ۇبت: 15-20 قاڭتار ارالىعىندا 2242 تەڭگە تولەپ تەست تاپسىرۋعا بولادى

847
0
بولىسۋ:

قازاقستاندا ۇلتتىق بىرىڭعاي تەستىلەۋ جىلىنا 4 رەت — قاڭتار, ناۋرىز, ماۋسىم, تامىز ايلارىندا وتكىزىلەتىن بولادى. تەستىلەۋ اقىلى نەگىزدە وتەدى, قۇنى — 2242 تەڭگە. بىلىم جانە عىلىم مينيسترلىگىنىڭ اقپاراتىنا سايكەس, 2019 جىلى ۇبت فورماتى وزگەرىسسىز قالماق.

قاڭتار, ناۋرىز, تامىز ايلارىندا وتەتىن تەستىلەۋگە قاتىسۋ ارقىلى وقۋعا تۇسۋشى جوو-نىڭ اقىلى بولىمىنە قۇجات تاپسىرا الادى. قاڭتاردا شەكتى بالىن جيناعان تەستكە قاتىسۋشى ۇبت سەرتيفيكاتىمەن جوو-عا تەك كوممەرتسييالىق نەگىزدە وقۋعا تۇسە الادى: شەكتى بالىن جيناسا بولعانى. سونىمەن قاتار, ۇبت-نى قاڭتاردا تاپسىرعاندار نەگىزگى ۇبت-نى ماۋسىم ايىندا دا تاپسىرا الادى جانە مەملەكەتتىك بىلىم بەرۋ گرانتتارىن بەرۋ كونكۋرسىنا قاتىسا الادى.

«مەملەكەتتىك بىلىم بەرۋ گرانتتارىن تاعايىنداۋ بويىنشا وتەتىن كونكۋرسقا قاتىسۋ ۇشىن مىندەتتى تۇردە 2019 جىلعى ماۋسىم-شىلدە ايلارىندا وتەتىن ۇلتتىق بىرىڭعاي تەستىلەۋگە قاتىسۋ قاجەت. تەستىلەۋگە قاتىسۋعا وتىنىم بەرۋ ۇشىن تۇرعىلىقتى تىركەلگەن جەرى بويىنشا ۇلتتىق تەستىلەۋ ورتالىعىنىڭ ۇبت وتكىزۋ پۋنكتەرىنە جۇگىنۋ قاجەت», دەلىنگەن قر بعم ماتەريالدارىندا.

2019 جىلعى ۇبت فورماتى ەش وزگەرىسسىز قالاتىنىن اتاپ وتكەن جون. وقۋعا تۇسۋشى داستۇرلى تۇردە 3 مىندەتتى پان (قازاقستان تاريحى, ماتەماتيكالىق ساۋاتتىلىق, وقۋ ساۋاتتىلىعى) جانە 2 بەيىندىك پان بويىنشا تەستىلەۋدەن وتەدى.

قاڭتار, ناۋرىز ايلارىندا وتەتىن تەستىلەۋدى تالاپكەر ۇبت وتكىزىلەتىن وزىنە ىڭعايلى كەز-كەلگەن پۋنكتىدە تاپسىرا الادى. تەك تەستىلەۋگە قاتىسۋ ۇشىن ۇبت وتكىزۋ پۋنكتىنە كورسەتىلگەن مەرزىمدە وتىنىش بەرۋ قاجەت.

ەسكە سالا كەتەيىك, 2018 جىلدان باستاپ ار تۇلەككە ۇبت سەرتيفيكاتىمەن بىرگە, بىلىم بەرۋ باعدارلامالارىنىڭ تىزىمى, بولىنگەن گرانتتاردىڭ سانى, سونداي-اق, وتكەن جىلعى گرانتتار كونكۋرسىنىڭ ناتيجەلەرى جازىلعان اقپاراتتىق پاراقشا بەرىلەدى. اتالعان اقپاراتتىق پاراقشا تۇلەككە وزىنىڭ بولاشاق ماماندىعىن تاڭداۋ كەزىندە كومەك بولادى.

جوعارى وقۋ ورىندارىنىڭ اكادەمييالىق جانە باسقارۋ دەربەستىگىن كەڭەيتۋ ماقساتىندا بىرقاتار وزگەرىستەر ەنگىزىلدى. 2019 جىلدان باستاپ مامانداردى دايارلاۋ باعىتتارىنىڭ جاڭا كلاسسيفيكاتورى ەنگىزىلىپ وتىر. بۇگىنگى كۇنگە دەيىن ەلىمىزدىڭ جوعارى وقۋ ورىندارىندا ماماندىقتاردىڭ تىزىمى ناقتى كورسەتىلگەن كلاسسيفيكاتور پايدالانىلعان بولاتىن. ەندىگى كەزەكتە مامانداردى دايارلاۋ باعىتى كورسەتىلەتىن بولادى. سايكەسىنشە, ەلىمىزدىڭ جوعارى وقۋ ورىندارى دەربەس بىلىم بەرۋ باعدارلامالارىن ازىرلەيدى.

