جەتىستىككە جەتۋ جولى

494
0
بولىسۋ:

«نۇر وتان» پارتيياسىنىڭ «ۇرپاقتار ساباقتاستىعى» پارتييالىق جوباسى اياسىندا پاۆلودارلىق ستۋدەنتتەر پەداگوگيكالىق ماماندىقتى تاڭداعان ۇش بۋىن وكىلدەرىمەن جۇزدەستى. كەزدەسۋ بارىسىندا مۇعالىمدەردىڭ جەتىستىككە جەتۋىنىڭ سىرى مەن ۇستازدىق قىزمەتتىڭ وزەكتى ماسەلەلەرى تالقىلاندى. 

پاۆلودار تۇستى مەتاللۋرگييا كول­لەدجىنىڭ كوۋوركينگ ورتا­لى­عىندا وتكەن باسقوسۋعا ۇش بۋىن وكىلدەرى – وبلىستىق ىشكى ساياسات باس­قارماسىنىڭ باسشىسى ەرنۇر داۋەنوۆ, اقسۋ كەنتىندەگى مەكتەپتىڭ جاس مۇعالىمى انۋار شارىپوۆ جانە پاۆلودار مەملەكەتتىك پەداگو­گي­كالىق ۋنيۆەرسيتەتىنىڭ 2-كۋرس ستۋ­دەنتى اقمارال ماحاببات قوناق رەتىندە شاقىرىلدى. مەيماندار ۇستازدىق ماماندىقتى تاڭداۋدىڭ سەبەبىن تۇسىندىرىپ, وقۋ, ەڭبەك جولىنىڭ قىر-سىرىمەن بولىستى.
ماسەلەن, بۇگىندە وبلىستىق ىشكى ساياسات باسقارماسىنا باسشى­لىق ەتىپ وتىرعان ەرنۇر نۇرلانۇلى ەڭبەك جولىن مۇعالىمدىكتەن باس­تاعان. داۋەنوۆتەر اۋلەتىنىڭ باسىم بولىگى – عۇمىرىن بالالاردى وقى­تىپ-تاربيەلەۋگە ارناعان جاندار. تاريح پانىنىڭ ۇستازى بولىپ بىراز جىل قىزمەت اتقارعان ەرنۇر دا­ۋەنوۆتىڭ شاكىرتتەرى وبلىستىق, رەسپۋبليكالىق بايقاۋلاردان ولجاسىز ورالمايتىن. ال 2013 جى­لى ەرنۇر نۇرلانۇلى «رەسپۋب­لي­كانىڭ ۇزدىك پەداگوگى» اتانعان ەدى. كەيىن ۇستازدىق جولدا جيناعان تاجىريبەسى مەن بىلىمىن مەملەكەتتىك قىزمەتتە پايدالانۋدى جون كورىپ, ار جىلدارى اۋداندىق بىلىم بەرۋ بولىمدەرىندە, وبلىستىق بىلىم بەرۋ باسقارماسىندا باسشىلىق قىز­مەتتە بولىپ, بۇگىندە ايماقتىڭ ىشكى ساياساتىنا جەتەكشىلىك ەتۋدە. بىلىكتى ارى جاس باسشى تابىسقا جە­تۋدىڭ سىرى ەڭبەكقورلىق پەن ىزدە­نىستە دەپ بىلەدى. سوندىقتان بولا­شاق ارىپتەستەرىنە ۇنەمى وقىپ, سوڭعى جاڭالىقتارعا قانىق بولىپ, جەتىستىككە جەتۋ جولىندا ايانباۋعا كەڭەس بەردى.
