-پرەمەرى.
اسقار مامين مەن اچيلباي راماتوۆ قازاقستان مەن وزبەكستان شەكاراسىنداعى – «جىبەك جولى» جانە «ياللاما» وتكىزۋ پۋنكتەرىن تەكسەردى.
تەكسەرۋ بارىسىندا تسيفرلىق تەحنولوگييالاردى قولدانۋمەن شەكارادان وتەتىن پۋنكتتەردىڭ ينفراقۇرىلىمىن جاڭعىرتۋ, قولدانىستاعى وتكىزۋ پۋنكتتەرىن جەدەلدەتىپ رەكونسترۋكتسييالاۋ, ەكى جاڭا وتكىزۋ پۋنكتتەرىن اشۋ ماسەلەلەرىن پىسىقتاۋ, سونداي-اق اۆتوۆوكزال سالۋ قاجەتتىگى ەسكەرىلدى.
ا. مامين شەكارالىق وتكىزۋ پۋنكتەرىندە ينفراقۇرىلىمدىق شەكتەۋلەردى الىپ تاستاۋدىڭ, ازاماتتاردىڭ, جۇكتەر مەن كولىك قۇرالدارىنىڭ بىرلەسكەن شەكارا بويىنشا قوزعالىسىنا قولايلى جاعدايلار جاساۋدىڭ ستراتەگييالىق ماڭىزدىلىعىن اتاپ وتتى.
ەكى ەل اراسىنداعى ىنتىماقتاستىقتىڭ ماڭىزدى باعىتتارى ونەركاسىپ, قۇرىلىس, كولىك, ترانزيت, تۋريزم جانە ت.ب. سالالارى بولۋى تيىس.
وز كەزەگىندە ور پرەمەر-مينيسترىنىڭ بىرىنشى ورىنباسارى ا. راماتوۆ «ەكى ەل اراسىنداعى سەرىكتەستىك قاتىناستىڭ بەرىك نەگىزى جانە ۇزاقمەرزىمدى كەلەشەگى بار» دەدى. قازىرگى تاڭدا وزبەكستاندا ەكونوميكانىڭ ارتۇرلى سالالارىندا قازاقستاندىق كاپيتالدىڭ قاتىسۋىمەن 260 جۋىق كاسىپورىن جۇمىس ىستەيدى. قازاقستاندا وزبەكستان جىلىن وتكىزۋ بارلىق سالالاردا ىنتىماقتاستىقتى كەڭەيتۋدىڭ باستاۋى بولماق.


فورۋم قورىتىندىسى بويىنشا ەكى ەل وڭىرلەرىنىڭ باسشىلارى ەكونوميكانىڭ باسىم سەكتورلارىندا بىرلەسكەن جوبالاردى ىسكە اسىرۋ سالاسىندا 16 قۇجاتقا قول قويدى.
جىبەك جولى ەلدەرىنىڭ ۆيزالىق رەجيمدەرىن وزارا تانۋ تۋرالى, «KTZ Express» اق مەن «وزاۆتوترانستەحنيكا» عىلىمي-وندىرىستىك ورتالىعى اراسىندا بىرلەسكەن كاسىپورىن قۇرۋ تۋرالى كەلىسىمدەرگە قول قويىلدى. سونىمەن قاتار, «قازترانسگاز» اق مەن «وزترانسگاز» اق اراسىندا وزبەكستان اۋماعى ارقىلى تابيعي گازدى تاسىمالداۋ تۋرالى كەلىسىمگە قول قويىلدى.
ا. مامين مەن ا. راماتوۆ «كورمە» كەشەنىنە باردى. وندا ەكى ەلدىڭ ونەركاسىپ, اۆتوونەركاسىپ, حيمييا, توقىما ونەركاسىبى, اعاش وڭدەۋ ىسى جانە ت.ب. سالالارداعى ونىمدەرى ۇسىنىلدى.

انار قونىس

بولىسۋ:

پىكىر جازۋ


*