وسىعان وراي, مەملەكەتتىك بىلىم بەرۋ گرانتتارى بىلىم بەرۋ باعدارلامالارىنىڭ توپتارى بويىنشا تاعايىندالاتىن بولادى. ماسەلەن, «ماتەماتيكا پانى مۇعالىمدەرىن دايارلاۋ» توبىنا «ماتەماتيكا», قوسارلانعان «ماتەماتيكا-فيزيكا», «ماتەماتيكا-ينفورماتيكا» ماماندىقتارى كىرەدى. ال, «اقپاراتتىق تەحنولوگييالار» توبىنا — «ينفورماتيكا», «اقپاراتتىق جۇيەلەر» جانە ت.ب. ياعني, بىلىم بەرۋ گرانتتارىنىڭ تاعايىندالۋى بۇرىنعىداي ماماندىقتار بويىنشا ەمەس, بىلىم بەرۋ باعدارلامالارىنىڭ توپتارى بويىنشا جۇزەگە اسىرىلاتىن بولادى. گرانت ۇتىپ العان سوڭ وقۋعا تۇسۋشى (تالاپكەر) جوو-عا تاڭداعان بىلىم بەرۋ باعدارلاماسى بويىنشا تىركەلىپ, جوو-عا قۇجاتتارىن تاپسىرۋ كەزىندە تاڭداپ العان ماماندىعى بويىنشا بىلىم الاتىن بولادى.

ەلباسى «100 ناقتى قادام» ۇلت جوسپارىندا نازارباەۆ ۋنيۆەرسيتەتىنىڭ تاجىريبەسىن ەسكەرە وتىرىپ, جوو-لاردىڭ اكادەمييالىق جانە باسقارۋشىلىق دەربەستىگىن كەزەڭ-كەزەڭىمەن كەڭەيتۋدى قامتاماسىز ەتۋدى تاپسىردى. اكادەمييالىق ەركىندىك — بىلىم بەرۋ ساپاسىن ارتتىرۋ باعدارلامالارىنىڭ مازمۇنىن دەربەس انىقتاۋ بويىنشا جوو-لارعا وكىلەتتىك بەرۋ. بۇل بىلىكتى كادرلار مەن جاڭا ماماندىقتارعا دەگەن سۇرانىس ۋاقىت وتكەن سايىن ارتىپ كەلە جاتقان جاڭا ەكونوميكاعا كوشۋ جاعدايىندا اسا ماڭىزدى.

ا.احمەتقازى

ۇبت: دەرەك پەن دايەك

ۇلتتىق بىرىڭعاي تەستىلەۋ — قازاقستان رەسپۋبليكاسىندا قولدانىلاتىن مەكتەپ بىتىرۋشىلەردىڭ بىلىمىن باعالاۋ جۇيەسى. ۇبت-نىڭ ناتيجەسى قابىلداۋ ەمتيحانى رەتىندە كوللەدجدەردە, جوو-لاردا ەسەپتەلىنەدى. سونداي-اق, ۇبت-نىڭ بالدارى «بولاشاق» پرەزيدەنتتىك ستيپەنديياسىن الۋعا جارامدى.

ۇبت العاش رەت 1999 جىلى ەنگىزىلدى. 2017 جىلعا دەيىن ۇبت ۇش فۋنكتسييانى اتقاردى: 11 جىلدىق وقۋدى اياقتاۋ قورىتىندىسى رەتىندەگى بىتىرۋ ەمتيحانى, جوعارى وقۋ ورىندارىنا تۇسۋ ەمتيحانى جانە تۇلەكتەرگە مەملەكەتتىك گرانتتاردى تاعايىنداۋ مەحانيزمى. ەندى قورىتىندى اتتەستاتتاۋ نەمەسە بىتىرۋ ەمتيحاندارى مەكتەپتەردە وتكىزىلەدى, ال ۇبت – جوعارى وقۋ ورنىنا تۇسۋ جانە مەملەكەتتىك گرانتتاردى تاعايىنداۋ ەمتيحانى بولىپ قالىپ وتىر.

ۇبت بىر كەزەڭنەن تۇرادى جانە 140 بالدىق مەجەمەن باعالانادى. وقۋشىلار بىر كۇندە ۇش مىندەتتى پاننەن (قازاقستان تاريحى, ماتەماتيكالىق ساۋاتتىلىق, وقۋ ساۋاتتىلىعى) — ارقايسىسىندا 20 تاپسىرمادان جانە ەكى بەيىندى پاننەن — ارقايسىسىندا 30 تاپسىرمادان تەست تاپسىرادى.

2019 جىلى ۇبت 16-شى رەت وتكىزىلەدى. وسى جىلدار ىشىندە ۇبت-عا 1,5 ملن استام مەكتەپ بىتىرۋشى قاتىسقان. بۇل بارلىق مەكتەپ بىتىرۋشىلەردىڭ 80 پايىزىن قۇرايدى.

بولىسۋ:

پىكىر جازۋ


*