الماتى اۋەجايىندا جاڭا تەرمينال قۇرىلىسى باستالادى

520
0
بولىسۋ:

بيىل الماتى حالىقارالىق اۋەجايى كەڭەيىپ, ناتيجەسىندە جولاۋشىلار اعىنى ەكى ەسە ارتادى دەپ كۇتىلۋدە. قولدانىستاعى تەرمينالعا جاڭا عيمارات قوسۋ جوباسى قولعا الىنادى. بۇل تۋرالى الماتى قالاسى اكىمىنىڭ ورىنباسارى ەرلان اۋكەنوۆ وزىنىڭ فەيسبۋك پاراقشاسىندا بولىستى.

الماتى اي ساناپ ەمەس, كۇن ساناپ وسىپ كەلە جاتقان شاھار. قالادا رەسمي تۇردە 1,8 ميلليون حالىق تۇرادى. ال اگلومەراتسيياسىنداعى ەلدىڭ سانىمەن قوسا ەسەپتەسەك شامامەن 3 ميلليوننىڭ ماڭايىندا. وسىنشاما حالىققا الاتاۋدىڭ باۋرايىندا ەكى-اق اۋەجاي قىزمەت كورسەتەدى. ونىڭ بىرەۋىن – بورالداي اۋەجايىن تىپتى سىزىپ تاستاساق تا بولادى. سوندا جالعىز الماتى حالىقارالىق اۋەجايى بار اۋىرتپالىقتى وز موينىنا الىپ تۇر.

ەرلان اۋكەنوۆ وز پوستىندا: «اۋەجايدىڭ جاڭا كونتسەپتسيياسى جاسالىندى. وندا بۇگىنگى اۋەجاي تەرمينالىنا قوسىمشا بلوك قۇرىلىسى قاراستىرىلعان. ناتيجەسىندە اۋەجاي اۋماعى 2,5 ەسەگە ارتىپ, جولاۋشىلار اعىنى جىلىنا 13 ملن ادامدى قۇرايدى دەپ كۇتىلۋدە. قولدا بار 4 تەلەسكوپتىق تارپقا تاعى ەكەۋى قوسىلادى. سونىمەن قاتار بورتتاعى تاماقتانۋدى قامتاماسىز ەتەتىن جاڭا تسەحتىڭ جوباسى اياقتالدى. جاڭا تسەح تاۋلىگىنە 15 مىڭ جولاۋشىعا اس دايىنداي الاتىن بولادى. قۇرىلىس جۇمىستارى 2019 جىلدىڭ كوكتەمىندە باستالادى» دەدى.

ايتا كەتەيىك, سوڭعى ەكى جىلدا اۋەجايداعى جولاۋشىلار اعىنىندا وسىم بايقالىپ, جىلىنا 5,8 ادامعا قىزمەت كورسەتۋ ىسكە استى. دەمەك تەرمينال قۇرىلىسىنىڭ دەر ۋاقىتتا باستالاتىنى الماتىنىڭ ەكونوميكالىق وسىمىنە وڭ ىقپال ەتەرى سوزسىز.

اسقار بەك

بولىسۋ:

پىكىر جازۋ


*