تالىمىن تىڭداپ ۇستازدىڭ

588
0
بولىسۋ:

«نۇر وتان» پارتيياسى تاراز قالالىق فيليالى جانىنداعى «جاس وتان» جاستار قاناتىنىڭ ۇيىمداستىرۋىمەن «ۇستاز – ۇلاعاتتى ەسىم» تاقىرىبىندا وبلىس ورتالىعىنداعى اباي اتىنداعى ورتالىقتاندىرىلعان كىتاپحاناسىندا بىلىم بەرۋ سالاسىندا قىزمەت اتقاراتىن جاس ماماندارمەن جانە بىلىم بەرۋ سالاسىنىڭ ۇزدىگى, جاستارعا ۇلگى بولىپ جۇرگەن ارداگەر ۇستاز ايشا نييازبەكوۆامەن كەزدەسۋ وتتى. 

قازىرگى قوعامداعى ۇستازدار مارتەبەسى تۋرالى سوز قوزعار الدىندا, قازاقتىڭ حاس باتىرى باۋىرجان مومىشۇلىنىڭ: «ۇستازدىق – ۇلى قۇرمەت. سەبە­بى, ۇرپاقتى ۇستاز تاربيە­لەيدى. بولاشاقتىڭ باسشىسىن دا, داناسىن دا, عالىمىن دا, ەڭبەكقور ەگىنشىسىن دە, كەن­شى­سىن دە ۇستاز وسىرەدى. ومىرگە ۇر­پاق بەرگەن انالاردى قالاي ارداقتاساق, سول ۇرپاقتى تار­بيەلەيتىن ۇستازداردى دا سولاي ارداقتاۋعا مىندەتتىمىز», – دەگەن سوزى ەسكە تۇسەدى. سونداي-اق ۇستاز قادىرى, مۇعالىم مار­تە­بەسى تۋرالى ماعجان جۇما­باەۆتىڭ: «التى الاشتىڭ باسى قوسىلسا, توردەگى ورىن – مۇعا­لىمدىكى» – دەۋى دە تەگىن بولماسا كەرەك. ونىڭ ۇستىنە بۇگىنگى تاڭ­دا بىلىم بەرۋ سالاسىندا كوپ­تەگەن وزگەرىستەر جۇرگىزىلىپ جاتىر. سونىڭ
بىرى – ەلباسى نۇر­سۇلتان نازارباەۆ وتكەن جىل­عى جولداۋىندا ايتىلعان «پەداگوگتار مارتەبەسى» تۋرالى زاڭىنىڭ قابىلدانۋى. مەم­لەكەت باسشىسى جولداۋىندا: «بۇل زاڭ مۇعالىمدەر مەن مەك­تەپ­كە دەيىنگى ۇيىمداردىڭ قىز­مەت­كەرلەرى ۇشىن بارلىق ىنتا­لاندىرۋدى, جۇمىس جۇكتەمەسىن قىسقارتۋ جانە كۇتپەگەن تەك­سەرۋلەر مەن نەگىزسىز فۋنكتسييا­لاردان قورعاۋدى قاراستىرۋى تيىس», – دەپ اتاپ وتكەن بولاتىن. سوندىقتان جوعارىداعى كەز­دەسۋدە «پەداگوگتاردىڭ مار­تە­بەسى دەگەن نە?», «قازىرگى زا­مانعى مۇعالىمدەردىڭ زاماناۋي كەلبەتى قانداي بولۋى كەرەك?» دەگەن ساۋالدار العا تارتىلدى. سۇراقتارعا تاجىريبەلى ۇستاز پىكىرىن اشىق, انىق جەتكىزدى. شاراعا قاتىسقان تاراز قالا­سىنداعى ورتا مەكتەپتەردە قىزمەت اتقارىپ جۇرگەن جاس ماماندار دا وزدەرىن تولعان­دىرىپ جۇرگەن سۇراقتارعا تۇششىمدى جاۋاپتار الا الدى. كەلەلى كەزدەسۋدى «نۇر وتان» پارتيياسى تاراز قالالىق في­ليالى جانىنداعى «جاس وتان» جاستار قاناتىنىڭ بولىمشە باسشىسى قۇتجان باقىتجان جۇرگىزىپ وتىردى.

ەرمان ابديەۆ, جامبىل وبلىسى

بولىسۋ:

پىكىر جازۋ


*