انۋار شارىپوۆ قولىنا ديپ­لوم الا سالا اۋىلدا ەڭبەك ەتۋگە اسىقتى. مۇنداي قادام جاساۋىنىڭ سەبەبىن اۋىلدىق مەكتەپتەردەگى بىلىم دەڭگەيىن ارتتىرۋعا ۇلەس قو­سۋدى قالايتىنىمەن بايلانىس­تىردى. تاريح پانىنەن ساباق بە­رەتىن ول بۇگىنگى كۇنى ەلدى مەكەندەگى وقۋ ورىندارىندا وسكەلەڭ ۇرپاق­تىڭ ساپالى بىلىم الۋىنا بارلىق جاعداي جاسالعان دەپ ەسەپتەيدى. تەك ۇستاز بالانىڭ بويىنداعى ۇشقىن مەن قۇلشىنىستى بايقاپ, زاما­ناۋي ادىس-تاسىلدەردى قولدانا السا بولعانى. بۇل رەتتە جاس پە­داگوگتىڭ قىسقا مەرزىم ارالى­عىندا بىرقاتار تابىسقا جەتكەنىن اتاپ وتكەن جون. سولاردىڭ بىرى – رەسپۋبليكالىق ە.بەكماحانوۆ سىيلىعىنىڭ يەگەرى اتانۋى. اق­مارال ماحابباتتىڭ ازىرشە پە­داگوگتىق تاجىريبەسى جوق. ول ­جو­­عارى وقۋ ورنىنىڭ ەكىنشى ­كۋر­سىندا وقيدى. بۇگىنگى كۇنى مۇعالىم مامان­دىعىن تاڭداي­تىن تۇلەكتەردىڭ قا­تارى قالىڭ ەمەس. ال اقمارال ۇستاز بولۋدى بالا كەزىنەن ارمانداپتى.
– ۋسپەن اۋدانىنداعى ورتا مەكتەپتە بىلىم الدىم. سول كەزدە مۇعالىمدەردىڭ ساباق بەرۋ تاسىلىنە, سوزدىك قولدانىسىنا, باستىسى ەڭ­بەككە, بالالاردى وقىتۋعا دەگەن قۇلشىنىسىنا قاراپ قىزىعا­تىن­مىن. سوندىقتان ماماندىق تاڭ­داۋدا قينالعان جوقپىن. مەكتەپ قابىرعاسىندا جۇرگەندە-اق ماتە­ماتيكا پانىنىڭ مۇعالىمى بولامىن دەگەن ماقسات قويدىم. بۇگىندە سول ماقساتىما جەتۋ ۇشىن قارىشتى قادامدار جاساۋدامىن. كوپشىلىگى «ماتەماتيكا قيىن پان عوي, ونى نەگە تاڭدادىڭ?» دەپ جاتادى. بى­رىن­شىدەن, ماتەماتيكا – عىلىم­دار­دىڭ پاديشاسى, ەكىنشىدەن وقۋشى­لار­دىڭ باسىم بولىگى «باس الا قا­شاتىن» وسى پاندى قىزىقتى وت­كىزىپ, شاكىرت­تەردى تارتىپ, ولاردىڭ ماتەماتي­كالىق ساۋاتىن ارتتىر­عىم كەلەدى. سەبەبى, بۇگىن كۇندەلىكتى ومىردەگى تىنىس-تىرشىلىگىمىز ەسەپ-قيساپقا تىكەلەي بايلانىستى, – دەيدى ول.
كەزدەسۋگە قاتىسقان پاۆلودار تۇستى مەتاللۋرگييا كوللەدجى مەن پاۆلودار مەملەكەتتىك پەداگوگي­كالىق ۋنيۆەرسيتەتىنىڭ ستۋدەنتتەرى كوكەيدە جۇرگەن ساۋالىن قويدى. اسىرەسە, بيىلعى جاستار جىلىندا وبلىستا اتقارىلاتىن شارالاردى بىلمەك بولدى. وبلىستىق ىشكى ساياسات باسقارماسىنىڭ باسشىسى ەرنۇر داۋەنوۆ الداعى جوسپار­لارمەن بولىسىپ, ار ستۋدەنتتى شا­رالارعا بەلسەنە قاتىسۋعا, وي-پى­كىر­لەردى ورتاعا سالىپ, تىڭ جوبالار ۇسىنۋعا شاقىردى.

قۇندىز قابىلدەنوۆا, پاۆلودار وبلىسى

بولىسۋ:

پىكىر جازۋ


*