Жаңа мүшелер сайланды

149
0
Бөлісу:

Жоғарғы cот төрағасы Жақып Асанов жоғары сот органының кезекті жалпы отырысын өткізді. Күн тәртібіне сай, жалпы отырысқа қатысушылар Жоғары сот кеңесінің құрамына жаңа кандидатураларды талқылады.

Себебі, ЖСК-нің қазіргі мүшелері Әділ Құрықбаевтың, Ардақ Балағұмарованың, Мұрат Хожабергеновтің және Ләззат Күдекованың өкілеттігі аяқтал­ған.
Заң бойынша ЖСК мүшелері болып тағайындалатын канди­дат­тарды облыстық соттардың жалпы отырыстары ұсынған судьялардың ішінен Жоғары сот органы төрағасының ұсы­нуы бойынша Жоғарғы соттың жалпы отырысы сайлайды. Бұл ретте кандидаттар ретінде Жо­ғарғы және облыстық соттардан бір-бір адамнан, ал аудандық соттан екі адамнан ұсынылады.
Жақып Асанов Жоғарғы соттың судьясы Мейрам Жан­ғұтдиновтың кандида­ту­ра­сын жалпы отырыстың қарауына енгізді, сондай-ақ Шығыс Қазақ­стан облыстық сотының, Астана қаласының Сарыарқа аудандық сотының және Алма­ты қаласы Медеу аудандық соты­ның судьялары Нұрмахан­бет Елемесовті, Жанира Перне­құлованы және Ел-Назар Мана­повты таныстырды. Олар – үлкен судьялық жұмыс тәжі­ри­бесі бар, заңтану сала­сын­дағы білікті мамандар, прин­циптілік және адалдық сияқ­ты жоғары моральдық қасиеттерге ие.
Жалпы отырысқа қатысу­шы­лар аталған адамдарды Жоғары сот кеңесінің құрамына енгізуге бірауыздан дауыс берді.

Айхан Шәріп

 

Бөлісу: