ФИНАЛДЫҚ КЕЗЕҢГЕ ШЫҚТЫ

Үлкен теннистен Қазақстан құрамасы Астанада Португалия теннисшілерін 3:1 есебімен жеңіп, қараша айында Мадрид қаласында өтетін Дэвис кубогының финалдық кезеңіне жолдама алды. 

Қазақстанның бірінші ракет­ка­сы Михаил Кукушкин беделді қарсыласы Жоау Соузаны жарыс­тың екінші күнінде жеңіп, командасына жеңіс сыйлады. Бұдан кейін қазақстандық Алек­сандр Бублик пен Педро Соуза кортқа шыққан жоқ. Себе­бі, бұл матч ешқандай шешуші маңызға ие емес еді.
– Дэвис кубогының финалдық кезеңіне шыққанымыз үшін қуаныштымыз. Біз өзіміздің үлкен теннистегі қарымды ко­ман­да екенімізді тағы бір мәрте дәлелдедік. Жігіттерге рақмет! Олар соңғы екі күн бойы бар күшін сарқып, аса қажет жеңісті олжалады, – деді Қазақстан құра­масының капитаны Диас Досқараев.
Жарыстың бірінші күнінде Александр Бублик португалия­лық Жоау Соузаны (әлемнің 39 ракеткасы) 2:0 есебімен жеңіп кеткен еді. Бірақ жұптасып ойнау кезінде қонақтар басымдық байқатты. Александр Недовесов пен Тимур Хабибуллин өздеріне қарсы тұрған Жоау Соуза және Гаштао Элиаш жұбынан асып өте алмады.
Финалдық кезең қараша айын­да Мадридте өтеді. Оған 18 ко­манда қатысады: іріктеу тур­ни­рінің жеңімпаздары, был­тыр­ғы жартылай финалға қаты­су­шы­лар (Хорватия, АҚШ, Испа­ния және Фран­ция) және wild-card (Аргентина мен Ұлы­бри­тания) иегерлері. Коман­да­лар ойын­ды топтық кезеңнен бас­тай­ды (3 ко­ман­да­дан 6 топ). Ал плей-офф ке­зеңіне сегіз құрама шығуы тиіс.

Абай АЙМАҒАМБЕТ