КАТАР ЖЕҢІСІНІҢ ҚҰПИЯСЫ НЕДЕ?

473
0
Бөлісу:

Жақында ғана футболдан Катар құрамасы Азия кубогын жеңіп алды. Азияда азуын айға білеген Жапония құрамасының өзін финалда 3:1 есебімен ойсырата ұтқан. Мұны кездейсоқтық деп айтуға да ауыз бармайды. Себебі, катарлықтар турнир бойына бірде-бір рет жеңілмепті. Сайысты сәтті бастап, соңына дейін сол алтын арқауды үзбеген.

Турнирдің үздік бомбардирі де Катар құрамасынан шыққан. 22 жастағы шабуылшы Әли Алмоез 7 матчта 9 гол соққан. Ал Акрам Афиф болса, 7 матчта 10 рет дәл пас беріп, үздік ассистент атағын жеңіп алды.
Катар футболы әлемде әлеуетті болып саналмайтын. Бірақ мем­л­е­кеттің футбол федерация­сы соңғы 10-15 жыл көлемінде бар на­зарды балалар футболына ау­дар­ған. Осы мақсатпен олар ис­паниялық бапкер Феликс Сан­­чес Басты шақырып, ол 2006 жыл­­дан бастап Аспира акаде­мия­сында катарлық балаларды «Барселона» жүйесі негізінде жаттықтырады (Санчестің өзі де каталониялық клубтың мектебі­нен шыққанын айта кету керек). Балақайлар ержеткен кезде Сан­чес оларды жасөспірімдер құра­ма­­сының бапкері ретінде бау­луын жалғастырады. Нәти­же­сінде, испан маманының басшы­лығымен 19 жасқа дейінгі құрама 2014 жылы Азия чемпио­натында топ жарған. 2017 жыл­дың шілде айында Санчес елдің бас құра­ма­сына бапкер­лікке тағайын­да­лады. Хроноло­гия­лық есептеуге жүгінсек, ұлт­тық құрамаға қабылдана бастаған жастардың дені – Санчестің көзі таныс, өзі тәрбиелеген (сонау 2006 жылдан бастап) балалары болып шықпақ.
Бірақ турнир бойына бірде-бір катарлық жанкүйер Әбу-Дабиге аттап баса алмаған. Катар мен БАӘ арасындағы ушыққан дип­ло­матиялық жағдай осындай қолайсыздық тудырған сыңайлы. Турнир басталмай тұрып БАӘ билігі тіпті катарлық журна­лис­тер­дің де елге кіруіне тыйым сал­­ған. Ал жартылай финалда Катар мен БАӘ құрамалары кез­дес­кен кезде жергілікті жан­күйер­лер катарлық футболшы­ла­р­ға бөтелке мен аяқ киім лақ­ты­рып, кемсітуші сөздер жазыл­ған плакаттар көтерген.
Бір қызығы, финалда ойнаған Катар құрамасының бес ойын­шы­сы ғана катарлық екен. Қалған футболшылар – Судан, Египет, Ирак, Алжир, Морокко елінің өкілдері. Испан маманы­ның бас болуымен футбол феде­ра­­циясы ойыншыларды сәтті натурализациялай білген. Ең бастысы, Катар өз тарихында тұңғыш рет бұл кубокты жеңіп алды. Акрам Афиф, Әли Алмоез, Бассам әл-Рауи және Әбделкәрім Хассан сынды жас футболшы­лар­дың есімі жақын бір-екі жыл­дықта Еуропа футболын да дүр еткізуі ғажап емес. Осыған қа­рап, бізде де балалар футбо­лы­на лайықты назар аударылуы керек екені ойға оралады. Қазірден осы мәселені лайықты қолға алсақ, айналдырған 10-12 жыл шама­сында нәтижесін берері де сөзсіз. Ал біз бұл тұрғыда құлықсыз сияқтымыз…
Абай АЙМАҒАМБЕТ

Бөлісу: