باقۋاتتى ومىرگە باستايدى

194
0
بولىسۋ:

قازاقستان پرەزيدەنتى ن.نازارباەۆ «قازاقستاندىق­تاردىڭ ال-اۋقاتىنىڭ وسۋى: تابىس پەن تۇرمىس سا­پاسىن ارت­تىرۋ» اتتى جولداۋىندا حا­لىقتىڭ ومىر سۇرۋ دەڭگەيىن جاڭا ساپاعا كوتەرۋ ۇشىن ناقتى ۇسىنىستار ەنگىزدى.

جولداۋدىڭ باستى وزەگى – بىلىمدى, بىلىكتى مامانداردى بارىنشا قولداۋ جانە سول ارقىلى تابىستى مەملەكەتتى دامىتۋ. بۇل رەتتە بيۋدجەتتىك ۇيىمدار­دا قىزمەت ىستەيتىن مامانداردىڭ ايلى­عىن ارتتىرىپ, ەڭ تومەنگى جالاقىنىڭ مولشەرى 1,5 ەسە كوتەرىلەتىنىن ايتتى. ادەتتە, از جالاقى الاتىن ماماندار پاتەر جالداپ تۇرادى, ال جالعا الى­ناتىن پاتەردىڭ قۇنى ايىنا 50 مىڭنان 150 مىڭعا دەيىن شارىقتاپ كەتكەن. سون­دىقتان ويلاپ قاراعان ادامعا 30 مىڭ جالاقىمەن تىپتى ومىر سۇرۋدىڭ وزى اقىلعا سىيمايتىن ەرلىك سەكىلدى. شىن مانىندە, بۇل اقشانىڭ قۇنسىزدانىپ, ازىق-تۇلىك پەن حالىقتىڭ قاراپايىم سۇرانىسىن وتەۋگە قاجەتتى تاۋارلاردىڭ باعاسى قىمباتتاپ تۇرعان قازىرگى زاماندا تۇرعىندارىمىزعا جاسالعان ۇلكەن قامقورلىق دەپ بىلەمىز. ەلبا­سىنىڭ جولداۋدى وسىنداي جاعىمدى جاڭالىقتارمەن باستاۋى – حالىقتىڭ كوڭىلىن سەرپىلتىپ تاستاعانى انىق.
مۇعالىمدەردىڭ مەرەكەسىنە ۇلكەن سىيلىق جاساپ ەلباسى كەلەسى جىلى «پەداگوگ مارتەبەسى تۋرالى» زاڭدى ازىرلەپ, قابىلداۋ تۋرالى تاپسىرما بەردى. بۇرىن-سوڭدى بولماعان ماڭىزى مەن مانى ەرەكشە زاڭدى قۇجاتتىڭ قابىلداناتىنى ۇستازدار قاۋىمىن زور قۋانىشقا بولەدى.
ەلباسى بىلىم سالاسىنىڭ بارلىق ساتىسى بويىنشا (بالاباقشادان باس­تاپ جوعارى وقۋ ورىندارىنا دەيىن) ناقتى مىندەتتەر قويىپ وتىر. جوعارى وقۋ ورىندارىنداعى وقۋ باعدارلا­مالارى جاڭارتىلىپ, وزىق بىلىم مەن ۇزدىك تاجىريبە ساباقتاسقان جاعدايدا عانا ناتيجە شىعاتىنىنا مان بەردى. مەملەكەت باسشىسى ەلىمىزدەگى جوعارى بىلىم بەرۋدىڭ وزىق ۇلگىسىن كورسەتىپ وتىرعان – نازارباەۆ ۋنيۆەرسيتەتىنە ۇكىمەتپەن بىرگە جاساندى ينتەللەكت, بالاما ەنەرگەتيكا جانە ت.ب. جاڭا تەحنولوگييالار جونىندەگى ارناۋلى جوبالار تۋرالى ازىرلەۋگە تاپسىرما بەردى. وڭىرلەردە ورنالاسقان جوعارى وقۋ ورىندارى نازارباەۆ ۋنيۆەرسي­تەتىنىڭ وقۋ-عىلىم ۇدەرىسىن ۇلگى ەتىپ الۋى قاجەت. شەتەلدىڭ بىلىكتى پروفەس­سورلارىن شاقىرىپ, ىشكى جانە سىرتقى اكادەمييالىق ۇتقىرلىقتى دامىتۋ قا­جەتتىلىگى دە تۋىنداپ وتىر. بيىلعى جىلى مەكتەپ تۇلەكتەرىنە تۇرلى دەڭگەي­دەگى گرانت كوپ بولىنگەنى بەلگىلى. وسى زا­مانعا لايىق جاتاقحانالار سا­لۋ جۇمىستارى دا قولعا الىنىپ جاتىر.
كەلەر جىلدىڭ جاستار جىلى بولىپ جارييالانۋى جاستارىمىزدىڭ بىلىمى مەن بىلىگىن پايدالانىپ العا قاراي ۇمتىلۋىن ىنتالاندىرا تۇسەرى انىق. نەگىزى, پرەزيدەنتتىڭ قاي جىلعى جول­داۋىن الساق تا, حالىقتىڭ تۇرمىسىن جاقسارتىپ, ەل ەكونوميكاسىن كوتە­رۋمەن قاتار, جاستار ماسەلەسىن قوزعاپ, ونىڭ دامۋىنا سەپتىگىن تيگىزىپ وتىرا­تىنىنا كوزىمىز جەتىپ وتىر.
پرەزيدەنت دەنساۋلىق سالاسىندا ونكولوگييالىق اۋرۋلارمەن كۇرەسۋ ۇشىن كەشەندى جوسپار قابىلداپ, عىلىمي ونكو­لوگييالىق ورتالىق قۇرۋعا تاپسى­رىس بەردى. ونكولوگييالىق ورتالىققا الەمدەگى ەڭ وزىق, زاماناۋي قۇرىلعى­لار­دى ورنالاستىرۋ قاجەتىن ايتقان­دا, حالىقتىڭ كەلەشەككە دەگەن ۇمىتى مو­لايا تۇستى دەپ ويلايمىن. سەبەبى, بىزدىڭ ەلدە بۇل قاۋىپتى دەرتكە شال­دىق­قانداردىڭ سانى كۇننەن-كۇنگە ۇلعايىپ كەلە جاتقانى دا جاسىرىن ەمەس. سوندىقتان مۇنداي ورتالىققا زارۋ ەكەنىمىز راس.
ماڭداي تەرىن توگىپ تۇرىپ الاتىن ازداعان جالاقىسىن قاناعات تۇتىپ جۇرگەن ۋچاسكەلىك دارىگەرلەردىڭ جالا­قىسىن كەزەڭ-كەزەڭمەن 20 پايىزعا كوتە­رۋدىڭ قولعا الاتىنىنا اسا ريزا­مىز. ەلىمىزدە اسا اۋىر دا جاۋاپتى ما­ماندىق يەلەرىن قولداۋعا باعىت­تالعان شاراپاتى مول ىستەردى جۇزەگە اسىرۋعا دەن قويىلىپ وتىرعانى كوڭىل­گە قۋانىش ۇيالاتادى.
سالاۋاتتى ۇرپاق تاربيەلەپ, ساۋ ۇلتتىڭ قامىن ويلايتىن ەلباسى اي­ماقتىق دەڭگەيدەگى جالپى سپورت پەن دەنەشىنىقتىرۋدىڭ قولجەتىمدىلىگىن ارتتىرۋ ۇشىن ناقتى اتقاراتىن شارا­لاردى تىزبەكتەپ بەردى.
پرەزيدەنت وزىمىزدىڭ ەلدە وندىرى­لەتىن تاۋارلاردى پايدالانۋىمىز كەرەك دەگەندى ۇنەمى ايتىپ كەلەدى. تۋعان جەرىمىزدى سۇيىپ, ونىڭ دامۋىنا قولداۋ بىلدىرۋدىڭ بىر پاراسى وتاندىق تاۋاردى قولدانۋدا جاتىر. سوندىقتان دەر شاعىندا قوزعالعان شاعىن جانە ورتا كاسىپكەرلىكتى دامىتۋ, اسىرەسە, اۋىل كاسىپكەرلىگىن دامىتۋ ماسەلەلەرى ورىندى. بۇل اۋىل شارۋاشىلىعى ونىم­دەرىن