Мақсат – туризмді дамыту

325
0
Бөлісу:

Қазақстан делегациясы «China International Travel Mart – 2018» халықаралық туристік көрмесіне қатысуда. Бүгін Шанхайда басталған шара 18 қарашаға дейін жалғасады. Көрмеде 71 елден 527 жәдігер ұсынылады.

Қазақстанның аталмыш көрмеге қатысуының стратегиялық маңызы зор. Аспанасты елі бізге көрші болғанымен, статистикаға сүйенсек, қытайлықтар Қазақстанға қарағанда, Моңғолияға жиі саяхаттайды екен. Осы ретте Шанхай көрмесіндегі негізгі лек қытай компаниялары болғандықтан, Қазақстанды саяхаттауға жақсы таңдау екенін жеткізу басты меже. Бұл мақсатта құрамында Kazakh Tourism ұлттық компаниясының және бірнеше туристік фирманың өкілдері бар Қазақстан делегациясы жоспарлы түрде дайындық жүргізді. Қазақстан стендінде ұлттық бұйымдармен жабдықталған киіз үй және Алматы облысындағы Айғайқұм бейнесіндегі фотоаймақ орнатылған, меймандарды  «Арлан жете» театры артистері қарсы алуда. Таңдалған бағыт та қазіргі уақытта сұранысқа ие бағыттардың бірі – Қазақстанды этномәдени элементтері бар экотуризм орталығы ретінде таныстыру негізге алынып отыр.

«Биыл осымен екінші рет Қытайдағы көрмеге қатысуымыз. Осыған дейін Бейжіңде роуд-шоу өткізіп, Қазақстанға қытайлық миллионер-блогерлерді де шақырдық. Қысқы демалыс пен тау-шаңғы туризмі бағыты бойынша жұмыс істейтін туроператорларға арнайы тур ұйымдастыру да жоспарда бар. Қазақстанға деген қызығушылық тұрақты түрде артуда, сол себепті жоғарыда аталған жұмыс келер жылы өз нәтижесін береді деп күтудеміз» деді «Kazakh Tourism» ҰК» АҚ төраға орынбасары Қайрат Сәдуақасов.

Көрмеде қонақтар арасында байқау өткізіліп, ұлттық тағамдардан дәм татуға мүмкіндік бар.

«Айқын» ақпарат

Бөлісу:

Пікір жазу


*