نيكولاس مادۋرو رەسەيگە قاشۋى مۇمكىن

512
0
بولىسۋ:

ۆەنەسۋەلا پرەزيدەنتى نيكولاس مادۋروعا ەلدەن كەتىپ, بيلىكتى ۋاقىتشا ۇكىمەتكە تاپسىرعان جون. بۇل تۋرالى ۆەنەسۋەلا جونىندەگى اقش-تىڭ ارنايى وكىلى ەلليوت ابرامس حابارلادى دەپ جازادى The Washington Post.

ونىڭ سوزىنشە, ۆاشينگتون مادۋروعا ناقتى قاي ەلگە قاراي «قاشۋدى» ايتپاعان. دەگەنمەن ابرامس ۆەنەسۋەلا باسشىسىنىڭ كۋبادا جانە رەسەيدە «سەنىمدى سەرىكتەرى» بار ەكەنىن ايتىپ قالىپتى. ول سونىمەن قاتار پرەزيدەنتتى وز ەلدەرىندە قابىلداۋعا دايىن بىرنەشە ەلدىڭ دە بار ەكەنىن حابارلاپتى.

سونىمەن قاتار اقش مادۋرو قۇرعان زاڭدىق ورگان – كونستيتۋتسييالىق اسسامبلەيا مۇشەلەرىنىڭ ۆيزاسىن تارتىپ العان. ازىرگە ولاردىڭ ەسىمدەرى اتالمادى.

اقش ۆەنەسۋەلا وپپوزيتسيياسىنىڭ ليدەرى جانە پارلامەنت سپيكەرى حۋان گۋايدونى رەسپۋبليكا پرەزيدەنتى دەپ تانىعاننان كەيىن ەلليوت ابرامس ارنايى وكىل اتانعان بولاتىن.

جالپى, اقش مادۋرونىڭ بيلىكتەن كەتۋىن قالايدى. ترامپ بۇعان دەيىن حۋان گۋايدونى ەلدىڭ باسشىسى رەتىندە تانىعان ەدى. بىز بۇعان دەيىن ۆەنەسۋەلاداعى جاعداي مەن حۋان گۋايدو تۋرالى تولىق مالىمەت بەرگەن ەدىك.

وسىدان ساناۋلى ۋاقىت بۇرىن عانا نيكولاس مادۋرو كەزەكتەن تىس پارلامەنتتىك سايلاۋ وتكىزۋگە قارسى ەمەستىگىن مالىمدەپتى. ونىڭ سوزىنشە, جاڭا ۇلتتىق اسسامبلەيا ەلدەگى جاعدايدى تۇراقتاندىرۋ ۇشىن بيلىككە كومەكتەسەدى ەكەن. بۇل رەتتە مادۋرو ەلدە پرەزيدەنتتىك سايلاۋ وتكىزۋگە تۇبەگەيلى قارسى. ول مەملەكەتتى دۇرىس باسقارىپ وتىرمىن, ەلدەگى جاعداي تولىق باقىلاۋىمدا, ۇكىمەت 100 پايىز جۇمىس ىستەپ جاتىر دەپ ەسەپتەيدى. سونداي-اق مادۋرو وزىنە قارسى شىعىپ جاتقان باتىس ەلدەرى بيلىگىن دە كىنالاعان.

اباي ايماعامبەت

بولىسۋ: