«قىز بەن تەڭىز» – جاقىندىقتىڭ جىلى كورىنىسى

454
0
بولىسۋ:

استانادا «سارىارقا» كينوتەاترىندا «قىز بەن تەڭىز» اتتى الەۋمەتتىك كوركەم فيلمنىڭ تۇساۋكەسەرى وتتى. قازاقستان رەسپۋبليكاسى مادەنيەت جانە سپورت مينيسترلىگىنىڭ تاپسىرىسى بويىنشا ش.ايمانوۆ اتىنداعى «قازاقفيلم» كينوستۋديياسى تۇسىرگەن فيلمنىڭ رەجيسسەرلەرى ارى ستسەناريي اۆتورلارى – مۇحامەد مامىربەكوۆ جانە ازيزجان زايروۆ.

 فيلمدە بتسپ-مەن اۋىراتىن اسەل ەسىمدى بويجەتكەننىڭ ومىرى باياندالادى. ونىڭ بار ارمانى – ماحابباتىن كەزدەستىرىپ, وتباسىن قۇرۋ.

– مۇمكىندىگى شەكتەۋلى جاندار تۋرالى باياندايتىن بۇل فيلم كورەرمەنگە وي سالاتىن, وتە كۇردەلى تۋىندى. مۇگەدەكتىگى بار جاندارعا جاعداي جاساۋ, ولارعا قولجەتىمدى ورتا قۇرۋ, قوعامنان تىس قالماۋىنا جىتى كوڭىل بولۋ, قوعامنىڭ نازارىن مۇمكىندىگى شەكتەۋلى جانداردىڭ ماسەلەسىنە كوڭىل اۋدارتۋ – بىزدىڭ باستى ماقساتىمىز! فيلمنىڭ رەجيسسەرلەرى ازيز زايروۆ پەن مۇحامەد مامىربەكوۆ قيىندىقتاردان قورىقپاي, وسى ماڭىزدى تاقىرىپتى قوزعاپ, تاماشا كينوتۋىندى تۇسىردى. فيلمنىڭ تۇسىرۋ توبىن بۇگىنگى العاشقى كورسەتىلىممەن قۇتتىقتايمىن, – دەدى قر مادەنيەت جانە سپورت مينيسترى ارىستانبەك مۇحامەديۇلى سالتاناتتى تۇساۋكەسەر راسىمىنىڭ اشىلۋىندا.
«قىز بەن تەڭىز» فيلمى مۇمكىندىگى شەكتەۋلى جاستاردىڭ ومىرىن باياندايتىن «بەزگرانيچنىە ۆوزموجنوستي» ديلوگيياسىنىڭ ەكىنشى بولىمى.
– «بىت يلي نە بىت» اتتى بىرىنشى بولىم ارقىلى بىز بتسپ-مەن اۋىراتىن جاس جىگىتتىڭ ومىرىن كورسەتۋگە تىرىستىق.  ال وسى فيلمدە بويجەتكەننىڭ ومىرىن كورسەتەمىز. فيلم نەگىزىنە «اردي» وڭالتۋ ورتالىعىنىڭ تاربيەلەنۋشىسى دينارا شاريپوۆانىڭ ومىرى الىنعان. كارتينادا ول باستى رولدى سومدايدى. دينارا وزىنىڭ ومىرگە دەگەن كوزقاراسىمەن, ومىرسۇيگىشتىگى جانە مىنەزىنىڭ جۇمساقتىعىمەن ەرەكشەلەنەدى. وزىنىڭ اۋرۋىنا قاراماستان ول تولىققاندى ومىر سۇرەدى. «تۇران» كوللەدجىن تامامداپ, ماسكەۋدەگى «سينەرگييا» ۋنيۆەرسيتەتىندە جوعارعى بىلىم العان. شىعارماشىلىققا دا وتە جاقىن, اياعىمەن سۋرەتتەر سالىپ, دەنى ساۋ ادامدارعا وز-وزىنە سەنۋگە كومەكتەسەدى. دينارانىڭ سۋرەتتەرى جاپونييا, انگلييا, امەريكا ەلدەرىنىڭ جەكە كورمەلەرىندە ۇسىنىلعان. فيلمدە بىز ونىڭ شەكسىز ىشكى جان دۇنيەسىن اشىپ كورسەتۋگە تىرىستىق, – دەدى فيلمنىڭ رەجيسسەرى ارى پروديۋسەرى ازيزجان زايروۆ.