وڭدەۋگە ۇلكەن سەرپىلىس بولادى دەگەن ويدامىز. دەسەك تە, جاستاردىڭ, ولاردىڭ سوڭىنان اتا-انالارىنىڭ قا­لاعا ۇزدىكسىز كوشىپ-قونىپ جاتقا­نى­نىڭ دا كۋاسى بولىپ وتىرمىز. بۇل – ومىر زاڭى. سول سەبەپتى مەملەكە­تىمىزدىڭ قالالىق جەرلەردىڭ ينفراقۇرىلىمدىق جاعدايىن جوعارى دەڭگەيدە دامىتۋدى قولعا الۋى ماڭىزدى. كەز كەلگەن ادام­نىڭ تۇرمىسىن جاقسارتاتىن تۇرعىن ۇي-كوممۋنالدىق شارۋاشىلىعىنداعى جاعدايدى رەتتەۋ جونىندە دە اۋقىمدى ماسەلەلەردىڭ قوزعالعانى اسا قاجەت شارالاردىڭ بىرى.
مەملەكەت باسشىسى ەلىمىزدە ىشكى تۋريزمدى دامىتۋ مۇمكىندىكتەرى زور بولا تۇرا, بىز ونىڭ الەۋەتىن الى تولىق پايدالانا الماي وتىرعانىمىزدى تىلگە تيەك ەتتى. ەكولوگييالىق جاعدايى جاق­سى, ۋلى گازدارمەن لايلانباعان, سۇلۋ تابيعاتىمەن تامساندىراتىن جەرلە­رىمىزدى ەل ىشىندە ناسيحاتتاپ, دەمالاتىن ورىنداردى دامىتۋ كەرەك. وز جەرىن, ەلىن تانىپ-بىلگەن, رۋحاني قۇندى­لىقتارمەن سۋسىنداعان, ونى بويىنا سىڭىرگەن ازامات قانا ناعىز وتانشىل پاتريوت بولماق. «وز جەرىڭدى تانىپ بىل» جاڭا باستاماسى اياسىندا تۋريزمدى قاي­تا جاڭعىرتۋ جۇمىسى جاندانا تۇسە­تىنىنە سەنىمىمىز زور. بۇل مىندەت – ەلى­مىزدە جۇرىپ جاتقان «رۋ­حاني جاڭ­عىرۋ» ۇدەرىستەرىنىڭ ماڭىزدى قىرىنىڭ بىرى.
حالقىمىزدىڭ رۋحاني قاجەتىن وتەپ, تۇرمىس ساپاسىن جاقسارتۋ ماقسا­تىندا قابىلدانعان «بولاشاققا باع­دار: رۋحاني جاڭعىرۋ», «7 – 20 – 25», «نۇرلى جول», «نۇرلى جەر», «100 ناقتى قادام», «بەس الەۋمەتتىك باستاما» جانە باسقا دا مەملەكەتتىك باعدارلامالار­دىڭ وزەكتىلىگى ارتپاسا كەمىمەيتىنى بەل­گىلى. تاۋەلسىز مەملەكەتىمىز دامۋ جولىن تەمىرقازىق ەتىپ الىپ, الەمنىڭ وزىق ەلدەرىمەن يىق تىرەستىرەر مىقتى دا الەۋەتتى مەملەكەت بولۋدى كوزدەپ كەلەدى. ەلىمىزدىڭ اربىر ازاماتى تۋعان جەرىنىڭ دامۋىنا قولىنان كەلگەن جاقسىلىعىن اياماي, بارىنشا ادال ەڭبەك ەتسە, جاڭا تەحنولوگييالاردى مەڭگەرىپ بىلىكتى مامان اتانۋعا ۇمتىلسا, ماڭگىلىك ەل بولۋدى مۇرات تۇتقان قازاق ەلىنىڭ الار اسۋى مەن شىعار شىڭىنىڭ كوپ بولارىنا سەنىمدىمىز.

جانار تالاسپاەۆا,
م.قوزىباەۆ اتىنداعى
سقمۋ پروفەسسورى,
«نۇر وتان» پارتيياسىنىڭ ساياسي كەڭەس مۇشەسى

بولىسۋ:

پىكىر جازۋ


*