«نۇر-مەديا» حولدينگىنە جاڭا مىندەتتەر جۇكتەلدى

751
0
بولىسۋ:

«نۇر وتان» پارتيياسى توراعاسىنىڭ بىرىنشى ورىنباسارى ماۋلەن اشىمباەۆ «نۇر-مەديا» حولدينگىنىڭ باسشىلىق قۇرامىمەن جانە وعان قاراستى اقپارات قۇرالدارىنىڭ باسشىلارىمەن كەڭەيتىلگەن جيىن وتكىزدى. وندا حولدينگتىڭ وتكەن جىلدا اتقارعان جۇمىستارى ايتىلىپ, الداعى باعىت-باعدارى پىسىقتالدى.

سوز باسىندا ماۋلەن اشىمباەۆ وتكەن جىلى پارتييا قىزمەتىن جاڭعىرتۋ اياسىندا ايتارلىقتاي جۇمىستار اتقارىلعانىن جانە وسى باعىتتا «نۇر-مەديا» حولدينگىندە دە يگى ىستەر جۇزەگە اسىرىلعانىن جەتكىزدى.
– ەلباسى بەرگەن تاپسىرمالاردىڭ قاتارىندا «نۇر-مەديا» حولدينگىن جاڭعىرتۋ ىسى دە بار. سوعان وراي كوپتەگەن ىس قولعا الىندى. حولدينگتىڭ باسشىلىعى اۋىسىپ, كاسىبي ماماندار جۇمىلدىرىلدى. قازىر سونىڭ ناتيجەسىن كورىپ وتىرمىز. بۇل ىستى مەملەكەت باسشىسى دا ەسكەرىپ, جوعارى باعاسىن بەردى, – دەدى ماۋلەن اشىمباەۆ.
جاڭعىرتۋ اياسىندا ىستەلگەن جۇمىستاردىڭ قاتارىندا «AIQYN» مەن «ليتەر» گازەتتەرىنىڭ بىر جاۋاپكەرشىلىگى شەكتەۋلى سەرىكتەستىك بولىپ قايتا قۇرىلعانى دا بار. سول ارقىلى باسىلىمداردىڭ شىعىندارى وڭتايلاندىرىلدى. سونداي-اق ەكى گازەتتىڭ رەداكتسيياسى الماتىدان استاناعا كوشىرىلدى. جاڭا جىلدان باستاپ اتالعان باسىلىمداردىڭ فورماتى وزگەرىپ, ونداعى ماتەريالداردىڭ مازمۇنى مەن سالماعى دا ارتا تۇستى.
سونىمەن بىرگە «نۇر-مەدياعا» قاراستى «ASTANA» تەلەارناسى مەن راديولاردىڭ دا جۇمىسى جاندانىپ, جاڭا باعىتتا وربىگەنىن ايتا كەتكەن لازىم. كادرلىق ساياسات ماسەلەسى دە ۇتىمدى تۇردە جۇزەگە اسىرىلىپ, جاس ارى بىلىكتى ماماندار كوپتەپ تارتىلا باستادى.

وسىنداي اۋقىمدى جۇمىستارعا نازار اۋدارعان پارتييا توراعاسىنىڭ بىرىنشى ورىنباسارى وتكەن جىلدى «نۇر-مەديا» حولدينگى ۇشىن تابىستى بولدى دەدى.
– ەندى بىزدىڭ الدىمىزدا ەلباسى ايقىنداپ بەرگەن جاڭا مىندەتتەر مەن ماقساتتار تۇر. سونى ساتتى ىسكە اسىرۋ ۇشىن حولدينگتىڭ جۇمىسىن جۇيەلى تۇردە ۇيلەستىرە بىلۋىمىز كەرەك, – دەگەن ماۋلەن اشىمباەۆ بىرقاتار باسىمدىقتاردى اتاپ وتتى.
بيىل پارتييانىڭ قۇرىلعانىنا 20 جىل تولاتىنىن, وسى مەرەيلى جىلدى ەل دامۋىنا يگى اسەرىن تيگىزەتىن ىس-شارالارمەن اتاپ وتۋ كەرەكتىگىن ايتقان «نۇر وتان» پارتيياسى توراعاسىنىڭ بىرىنشى ورىنباسارى حولدينگكە قاراستى بۇقارالىق اقپارات قۇرالدارىنىڭ اتالعان ىسكە بەلسەنە قاتىسۋى كەرەكتىگىن جەتكىزدى.
سونىمەن قاتار وتىرىستا 20 جىلدىقتىڭ اياسىنداعى باستى ىس-شارا بولىپ سانالاتىن پارتييانىڭ كەزەكتى سەزىن وتكىزۋ ىسى سوز بولىپ, ونى اقپاراتتىق سۇيەمەلدەۋ ىسىندە حولدينگتىڭ تيىستى جۇمىستى ۇتىمدى ۇيىمداستىرۋ كەرەكتىگى ايتىلدى. سونداي-اق اقپارات قۇرالدارىنىڭ كونتەنتىن جاڭارتىپ, زامان تالاپتارىنا ساي اقپارات تاراتۋ ماسەلەسىن ايتقان ماۋلەن اشىمباەۆ سول ارقىلى رەيتينگتى كوتەرۋگە جۇمىس ىستەۋدى سوز ەتتى.
– گازەتتەرىمىزدىڭ تاقىرىپتىق اياسىن شەكتەمەي, وزەكتى الەۋمەتتىك ماسەلەلەردى تالداپ, ساراپتاپ جازۋعا اسا مان بەرۋىمىز كەرەك. ەلباسى تاپسىرمالارىن ورىنداۋدا وسالدىق تانىتقان مەملەكەتتىك ورگانداردىڭ جۇمىسىنا قاتىستى سىني ماقالالار دا جازىلۋى تيىس. ەڭ باستىسى, بىزدىڭ باسىلىمداردا قوعامداعى احۋال قاز-قالپىندا كورىنىپ, گازەتتەردىڭ وزىندىك ۇنى ايقىن سەزىلىپ تۇرۋى تيىس, – دەدى ماۋلەن اشىمباەۆ.
ودان بولەك, جيىن بارىسىندا قارجىلىق تاۋەلسىزدىك جانە الەۋمەتتىك جەلىلەر مەن ينتەرنەتتە بەلسەندىلىكتى ارتتىرۋ ماسەلەسىنە دە ەرەكشە نازار اۋدارىلدى.


وز كەزەگىندە «نۇر-مەديا» حولدينگىنىڭ باس ديرەكتورى لاززات تانىسباي, «ايقىن-ليتەر» جشس-نىڭ ديرەكتورى, «ليتەر» گازەتىنىڭ باس رەداكتورى نۇراي ورازوۆ, «AIQYN» گازەتىنىڭ باس رەداكتورى نۇرتورە جۇسىپ, «Túrkistan» گازەتىنىڭ باس رەداكتورى قۋات اۋەسباي, «ASTANA» تەلەارناسى باس ديرەكتورىنىڭ ورىنباسارى يلحام يبراگيموۆ, NS راديوسىنىڭ ديرەكتورى اسەل بالعاەۆا, «Orda FM» راديوسىنىڭ ديرەكتورى لاۋلا ورازاقىنقىزى وزدەرى باسقارىپ وتىرعان اقپارات قۇرالدارىنىڭ اتقارعان جۇمىسى مەن الداعى مىندەتتەرى جايىندا كەڭىنەن بايانداپ بەردى.

بولىسۋ:

پىكىر جازۋ


*