ايتا كەتەيىك, فيلمگە تۇسكەندەردىڭ بارلىعى كاسىبي اكتەرلەر ەمەس, مۇمكىندىگى شەكتەۋلى ادامدار (بتسپ دياگنوزى بار). باستى رولدەردى «اردي» وڭالتۋ ورتالىعىنىڭ وقۋشىلارى مەن «بىت يلي نە بىت» فيلمىندە باستى رولدى سومداعان اكتەر, بتسپ-مەن اۋىراتىن تاحير وماروۆ وينايدى. سونداي-اق, فيلمگە ەمير بايعازيننىڭ «تورت وقيعا» فيلمىندە ەپيزودتىق رولدى سومداعان  قاناعات تاسقاراەۆ تا تۇسكەن. ال باس كەيىپكەردىڭ اپكەسى رولىنە تەاتر جانە كينو اكتريساسى گۇلباحرام بايبوسىنوۆا شاقىرىلعان.
– الەۋمەتتىك فيلمدەردى تۇسىرۋدەن ۇققانىم, مۇمكىندىگى شەكتەۋلى جاندارعا كينەماتوگراف ارقىلى كەلگەن ارت-تەراپييانىڭ اسەرى بولاتىنىن تۇسىندىم. الەۋمەتتىك باعىتتا تۇسىرىلگەن «بىت يلي نە بىت?» جانە «قىز بەن تەڭىز» جوبالارىنان كەيىن بىزدىڭ «اكتەرلەرىمىزدىڭ» قالاي وزگەرىپ, وزدەرىنە دەگەن سەنىم پايدا بولعانىن بايقادىم. سونىڭ ارقاسىندا قوعام ومىرىنە يمەنبەي ارالاسۋعا دايىن ەكەندەرى كورىنىپ تۇر. بۇل كارتينا ارقىلى بىز كورەرمەندەرگە تەك مۇگەدەك جاستاردىڭ عانا ەمەس, مۇمكىندىگى شەكتەۋلى بارلىق جانداردىڭ كۇندەلىكتى پروبلەمالارى تۋرالى اشىپ كورسەتۋگە تىرىستىق, – دەدى فيلمنىڭ تەڭ رەجيسسەرى مۇحامەد مامىربەكوۆ.
فيلمنىڭ سوڭىندا استانالىق كورەرمەندەر ۇزاق ۋاقىت قول سوعىپ, ىستىق قوشەمەت كورسەتتى.  ورىندارىنان تۇرىپ, 20 مينۋت كولەمىندە قول سوققان كينوسۇيەر قاۋىم رەجيسسەرلەرگە, اكتەرلەرگە جانە تۇسىرۋ توبىنا شەكسىز العىستارىن بىلدىرىپ جاتتى.
سونداي-اق فيلمنىڭ رەجيسسەرلەرى زاعيپ جاندار ۇشىن ارنايى تيفلواۋدارماسى بار نۇسقاسىن دايىنداۋدى جوسپارلاپ وتىرعاندارىن جەتكىزدى.

ەستەرىڭىزگە سالا كەتسەك, «قىز بەن تەڭىز» فيلمى 2017 جىلى كوكتەمدە وندىرىسكە جىبەرىلگەن بولاتىن. فيلمنىڭ نەگىزگى تۇسىرىلىمدەرى ەكى اي كولەمىندە الماتى قالاسىندا, سونداي-اق قاپشاعاي جاعالاۋىندا وتكەن.

ا.احمەتقازى

بولىسۋ: